རྒྱ་གཞུང་གིས་བོད་ཀྱི་ཆབ་སྲིད་བཙོན་ཟུར་དང་རྩོམ་པ་པོ་དྲུག་“རྒྱལ་ཁབ་ཁ་བྲལ་གྱི་ངན་སྐུལ་” དང་ “རྒྱལ་ཁབ་བདེ་འཇགས་ལ་གནོད་སྐྱོན་བཟོས་”པའི་བསྙོན་འཛུགས་འོག་ཏུ། ཁོང་ཚོར་ལོ་༤ ནས་༡༤ བར་གྱི་དུས་བཀག་བཙོན་འཇུག་གི་ཁྲིམས་ཐག་བཅད་པ་དང་། བོད་མི་འདི་དག་འཛིན་བཟུང་བཙན་ཁྲིད་བྱས་ནས་དུས་ཡུན་མི་ལོ་གཅིག་ནས་གཉིས་རིང་འབྲེལ་ཡོད་ཁྱིམ་མིར་བརྡ་ལན་ཙམ་ཡང་མ་སྤྲད་པར་གསང་བའི་བཀག་ཉར་བྱས་འདུག
འདི་གར་བོད་ནས་གནས་ཚུལ་འབྱོར་བ་ལྟར་ན། ཕྱི་ལོ་༢༠༢༢ ཟླ་༩ ཡས་མས་ཞིག་ལ། དཀར་མཛེས་ཁུལ་འབྲིང་རིམ་མི་དམངས་ཁྲིམས་ཁང་ནས། “རྒྱལ་ཁབ་ཁ་བྲལ་གྱི་ངན་སྐུལ་” དང་ “རྒྱལ་ཁབ་བདེ་འཇགས་ལ་གནོད་སྐྱོན་བཟོས་”པའི་བསྙོན་འཛུགས་འོག་ཏུ། བོད་ཀྱི་ཆབ་སྲིད་བཙོན་ཟུར་དང་རྩོམ་པ་པོ་གངས་སྐྱེས་སྒྲུབ་པ་སྐྱབས་ལ་ལོ་༡༤ དང་། སྲས་རྣམ་ལ་ལོ་༦། གངས་བུ་གཡུ་བྷྲུཾ་ལ་ལོ་༧ ཡས་མས། གངས་ཚེ་རིང་སྒྲོལ་མར་ལོ་༨། པདྨ་རིན་ཆེན་ལ་ལོ་༤། བསམ་འགྲུབ་ལ་ལོ་༨ བཅས་ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག ཡིན་ནའང་རྒྱ་གཞུང་གིས་བོད་ནང་དུ་ཉིན་རེ་བཞིན་དོགས་ཟོན་མྱུལ་ཞིབ་དང་ཞིབ་བཤེར་དམ་དྲག་ཤུགས་ཆེར་བཏང་བའི་རྐྱེན་གྱིས། ད་ལྟ་ཁྲིམས་ཐག་བཅད་ཟིན་པའི་བོད་མི་འདི་དག་བཙོན་ཁང་གང་དུ་བཅུག་མིན་དང་གནས་སྟངས་ཅི་འདྲ་ཡིན་མིན་ཤེས་རྟོགས་མ་ཐུབ་པར་ལྷག་ཡོད།
རྩོམ་པ་པོ་བོད་རུས་པའམ། སྲས་རྣམ་འཛིན་བཟུང་ཐེངས་༢ པ་དང་། ལོ་༦ གི་ཁྲིམས་ཆད་ཀྱི་གནས་ཚུལ།
ཕྱི་ལོ་༢༠༢༡ ལོའི་ཕྱི་ཟླ་༣ ཚེས་༢༣ ཉིན་གྱི་ཕྱི་དྲོའི་ཆུ་ཚོད༥ དང་སྐར༤༠ ཙམ་ལ། རྒྱ་གཞུང་ཉེན་རྟོག་པས་རྩོམ་པ་པོ་བོད་རུས་པའམ། སྲས་རྣམ་ལགས་རང་ཁྱིམ་ནས་འཛིན་བཟུང་བཙན་ཁྲིད་བྱས་ཡོད་འདུག་པ་དང་། ད་ལྟ་རྒྱ་གཞུང་གིས་རྩོམ་པ་པོ་རུས་པའམ། སྲས་རྣམ་ལགས་ལ་ཉེས་ཆད་ལོ་༦ གི་ཁྲིམས་ཐག་བཅད་འདུག་ཀྱང་། ད་ལྟའི་ཆར་ཁོང་བཙོན་ཁང་གང་དུ་གནས་ཚུལ་ཤེས་རྟོགས་བྱུང་མ་སོང་། ད་ལྟ་ཁོང་གི་ཁྱིམ་དུ་བཟའ་ཟླ་དང་བུ་མོ་ཞིག་བཅས་ཡོད་འདུག
རྩོམ་པ་པོ་བོད་རུས་པའམ། སྲས་རྣམ་ལགས་ནི་ཕ་ཡུལ་མདོ་སྨད་མགོ་ལོག་དབལ་ཤུལ་གསེར་རྟའི་ཡུལ་གྱི་གསེར་རྟ་རྫོང་རགས་བཀྲམ་ཡུལ་ཚོ་ཏོག་ཚ་སྡེ་བ་ནས་ཡིན་ཞིང་། ཁོང་གི་ཕ་མིང་ལ་དུང་དཀར་དང་། མ་མིང་ལ་ལེའུ་མཚོ་ཟེར། ཁོང་ནི་མི་རིགས་སློབ་གསོའི་ཕྱོགས་ལ་བྱ་བ་གང་མང་སྒྲུབ་མཁན་ཞིག་ཡིན་པར་མ་ཟད། ད་དུང་ཁོར་ཡུག་སྲུང་སྐྱོབ་ཀྱི་ཆེད་ཕྱག་ལས་གང་མང་གནང་མཁན་ཞིག་ཀྱང་ཡིན་འདུག
ཕྱི་ལོ་༢༠༢༠ ལོའི་ཟླ་༩ བའི་ནང་ལ་ཡང་རྒྱ་དམར་ཉེན་རྟོག་པས་རྩོམ་པ་པོ་བོད་རུས་པའམ། སྲས་རྣམ་ལགས་ཐེངས་དང་པོར་འཛིན་བཟུང་བྱས་ཏེ། སྐབས་དེར་ཉིན་༡༥ ཙམ་ལ་གསེར་རྟ་རྫོང་ཉེན་རྟོག་ཁང་དུ་བཀག་ཉར་གྱིས་ཁོང་ལ་མནར་གཅོད་གང་མང་བཏང་ཡོད་པ་རེད། སྐབས་དེར་ཁོང་དང་མཉམ་དུ་མི་གྲངས་བཅུ་འཛིན་བཟུང་བྱས་ཡོད་འདུག་པ་དང་། སྐབས་དེར་ཁོང་འཛིན་བཟུང་བྱེད་དགོས་དོན་གཙོ་བོ་ནི། དེའི་སྔོན་ཁོང་གིས་གཙོ་འགན་ཁུར་ཏེ། གོ་སྒྲིག་གིས་གངས་ཅན་ཕ་མའི་བདེ་ཐང་གླེང་བ་ཞེས་པའི་ཚོགས་འདུ་ཞིག་འཚོགས་པ་དེ་ཁྲིམས་འགལ་ཚབས་ཆེན་ཡིན། ཞེས་རྒྱ་གཞུང་གིས་ཁོང་ལ་ནག་ཉེས་བཙུགས་ཡོད་འདུག
ཕྱི་ལོ་ ༢༠༢༢ ཟླ་བ་ ༡༠ ཚེས་ ༢༡ ཉིན། ཅེས་ཆབ་སྲིད་བཙོན་ཟུར་མགོ་ལོག་འཇིགས་མེད་ཀྱིས་སྤེལ།
