མེ་ལྕེ།
ལོ་འདི་ཚོར་རང་རེའི་བོད་ཡུལ་དུ་འབུམ་རམས་པ་མང་པོ་བྱུང་ཡོད། འབུམ་རམས་པ་སྐོར་ཞིག་ནི་མི་རིགས་སློབ་ཆེན་དག་ནས་བྱུང་བ་ཡིན་ལ། ཡང་འབུམ་རམས་པ་སྐོར་ཞིག་ནི་རྒྱ་ནག་གི་མིང་དུ་གྲགས་པའི་སློབ་ཆེན་དག་ནས་བྱུང་བ་ཡིན། ད་དུང་འབུམ་རམས་པ་ལ་ཤས་ནི་ཕྱི་རྒྱལ་གྱི་གཙུག་ལག་སློབ་ཆེན་ནས་བྱུང་བ་དེ་འདྲ་ཡང་ཡོད། ཡུལ་ཕྱོགས་སོ་སོ་ན་འབུམ་རམས་པར་རྒྱུགས་འཕྲོད་པའམ་ཡང་ན་བདེ་བླག་ངང་སློབ་མཐར་ཕྱིན་པ་གང་ཡིན་ཡང་། གཉེན་ཉེ་དང་གྲོགས་པོ། དགེ་རྒན་དང་སློབ་གྲོགས། རྩོམ་གྲོགས་དང་མཛའ་གྲོགས་སོགས་ཀྱིས་བཀྲ་ཤིས་རྟེན་འབྲེལ་མཚོན་བྱེད་དུ“དགའ་བའི་གླུ་ལེན་པ་དང་སྐྱིད་པའི་བྲོ་འཁྲབ”ཀྱི་ཡོད། འབུམ་རམས་པ་དག་གིས་ཀྱང་གཉེན་ཉེ་དུ་དང་གྲོགས་མཛའ་བཤེས་རྣམས་ཀྱི་རེ་བ་སྟོང་ཟད་ལ་མི་འགྲོ་བའི་ཕྱིར། ཕྱག་ལ་གནའ་དཔེའམ་དེང་དཔེ་མང་པོ་བསྣམས་ཏེ་སློབ་གྲྭར་ཕེབས་འགྲོ་གི་ཡོད་ལ། སློབ་གྲྭ་ནས་ཕྱིར་འོང་དུས་ཀྱང་དཔེ་ཆ་གཏོས་ཆེ་བ་དང་དཔྱད་རྩོམ་སྤམ་མཐོ་བ་བསྣམས་ཏེ་ཐོན་གྱི་ཡོད། དངོས་གནས་འབུམ་རམས་པ་ཞེས་པའི་མིང་དེ་ནི་རང་ག་བའི་མཚན་བཏགས་ཤིག་དང་། ཡང་ན་འབུམ་རམས་པའི་ཞྭ་མོ་དེ་ནི་རང་ག་བའི་ཅོད་པན་ཞིག་ག་ལ་ཡིན་ཨང་།“འབུམ་རམས་པའི་ལུང་པ”རུ་བསྔགས་པའི་བདག་གི་ཕ་ཡུལ་དུ་འབུམ་རམས་པ་སུམ་ཅུར་ཉེ་བ་ཙམ་ལོངས་ཤིང་། འབུམ་རམས་པ་དེ་དག་ནི་སྟོད་མངའ་རིས་སྐོར་གསུམ་དང་། བར་དབུས་གཙང་རུ་བཞི་དང་། སྨད་མདོ་ཁམས་སྒང་དྲུག་ཏུ་གང་སར་ཁྱབ་འདུག་ལ། འབུམ་རམས་པ་ལ་ལས་རིག་གཞུང་གཉེར་གི་ཡོད་ལ། ལ་ལས་གསར་རྩོམ་གནང་གི་ཡོད། ཡང་འབུམ་རམས་པ་ཁ་ཤས་ཀྱིས་རིག་པའི་སློབ་བུ་སྐྱོང་གི་ཡོད་ལ། ཁ་ཤས་ཀྱིས་ཡི་གེའི་རྫི་བོ་གནང་གི་ཡོད། ཁོ་བོར་མཚོན་ན་རང་གི་ཕ་ཡུལ་ལུང་པ་རུ་འབུམ་རམས་པ་མང་བ་དང་། ཡོན་ཏན་པ་མོད་པ་འདི་སོ་སོའི་ཡུལ་ཕྱོགས་ཀྱི“ཨམ་ཅོག”དང་ལ་རྒྱ་ཞིག་ཏུ་མི་རྩི་རང་རྩི་ཡིན་ནོ། །
མི་རིགས་ཤིག་ལ་ཆ་མཚོན་ནས་བཤད་ནའང་འདྲ། ས་ཆ་ཞིག་ལ་ཆ་མཚོན་ནས་བཤད་ནའང་འདྲ། འབུམ་རམས་པ་ནི་ཇི་ལྟར་མང་ན་དེ་ལྟར་ལེགས་ཤིང་། འབུམ་རམས་པ་མང་ཚེ་ཡུལ་གང་དེའི་རྒྱན་དུ་འགྲོ་བས་མི་ཚད་ངོམ་སོར་འཕྱར་སྤྱད་ཅིག་ཀྱང་ཡིན་པ་ནི་སྨོས་ཅི་དགོས། དེ་ལྟ་ན་ཡང་། རང་ཅག་གི་འབུམ་རམས་པ་ཚོས་ཡུན་དང་ཁད་ཀྱིས་རང་གི་དེ་ཉིད་རྗེན་པར་སྟོན་པ་དང་། ཡང་ན“རྫོབ་རྟགས”དང“གྲུབ་རྟགས”སྣ་ཚོགས་ཤིག་བསྟན་འོང་སྐབས། ང་རང་ཚོའི“འབུམ་རམས་པ”རུ་འབོད་པ་དེ་དག་ལ་ཡིད་གཏིང་ནས་ཆད་ཅིང་སེམས་པ་རབ་ཏུ་སྐྱོ་བྱུང་།
ཉིན་འགའི་སྔོན་ལ། གྲོང་ཁྱེར་སྤོས་ལྡན་ནས་ཅོ་ནེ་ཡུམ་ཚེ་རིང་ལགས་ཀྱི<<བོད་ཀྱི་སྲོལ་རྒྱུན་རབ་རྟོག་བརྩམས་སྒྲུང་ལ་དཔྱད་པ་མདུད་རྒྱ་གྲོལ་བའི་གཏམ>>ཞེས་བྱ་བའི་དེབ་གསར་འགྲེམས་སྤེལ་དང་བགྲོ་གླེང་ཚོགས་འདུ་གཟབ་རྒྱས་ངང་བསྡུས་འདུག་པ་དང་། ཚོགས་འདུའི་ཐོག་ཕྱོགས་སོ་སོ་ནས་ཕེབས་པའི་སྐུ་མགྲོན་མང་པོ་ལྷན་གཅིག་ཏུ་འཛོམས་ཏེ། རྒྱ་ཡིག་གི་ལམ་ནས་བརྩམས་པའི་དཔེ་ཆ་དེར་མགྲིན་གཅིག་དབྱངས་གཅིག་གིས་བསྟོད་པ་བླ་ན་མེད་པ་བྱས་ཤིང་། བརྗོད་བྱ་རྒྱ་ཆེ་ཚུལ་དང་ནང་དོན་གཏིང་ཟབ་ཚུལ། བོད་ཀྱི་སྲོལ་རྒྱུན་རྩོམ་རིག་གི་དགེ་མཚན་འཛམ་གླིང་ལ་ངོམ་ཡོད་ཚུལ་དང་རིག་གཞུང་ཞིབ་འཇུག་གི་སྔོན་མེད་སྟོང་ཆ་ཞིག་བསྐངས་ཡོད་ཚུལ། རིན་ཐང་ཆེན་པོ་ལྡན་ཚུལ་དང་མིག་ལྟོས་ཡག་པོ་ཡིན་ཚུལ་སོགས་མདོར་ན་རྒྱ་ཡིག་གི་དེབ་དེ་བསྟད་བསྟད་ནས་རི་གསུམ་གྱི་རྩེར་བསྐྱོན་འདུག་ལ། སྤུར་སྤུར་ནས་ཨ་སྔོན་དགུང་དུ་བཏེགས་འདུག་གོ །
ཁྱད་པར་དུ་མཛད་སྒོའི་སྟེང་འབུམ་རམས་པ་མང་པོ་ཞིག“འབུམ་ཚོགས”བརྒྱབ་སྟེ། འབུམ་རམས་པ་ཅོ་ནེ་ཡུམ་ཚེ་རིང་ལགས་ཀྱི་རྒྱ་ཡིག་གི་དེབ་དེའི་ཆེ་བ་བརྗོད་པའི་དུས་མཚུངས་སུ། ཁོའི་རིག་གཞུང་ཉམས་ཞིབ་དང་རྩོམ་རིག་གསར་རྩོམ་དང་བོད་རྒྱ་ལོ་ཙཱ་བཅས་ཀྱི་གྲུབ་འབྲས་ལ་ཡིན་འཇོག་གམ་དཔྱད་འཇོག་གནང་འདུག་ལ། ཐ་ན་ཅོ་ནེ་ཡུམ་ཚེ་རིང་དང་ཅོ་ནེ་ཡུམ་ཚེ་རིང་ལྟ་བུ་ནི་ང་རང་ཚོའི་མིག་དཔེ་བཟང་པོ་ཡིན་ནོ་ཞེས་ཀྱང་ཐལ་འདུག་པ་རེད། ཕ་སྐད་མ་ཡིག་ཉག་ཕྲ་བ་དང་དབྱངས་གསལ་སོ་བཞི་ཉམ་ཐག་པའི་སྐབས་འདི་འདྲ་ཞིག་ལ་ཡང་། རང་ཅག་གི་འབུམ་རམས་པ་ཚོས་རྒྱ་ཡིག་གི་ལམ་ནས་བརྩམས་པའི་དཔེ་ཆ་ཞིག་ལ་ཆེ་བསྟོད་དང་། བོད་རྩོམ་མང་པོ་རྒྱ་ཡིག་ལ་བསྒྱུར་མཁན་གྱི་ལོ་ཙཱ་བ་ཞིག་ལ“གསེར་རྩི”བྱུགས་པ་ནི་མ་གཞི་ནས་ཕྱིན་ཅི་ལོག་གི་ལས་ཤིག་ཡིན་ཞིང་། ནང་སྒོས་སུ་ཕྱི་རབས་པ་དག་ལ་མཚོན་ན་ཆེ་བརྗོད་དང་འུར་བསྟོད་དེ་དག་ནི། ངན་པ་རྣམས་ལ་བརྟེན་བྱས་ན། །ངན་པའི་ཤན་གྱིས་རང་ལ་གནོད། །ཡུར་བའི་ཆུ་ལ་བརྟེན་པ་ཡི། །ཉ་རྣམས་ཞིང་ལ་འགྲེམས་ལ་ལྟོས། །ཞེས་པའི་དཔེ་རུ་ཡང་འགྲོ་ཉེན་ཆེའོ། །
ཡང་གཅིག་བཤད་ན། མཁས་དབང་དགེ་འདུན་ཆོས་འཕེལ་གྱི་ཞལ་ནས། “འུ་ཅག་རང་ལ་སྐད་དང་ཡི་གེ་ཡོད་བཞིན་དུ་རྒྱ་སྐད་ཙམ་དུ་རྩོམ་བྱེད་དགོས་པའི་དོ་གལ་ཅི་ཞིག་མགོ་ལ་འབབ། དྲང་པོར་སྨྲས་ན་གཞན་ཕར་ཞོག འདར་ལོས་དཔག་བསམ་འཁྲི་ཤིང་གི་ཆད་གསབ་ཏུ་བྲིས་པ་དེ་དག་ཀྱང་རྒྱ་གར་པས་ཀློག་ཐུབ་པ་གཅིག་ཀྱང་མེད”ཅེས་གསུངས་པ་དེ་ཡང་ཁ་སང་དེ་རིང་གི་འབུམ་རམས་པ་ཚོ་ལ་སྦྱར་ན་རྣག་ཐོག་གཙག་འཁེལ་ཞིག་ཅི་ལ་མིན།
ལར་འབུམ་རམས་པ་དག་ལ་ཡོན་ཏན་ཡོད་ན་སོ་སོས་སྐད་ཡིག་གཞན་གྱི་ལམ་ནས་དེབ་བརྩམས་མི་ཆོག་པ་དང་། རྩོམ་བྲིས་མི་ཆོག་པ་དང་། ལོ་ཙཱ་བྱས་མི་ཆོག་པ་ཞིག་གཏན་ནས་མ་ཡིན་ན་ཡང་། ང་རང་ཚོས་ཅི་ནས་ཀྱང་སེམས་སུ་ངེས་ཤིང་ཡིད་ལ་བརྣག་དགོས་པ་ཞིག་ནི། རང་ཉིད་ཆུང་དུས་ཐོག་མར་བོད་ཡིག་སློབ་གྲྭ་འགྲིམས་ཤིང་ཀ་ཁ་སུམ་ཅུ་སྦྱངས་ནས་འཚར་ལོངས་བྱུང་བ་འདི་ཉིད་དང་། དེའི་འཕྲོར་དབྱངས་གསལ་སོ་བཞིའི་བཀའ་དྲིན་ལ་བརྟེན་ནས་ང་རང་ཚོ་མི་གྲལ་དུ་ཚུད་པ་འདི་ཉིད་དོ། །
གཞན་ཡང་། ང་རང་ཚོའི་སྤྱི་ཚོགས་ལ་ག་ལེར་བལྟས་འོང་ན། ངག་ནས་བདག་གཞན་མཉམ་བརྗེ་གླེང་སྟེ་ལྐོག་ནས་རང་དོན་སྦུག་འདྲེན་བྱེད་མཁན་ཡང“འབུམ་རམས་པ”ཚོ་རེད་ལ། ཁ་ནས་རིག་གནས་སྲུང་སྐྱོབ་བཤད་དེ་ལྐོག་ནས་ཕ་ནོར་ཕྱི་ལ་བཙོང་མཁན་ཡང“འབུམ་རམས་པ”ཚོ་རེད། མི་ལ་རས་པའི་སྙིང་རུས་གླེང་ཞོར་རང་ཉིད་རྒྱགས་པ་ཆགས་མཁན་ཡང་འབུམ་རམས་པའི་ནང་དུ་ཡོད་ལ། མི་གཞིའི་སྒེར་ཚུགས་བཤད་ཞོར་གཞན་གྱི་རྐུབ་གཡོག་རྒྱུག་མཁན་ཡང་འབུམ་རམས་པའི་ཁྲོད་ན་ཡོད།ད་དུང་། རང་ཅག་གི་འབུམ་རམས་པ་འདི་ཚོ་ཀྲབ་ཀྲབ་ཀྲབ་མི་ཐོན་ས་གཅིག་ཀྱང་མེད་ལ། རང་ཅག་གི་འབུམ་རམས་པ་འདི་ཚོ་ལྷབས་ལྷབས་ལྷབས་མི་རྒྱུགས་ས་གཅིག་ཀྱང་མེད། རང་ཅག་གི་འབུམ་རམས་པ་འདི་ཚོར་བྱ་དགའ་ཞིག་ཡིན་པ་ཙམ་གྱིས་ཆོག་སྟེ་མི་ལེན་པ་གཅིག་ཀྱང་མེད་ལ། རང་ཅག་གི་འབུམ་རམས་པ་འདི་ཚོར་འཆད་ས་ཞིག་ཡོད་པ་ཙམ་གྱིས་ཆོག་སྟེ་མི་བཤད་པ་གཅིག་ཀྱང་མེད་དོ། །རྩོམ་ཐུང་འདི་མཇུག་བསྡུ་ཁར་སྐུ་ཞབས་རང་གྲོལ་ལགས་ཀྱི་གསུང་ཞིག་ཡིད་ལ་ཡང་ཡང་འཁོར་བྱུང་། གསུང་ཤོ་ལོ་ཀ་འདི་ཀྲབ་ཀྲབ་ཀྲབ་བྱེད་པའི་འབུམ་རམས་པ་ཡོངས་ལ“ལེགས་སྐྱེས”ཤིག་གི་ཚུལ་དུ་འབུལ་གི་ཡིན་ཏེ། ཁོང་ཉིད་ན་རེ། ཨ་ཁུ་འབྲོང་གི་དབང་པོ་རྣམས། །གསེར་ལས་གྲུབ་ཅེས་བསྟོད་མཁས་པའི། །རི་བོང་བློ་ལྡན་འདི་དག་གི། །གཏམ་ལ་ཆ་འཇོག་ཅི་ཞིག་ཡོད། །ཅེས་སོ། །ཕྱི་ལོ༢༠༢༥ལོའི་ཟླ༡༠པའི་ཚེས༢༤ལ
ཡོང་ཁུངས་དཀར་མེ།
