བསླད་མེད་བྱམས་བརྩེ་དང་གཙང་དངུལ་དཀར་གྱི་མེ་ལོང་། །
སྟོན་ཟླ་དཀར་པོ་བཞིན་ཏུ་བཀྲག་མདངས་ཀྱིས་འཁྱུད་པའི། །
རྒྱང་རིང་ཡུལ་ན་བཞུགས་པའི་དྲིན་ཆེན་གྱི་ཕ་མས། །
བུ་ང་ལོ་ཟླའི་འཕྲེང་བར་བསྒུགས་རབས་དེ་གོ་བྱུང་། །
བདེ་སྡུག་འཚོ་བའི་གནས་ཚུལ་རྗེན་ཆར་དུ་གསལ་ཞིང་། །
རྗོད་བྱེད་ཕལ་སྐད་དཔྱ་མའི་གོ་སླ་ཡི་ཡིག་ཆུང་། །
བུ་ངའི་ལག་པར་སོན་ནས་ཀློག་ཐེངས་རེ་བཞིན་དུ། །
ཡར་ཐོན་མངོན་ཆུང་འཚོ་བའི་གསང་བརྡ་རེ་རག་བྱུང་། །
གོང་ན་ཡ་མེད་བཙན་པོའི་ཚོད་མེད་ཀྱི་གནོན་ཤུགས། །
འདབ་ན་སློབ་གསོས་མ་སྨིན་ཉམས་ཆུང་གི་མི་མང་། །
བར་ན་ཟུང་ཟད་ཉག་ཕྲའི་ཡབ་མེས་ཀྱི་རིག་གཞུང་། །
གང་ནས་བལྟས་ཀྱང་ཉམ་ངའི་གཡེང་ས་ཞིག་ཟིན་འདུག །
ཕན་སེམས་འཆར་སྒོའི་ཡིག་ཆུང་འབྱོར་ཐེངས་རེ་བཞིན་དུ། །
བུ་ཁྱོད་ད་ནས་མ་འདུག་རང་ཡུལ་ལ་བསྐྱོད་རོགས། །
ཡུན་ཐུང་རྐྱེན་མང་མི་ཚེ་ཕལ་ཆེེར་ནི་རྫོགས་སོང་། །
ད་ནི་མྱུར་མཇལ་སྐལ་བཟང་མངོན་འགྱུར་ལ་བརྩོན་ཟེར། །
ལགས་སོ་བྱམས་བརྩེ་འདོད་འཇོ་དྲིན་ཆེན་གྱི་ཕ་མ། །
འོ་སྐོལ་ཞལ་མཇལ་མི་ཚེའི་དགོས་པ་ཞིག་ལོས་ཡོད། །
དགོས་པ་དེ་ལས་དགོས་དོན་བརྒྱ་ཕྲག་ལས་ཆེ་བའི། །
དོན་གཅིག་ཞུ་འོ་དོན་དེ་རྩེ་གཅིག་ཏུ་བསྒྲུབ་རོགས། །
དབུ་ནག་སྐྱེ་རྒུའི་འདི་ཕྱི་ཚེ་རབས་ཀྱི་སྐྱབས་གཅིག །
སྤྱན་རས་གཟིགས་མགོན་༸རྒྱལ་མཆོག་བཅུ་བཞི་པའི་གསེར་ཞལ། །
དངོས་མཇལ་དཔལ་ལྡན་དུས་འཁོར་དབང་ཆེན་གྱིས་གཙོས་པའི། །
ཟབ་རྒྱས་གདམས་ངག་སྤྱོད་ཕྱིར་འཕགས་ཡུལ་འདིར་ཕེབས་ཤིག །
དབུ་ནག་བོད་ལ་སྐྱེས་པའི་དགོས་དོན་གཅིག་འདི་ཡིན། །
ཁོ་བོ་འཕགས་ཡུལ་སྔོན་འབྱོར་ཉིང་དགོས་གཅིག་འདི་ཡིན། །
ཁྱེད་ཅག་མི་ཚེའི་མཐའ་མའི་དོན་ཆེན་གཅིག་འདི་ཡིན། །
འཕྲལ་ཡུན་ལེགས་ཚོགས་ཕན་བདེའི་འབྱུང་གནས་དངོས་འདི་ཡིན། །
སྙིང་གཏམ་འོ་མའི་ཆུ་གཏེར་ཡ་ཁོག་ནས་བཞུར་ཏེ། །
དཀར་གཙང་ཤོག་བུའི་ངོས་ནས་ཕ་ཡུལ་དུ་སླེབས་པས། །
བདག་གི་བརྩེ་ལྡན་ཕ་མ་འཕགས་ཡུལ་དུ་འབྱོན་པར། །
མཆོག་གསུམ་རྒྱལ་བ་རྒྱ་མཚོའི་ཐུགས་རྗེ་ཡིས་གཟིགས་ཤིག །
ཅེས་ཤར་མདོ་སྨད་མགོ་ལོག་དབལ་ཤུལ་གསེར་རྟའི་ལྗོངས་སུ་སྐྱེས་པའི་ཁོ་བོ་ཚངས་སྲས་རིག་པའི་འདོད་འཇོའམ། གསེར་རྟའི་ཚུལ་ཁྲིམས་འོད་ཟེར་དུ་འབོད་པ་གང་དེས་བོད་རྒྱལ་ལོ་༢༡༣༢ བོད་རབ་གནས་ཤིང་བྱ་ལོའི་བོད་ཟླ་དྲུག་པ་སྟེ། ཆུ་སྟོད་ཟླ་བ་སྔ་མའི་ཚེས་༤་དང་། ཕྱི་ལོ་༢༠༠༥་ལོའི་ཟླ་༧་ཚེས་༡༠་ཉིན་བྲིས་པ་དགེའོ། །སརྦ་མངྒ་ལཾ། །
