༡༽ ༸གོང་ས་མཆོག་དང་གནས་ཆུང་ཆོས་སྐྱོང་བར་གྱི་འབྲེལ་བའི་སྐོར།
སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་ཡིད་བཞིན་ནོར་བུ་སྐུ་འཕྲེང་བཅུ་བཞི་པ་ཆེན་པོ་མཆོག་ཁོང་རང་ཉིད་ཀྱི་ཞལ་ནས། “གནམ་འདིའི་འོག་ན་གནས་ཆུང་རྡོ་རྗེ་དྲགས་ལྡན་ལ་རྒྱུས་མངའ་ཆེ་ཤོས་དེ་ཕལ་ཆེར་ང་ཡིན་གྱི་རེད། དེ་བཞིན་ངའི་གནས་ཚུལ་ཆ་ཚང་ཤེས་མཁན་དེ་ཕལ་ཆེར་གནས་ཆུང་རྡོ་རྗེ་དྲེགས་ལྡན་ཡིན་གྱི་རེད། དེ་འདྲ་ཞིག་རེད། ཐུན་མོང་མ་ཡིན་པའི་འབྲེལ་བ་ཡོད་བསྡད་པ་ཞིག་ཆགས་བསྡད་ཡོད། དེ་འདྲ་ཡིན་དུས། གནས་ཆུང་ལ་རྒྱུས་མངའ་ང་ཆེན་པོ་རེད། ང་ལོ་ལྔ་དྲུག་ནས་བཟུང་དུས་ད་ལྟ་བར་སྐུ་བསྟེན་བརྗེས་འགྲོ་གིན་ཡོད་རེད། རེད་དེ། ཡེ་ཤེས་པ་དེ་ཏག་ཏག་ཅིག་ཡོད་བསྡད་པ་ཞིག་རེད་བཞག” ཅེས་སོགས་ཡང་ནས་ཡང་དུ་ལན་མང་གསུང་བཞིན་པ་འདི་ཡིན་པས། འདི་ལས་ལྷག་པའི་བཀའ་ཚད་མ་ཞིག་སུ་ལའང་ཡོད་མི་སྲིད་དོ། །
༢༽ གནས་ཆུང་ཆོས་སྐྱོང་ཆེན་པོ་དང་། བོད་གངས་ཅན་བར་གྱི་འབྲེལ་ལམ།
ཕྱི་ལོའི་དུས་རབས་༨་པའི་ནང་བོད་གངས་ཅན་དུ་མཁན་སློབ་ཆོས་གསུམ་ཞལ་འཛོམས་ཏེ། བོད་ཀྱི་དགོན་པའི་ཐོག་མ་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ངམ། བསམ་ཡས་དགོན་པ་གསར་བཞེངས་ལེགས་གྲུབ་ཀྱིས་བསམ་ཡས་དགོན་པའི་སྲུང་མ་ལ་གནས་ཆུང་ཆོས་སྐྱོང་ཆེན་པོ་བཀའ་བགོས་གཉེར་གཏད་གནང་རབས་ནི་ཡོངས་གྲགས་ཡིན།
དེ་བཞིན་བོད་མི་རིགས་ཀྱི་བླ་མ་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་ཆེན་པོ་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་ཡིད་བཞིན་ནོར་བུ་མཆོག་གིས་ལྗགས་རྩོམ་གནང་བའི་གནས་ཆུང་ཆོས་སྐྱོང་ཆེན་པོའི་འཕྲིན་བཅོལ་དུའང།
༄༅། །བདེ་གཤེགས་རིགས་ལྔའི་ཡེ་ཤེས་སྒྱུ་འཕྲུལ་གར། །བོད་ཁམས་སྐྱོང་མཛད་བསྟན་སྲུང་དྲེགས་པའི་གཙོ། །འཕྲིན་ལས་རྒྱལ་པོ་སྤྲུལ་ཡུམ་བློན་པོར་བཅས། །བདག་ཅག་གདུང་བའི་དབྱངས་ཀྱིས་ཉེར་བསྐུལ་ན། །སྔོན་ཚེ་རྒྱལ་དབང་པདྨ་ཀཱ་ར་དང་། །པད་དཀར་འཆང་བ་རིམ་པས་བཀའ་བསྒོས་ཤིང་། །འདའ་དཀའི་དམ་ཚིག་གཉན་པོ་རབ་བསྒྲགས་པ། །མ་གཡེལ་མ་གཡེལ་རྡོ་རྗེའི་དམ་ཚིག་དགོངས། །བདག་ཅག་རྨོངས་དང་ཆགས་སྡང་ཕྱོགས་ལྷུང་གིས། །ལས་འབྲས་མ་བསྲུངས་སྤྱི་དོན་རས་སུ་བོར། །དམ་ཚིག་འགལ་སོགས་བསམ་སྦྱོར་ནོངས་པ་ཀུན། །སྙིང་ནས་འཆགས་ཤིང་སྡོམ་ན་བཟོད་མཛོད་ལ། །བསྟན་དང་བསྟན་འཛིན་སྐྱེ་འགྲོའི་བདེ་སྐྱིད་དང་། །བསྟན་འཛིན་རྒྱ་མཚོའི་སྐུ་ཚེ་མཛད་འཕྲིན་སྤེལ། །གངས་ལྗོངས་རྒུད་པའི་ཉེར་འཚེ་མྱུར་ཞི་ནས། །ཆོས་སྲིད་རང་དབང་དགའ་སྟོན་སྒྲུབས་ཤིག་ཀྱེ། །མདོན་ན་བསྟན་སྲུང་ཐུ་བོ་ཁྱོད་ཉིད་ལ། །སྙིང་ནས་བསྐུལ་ཞིང་འདོད་དོན་གཉེར་གཏོད་ན། །གློག་ལྟར་མྱུར་བའི་རྣམ་བཞིའི་འཕྲིན་ལས་ཀྱིས། །བསམ་པའི་རེ་བ་སྒྲུབ་ལ་མ་གཡེལ་ཞིག།།ཅེས་གསུངས་འདུག་པ་འདི་ཡིན་པས། གཟུར་གནས་དམ་ལྡན་ཡོངས་ཀྱི་ཐུགས་ལ་མངའ་དགོས་པ་གལ་ཤིན་ཏུ་ཆེ།
༣༽ གནས་ཆུང་ཆོས་སྐྱོང་ཆེན་པོ་དང་འབྲས་སྤུངས་དགོན་པ་བར་གྱི་འབྲེལ་ལམ།
རྗེ་ཙོང་ཁ་པ་ཆེན་པོའི་དངོས་སློབ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་ཆེན་པོས་ཕྱི་ལོ་༡༦༡༦་ལོར་གདན་ས་ཆེན་པོ་དཔལ་ལྡན་འབྲས་སྤུངས་ཐོག་མར་ཕྱག་འདེབས་སྐབས་འབྲས་སྤུངས་དགོན་པའི་སྲུང་མ་གཙོ་བོ་ལ་གནས་ཆུང་ཆོས་སྐྱོང་ཆེན་པོ་བཀའ་བསྒོས་གཉེར་གཏད་གནང་ཡོད་པ་དེ་ལ་བརྟེན་ནས། ད་བར་གནས་ཆུང་དང་གདན་ས་འབྲས་སྤུངས་བར་གྱི་འབྲེལ་བ་དེ་མུ་མཐུད་གནས་ཡོད་པར་མ་ཟད། འབྲས་སྤུངས་དགོན་པའི་དགོན་ལག་ཕལ་ཆེ་བ་གནས་ཆུང་དང་འབྲེལ་བ་ཡོད་པ་རེད།
༤༽ ཆོས་སྐྱོང་ཆེན་པོ་སྤྱན་འདྲེན་དང་། གནས་ཆུང་གི་གལ་ཆེའི་བཀའ་ལུང་།
གོང་གསལ་ལྷ་སྲུང་དང་དགོན་པའི་བར་གྱི་འབྲེལ་ལམ་དེ་ཚོ་གཞིར་བཞག་གིས་༢༠༢༥་ཕྱི་ཟླ་༡༢་པའི་ཚེས་༢༧་གྱི་ཞོགས་པའི་ཆུ་ཚོད་༧་དང་ཕྱེད་ཙམ་ལ་འབྲས་སྤུངས་བླ་སྤྱིས་འབྲས་སྤུངས་ཚོགས་ཆེན་དུ་གནས་ཆུང་ཆོས་སྐྱོང་ཆེན་པོ་སྤྱན་འདྲེན་ཞུས་ཏེ། དམ་གཙང་སེར་སྐྱ་མི་མང་ཕོན་ཆེན་པོས་འཚང་ཁ་ཤིག་ཤིག་གིས་མཇལ་ཁ་ཞུས་པ་དང་། སྐབས་དེར་གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་སྐྱོང་ཆེན་པོས་དུས་ཐོག་ཆར་བ་ལྟ་བུའི་བཀའ་ལུང་བསམ་གྱིས་མི་ཁྱབ་པ་ཞིག་ཕེབས་ཡོད་པ་རེད། དེ་ཡང་གནས་ཆུང་ཆོས་སྐྱོང་ཆེན་པོའི་བཀའ་ལུང་དེའི་ནང་། “རང་ཅག་རི་བོ་དགེ་ལུགས་པའི་མགྲིན་ཚབ་མིང་ཅན་རེ་པ་གཉིས་ནས་འབྱུང་པོས་རྒྱུད་བསྐུལ་ཏེ་ངག་བློ་ཐལ་ཏེ་གང་བྱུང་བྱ་ངན་དང་། ངོས་ཀྱི་སློབ་དཔོན་མཐོང་བ་དོན་ལྡན་མཆོག་ལ་མཚན་སྨད་ཞུ་བ་དང་། ཁ་བའི་ལྗོངས་ཀྱི་སྤྱི་དོན་བོར་ཏེ་ཆོལ་ཁ་ཆོས་ལུགས་འཐེན་འཁྱེར་བགྱིད་པ་འདི་ནི་སྐྱེ་བོ་ཀུན་གྱི་མིག་གི་མཐོང་བ་དེ་ཡིན་ལ། དེས་མཚོན་པས་དགྲ་བཅོམ་འཕགས་པའི་དགེ་འདུན་རྣམས་ལ་ཡང་མཚན་སྨད་ཞུ་བའི་དུས་ལ་བབས་པས་ན་འགན་འཁུར་བ་རྣམས་པས་མཚམས་འཇོག་ལེགས་པར་བགྱིད་ན་ལེགས་སོ། །” ཞེས་སོགས་བཀའ་ལུང་ནན་པོ་ཕེབས་པ་འདི་རེད།
༥༽ ད་ལྟའི་གནས་ཆུང་གི་བཀའ་ལུང་འདི་ནི་བོད་གངས་ཅན་གྱི་བསྟན་པ་བསྟན་འཛིན་ཡོངས་རྫོགས་སྐྱོབ་བྱེད་ཀྱི་དུས་ཐོག་ཆར་བ་ལྟ་བུ་ཡིན་ཚུལ།
དེ་ཡང་འདས་པའི་སྤྱི་འཐུས་སྐབས་རེ་ཟུང་དང་། ལྷག་ཏུ་ད་ལྟའི་སྐབས་༡༧་པའི་སྤྱི་འཐུས་གྲོས་ཚོགས་ནང་ས་དགེ་བཀའ་རྙིང་བོན་བཅས་ཀྱི་སྐུ་ཚབ་བམ། ཆོས་བརྒྱུད་སོ་སོའི་སྤྱི་འཐུས་༡༠་ཡོད་པ་དེ་དག་གི་ཕྱིའི་ལུས་ངག་གི་ཀུན་སྤྱོད་ནི་ཁྱིམ་པ་སུན་འབྱིན་ནམ། དད་ལྡན་མང་ཚོགས་དད་ལོག་སྐྱེད་བྱེད་ཀྱི་ཆེས་ཐ་ཆད་འཇིགས་སུ་རུང་བར་གྱུར་ཏེ། བསྟན་བཤིག་གི་རྒྱལ་པོ་ང་ལས་ལྷག་འབྱུང་མི་སྲིད། ཅེས་མདུན་ལ་ཐོན་པ་ལོས་ཡིན། སྙམ་པ་དེ་དག་གི་ད་བར་གྱི་བྱ་སྤྱོད་ངན་པ་དེ་དག་ལ་བརྟེན་ནས། ད་ལྟ་གཟུར་གནས་དད་ལྡན་རྒྱ་ཆེའི་མང་ཚོགས་སྤྱི་ཡོངས་ཀྱིས་ངོ་ལོག་དང་མཆིལ་ཞགས་འཕེན་ས་ཞིག་ཏུ་གྱུར།
དེ་ཡང་རྒྱ་ཆེའི་མང་ཚོགས་ལ་ཁག་མེད། ད་བར་རང་རེ་ཚང་མས་མཐོང་ས་རུ། གྲོས་ཚོགས་ནང་གི་གླང་དམར་དུ་གྲགས་པ་དེ་དག་གིས། ༸གོང་ས་མཆོག་དང་། གཞུང་བསྟེན་ལྷ་སྲུང་ཁག་ལ་སྒྲོ་སྐུར་མཚན་སྨད་ཅི་ཙམ་ཞུས་སོང་ངམ།
དེ་བཞིན་ཨ་རིས་གཞུང་གསར་བས་སྔ་ལོར་གསར་ཁང་གཉིས་སྒོ་རྒྱག་སྐབས། ཐོག་དང་པོ་དགའ་བསུ་ཞུ་མཁན་དེ་སྤྱི་འཐུས་གྲོས་ཚོགས་ནང་དགེ་ལུགས་པའི་གླང་དམར་སྤྱི་འཐུས་གཉིས་ཡིན་ལ། དེ་མ་ཐག་རྒྱ་དམར་སྲིད་གཞུང་གིས་ཀྱང་གླང་དམར་གཉིས་དང་གཅིག་མཚུངས་གསར་ཁང་གཉིས་སྒོ་བརྒྱབ་པར་དགའ་བསུ་ཞུས་པ་ལྟ་བུ་རེད།
དངོས་གནས་བྱས་ན། གསར་ཁང་དེ་གཉིས་ཀྱང་༸གོང་ས་མཆོག་གི་མཛད་རྗེས་ཁོ་ན་ཡིན་མོད། མཐའ་མ་དེ་དག་སྒོ་རྒྱག་སྐབས་གླང་དམར་འདི་ཚོས་འདི་ལྟར་དགའ་བསུ་ཞུ་དགོས་དོན་གང་ཡིན་ནམ།
རྒྱུ་མཚན་དེ་དག་ལ་བརྟེན། ད་ལྟ་རྒྱ་ཆེའི་མང་ཚོགས་སྤྱི་ཡོངས་ཀྱིས། གྲོས་ཚོགས་ནང་གི་གླང་དམར་ཞེས་དང་། འདི་འདྲའི་ཆོས་བརྒྱུད་སྤྱི་འཐུས་ཞབས་འདྲེན་རྐྱང་རྐྱང་ག་རེ་ཡིན་ནམ། ཞེས་ཤོད་བཞིན་པར་མ་ཟད། ཆོས་བརྒྱུད་སྤྱི་འཐུས་སོ་སོའི་འབྱུང་ཁུངས་དགོན་སྡེ་གྲྭ་ཚང་ཁག་གིས་གཙོས་བསྟན་པ་བསྟན་འཛིན་སྤྱི་ལ་མང་ཚོགས་དད་པ་ལོག་བཞིན་པའི་སྐབས་འདིར། གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་སྐྱོང་ཆེན་པོས་བཀའ་ལུང་འདི་འདྲ་ཞིག་བསྩལ་གནང་བ་ནི་སེར་སྐྱ་བར་གྱི་དད་པ་དམ་ཚིག་དང་། བསྟན་པ་བསྟན་འཛིན་བཅས་ཀྱི་ཆེ་མཐོང་གཟི་བརྗིད་སོགས་དང་། དེ་བཞིན་དད་ལྡན་མི་མང་གི་དད་པ་དམ་ཚིག་སྲུང་སྐྱོབ་བྱེད་པའི་དུས་ཐོག་ཆར་བ་རང་རེད། དངོས་གནས་བསམ་བློ་ཡག་པོ་ཞིག་བཏང་ན། བསྟན་པ་བསྟན་འཛིན་བཅས་ལ་རྒྱ་ཆེའི་མང་ཚོགས་ཀྱི་དད་པ་དང་ཡིད་ཆེས་རླག་བཞིན་པའི་ཉེན་ཚབས་ཆེན་པོ་འདི་འདྲའི་སྐབས། ཆོས་སྐྱོང་སྲུང་མས་ཀྱང་དུས་ཐོག་ཆར་བ་ལྟ་བུའི་བཀའ་ལུང་འདི་འདྲ་ཕེབས་པ་ནི་ཤིན་ཏུ་ངོ་མཚར་ཆེའོ། །
༦༽ ད་སྔོན་གནས་ཆུང་གིས་འབྲས་སྤུངས་དགོན་པ་བསྐྱབས་རབས་སོགས་ངོ་སྤྲོད།
སྤྱིར་ན་གནས་ཆུང་ཆོས་སྐྱོང་ཆེན་པོས་གདན་ས་འབྲས་སྤུངས་ད་བར་ཉེན་ཚབས་གང་མང་ནས་བསྐྱབས་གནང་ཡོད་པ་ལྟར། ད་ལྟའི་བཀའ་ལུང་འདི་ནི། འབྲས་སྤུངས་དགོན་པ་ཙམ་དུ་མ་ཟད་ས་དགེ་བཀའ་རྙིང་གཡུང་དྲུང་བོན་བཅས་ཀྱི་བསྟན་པ་བསྟན་འཛིན་བཅས་སྐྱོབ་བྱེད་ཀྱི་ཆེས་གལ་ཆེ་བའི་བཀའ་ལུང་ཡང་དག་པ་ཞིག་རེད།
ཀ༽ འོ་ན་གནས་ཆུང་ཆོས་སྐྱོང་ཆེན་པོས་གདན་ས་འབྲས་སྤུངས་བསྐྱབས་པའི་སྐོར་ཁྱོད་ལ་དཔང་རྟགས་ཅི་ཞིག་ཡོད་དམ། ཟེར་ན། གནས་ཆུང་ཆོས་སྐྱོང་ཆེན་པོས་གདན་ས་འབྲས་སྤུངས་བསྐྱབས་རབས་ཁུངས་ལྡན་དངོས་བྱུང་ལོ་རྒྱུས་ཚད་མ་ཤིན་ཏུ་མང་ཡང་། འདིར་གཅིག་ཤེས་ཀུན་གྲོལ་གྱི་དཔེ་ལྟར། གལ་ཆེའི་དངོས་བྱུང་ལོ་རྒྱུས་རྐང་གཅིག་ཁོ་ནས་འདིར་དེའི་སྐོར་ར་སྤྲོད་ཞུས་ན་འདི་ལྟར། ཕྱི་ལོ་༡༩༣༠་ལོ་ཙམ་ལ་སྐྱབས་རྗེ་ཕ་བོང་ཁ་པས་ལམ་རིམ་གསུང་ཆོས་དང་འབྲེལ་དོལ་རྒྱལ་དགེ་ལུགས་པའི་ཐུན་མོང་མ་ཡིན་པའི་སྲུང་མ་ཡིན་སྐོར་སོགས་དོལ་རྒྱལ་ལ་ཧ་ལས་པའི་ཆེ་བསྟོད་འདྲ་མིན་དང་བཅས་ཏེ། གདན་ས་ཆེན་པོ་འབྲས་སྤུངས་སུ་དོལ་རྒྱལ་དར་སྤེལ་ཤུགས་ཆེར་བཏང་བས། དེའི་སྔོན་འབྲས་སྤུངས་སུ་བྱུང་མ་མྱོང་བ་ཞིག་ལ་དོལ་རྒྱལ་བསྟེན་གསོལ་བྱེད་མཁན་སྤྱི་སྒེར་ཧ་ཅང་ཇེ་མང་ནས་ཇེ་མང་དུ་འགྲོ་བཞིན་པའི་སྐབས་དེར། འབྲས་སྤུངས་དགོན་པའི་སྲུང་མ་གཙོ་བོ་གནས་ཆུང་ཆོས་སྐྱོང་ཆེན་པོས། སྐབས་དེའི་འབྲས་སྤུངས་བླ་སྤྱིར་བཀའ་ལུང་ནན་པོ་ཕེབས་ཏེ། དགོན་པ་འདིའི་ནང་དོལ་རྒྱལ་དར་སྤེལ་བཏང་བ་དེས། བསྟན་པ་སྔ་བསྣུར་དུ་བཏང་ཚུལ་སོགས་ཕེབས་པར་མ་ཟད། ལྷ་མིའི་རྣམ་འདྲེན་༸གོང་ས་བཅུ་གསུམ་པ་ཆེན་པོའི་སྐུ་མདུན་དུ་ནན་ཏན་གྱིས་ཞུས་པར་བརྟེན། ༸གོང་ས་བཅུ་གསུམ་པ་ཆེན་པོ་དགོངས་འཁྲུག་ཚད་མེད་དང་བཅས། རྩེ་མཁན་མགྲོན་ཆེན་མོ་བརྒྱུད་ཕ་བོང་ཁ་པར་དེའི་སྐོར་བཀའ་རྩད་ཤུགས་དྲག་གཅིག་མིན་གཉིས་མིན་གྱིས་རིམ་བཞིན་ཕེབས་པར་བརྟེན། དེ་དག་ལ་ལན་རེ་རེ་བཞིན་ཕ་བོང་ཁ་པས་རྩེ་མཁན་མགྲོན་ཆེན་མོ་བརྒྱུད་དེ། ༸གོང་ས་བཅུ་གསུམ་པ་ཆེན་པོའི་སྐུ་མདུན་དུ་ཕུལ་ཡོད་འདུག་པ་དང་། མཐར་༸གོང་ས་བཅུ་གསུམ་པ་ཆེན་པོས་གནས་ཆུང་ཆོསསྐྱོང་ཆེན་པོས་འབྲས་སྤུངས་བླ་སྤྱིར་བཀའ་ལུང་ཕེབས་སྐོར་དང་། དམིགས་བསལ་དོལ་རྒྱལ་སྐོར་འགྲེལ་བཤད་གསལ་པོ་དགོས་སྐོར་བཀའ་རྩད་ཤུགས་དྲག་ཕེབས་པའི་ལན་དུ། ༸གོང་ས་བཅུ་གསུམ་པ་ཆེན་པོའི་སྐུ་མདུན་དུ་ཕ་བོང་ཁ་པས། དོལ་རྒྱལ་ཁོང་གི་མ་རྒན་གྱི་སྐྱེས་ལྷ་ཡིན་ཚུལ་དང་། ད་བར་བསྟེན་གསོལ་སོགས་བྱས་ཀྱང་། ཕྱིན་ཆད་བསྟེན་གསོལ་དར་སྤེལ་མི་གནང་རྒྱུ་སྔ་འགྱོད་ཕྱིས་སྡོམ་གྱི་སྒོ་ནས་ཁས་ལེན་དམ་འབུལ་གཙང་མ་ཞུས་པར་བརྟེན། སྐབས་དེར་གནས་ཆུང་ཆོས་སྐྱོང་ཆེན་པོས་གདན་ས་ཆེན་པོ་འབྲས་སྤུངས་དམ་སྲི་དོལ་རྒྱལ་བསྟེན་གསོལ་སོགས་ཀྱི་ཉེན་ཚབས་ལས་བསྐྱབས་གནང་བ་འདི་ཡིན་ནོ། །
དེའི་སྐོར་སྐྱབས་རྗེ་ཕ་བོང་ཁ་པའི་རྣམ་ཐར་ལྷ་སའི་ཤིང་པར་ཤོག་གྲངས་༤༧༡་པའི་མདུན་ངོས་ཐིག་འཕྲེང་༢་ན། “ཡང་དེའི་རྗེས་དེ་མ་ཐག་ཏུ་བྱུང་བ་ནི། གུས་འབངས་ཕ་བོང་ཁའི་སྐྱེ་མིང་པ་ནས་ཞུ་བ། རྩེ་མཁན་མགྲོན་ཆེན་མོ་བརྒྱུད་བཀའ་སྤྱི་ཕེབས་དགོངས་དོན། སྔ་ལོ་ཟླ་བ་བཅུ་གཉིས་པའི་ཚེས་ཉེར་གཉིས་ཉིན་ཞུ་ཤོག་ཕུལ་སོན་བཞིན། དེར་གསལ་རེ་རེ་བཞིན་ཚིག་གི་བརྡ་སྤྲོད་བཀའ་དྲིན་ཆེ་བས་གུས་འབངས་རང་ནོངས་པ་ཁོ་ན་ལས། ཞུ་འོས་ཆ་ཙམ་མ་མཆིས་པས་ཕྱིན་ཆད་བཀའ་དོན་ནམ་ཡང་ལྷོད་མེད་སྙིང་དབུས་སུ་བཅངས་ཆོག་པ། ད་ཕན་ཞུ་འཛོལ་ཅི་མཆིས་ལྷ་དགོངས་གསལ་དྭངས་ཞེས་འཁོད་དོན། ད་ལམ་སྨོས་པའི་དོན་ཚན་གསུམ་སྐོར་ད་དུང་ལུང་རིག་གི་རྩོད་པ་ཇི་སྙེད་ཅིག་མཆིས་ཀྱང༌། རེ་ཞིག་དེ་ཙམ་དང༌། སྔོན་དུ་སྐྱབས་འགྲོར་བརྩོན་ཁུལ་ཞེས་པ་ཁྱེད་རང་ནས་གཙོ་བོ་སྲུང་མ་ཤུགས་ལྡན་བསྟེན་གསོལ་དང༌། སྔ་ལོ་སོགས་སུ་ཆོས་སྡེ་འབྲས་སྤུངས་སུ་ལམ་རིམ་གྱི་འཁྲིད་བཤད་དང་འབྲེལ་བའི་སློབ་མ་རྣམས་ཤུགས་ལྡན་བསྟེན་གསོལ་ཤས་ཆེར་དར་བས་སྔར་ནས་ཐོག་མའི་ཕྱག་འདེབས་པ་པོ་འཇམ་དབྱངས་ཆོས་རྗེ་ནས་དགོན་གནས་དེའི་སྲུང་སྐྱོབ་བཀའ་བསྒོས་གཉེར་དུ་གཏད་པ་གནས་ཆུང་ཆོས་རྒྱལ་ཆེན་པོ་ནས་འབྲས་སྤུངས་བླ་སྤྱིར། བསྟན་པ་སྔ་བསྣུར་དུ་བཏང་ཚུལ་དགོངས་འགལ་སྔ་ཕྱིར་འབྱུང་རྩ་དེར་ཐུག་པ་དང༌། ལྷག་པར་འཇིག་རྟེན་དྲེགས་པར་ཚེ་འདིའི་གྲོགས་སུ་བཅོལ་བས་སྐྱབས་འགྲོའི་བསླབ་བྱ་དང་འགལ་བར་མཐོང་བས་མ་རིག་རྨོངས་པས་སྒྲིབ་ནོངས་ལས་ཤེས་བཞིན་དཀར་མིན་གྱི་ལམ་དུ་རང་ཉིད་ཞུགས་ཤིང༌། གཞན་སྦྱོར་བ་སྙིང་ཁོང་ནས་མིན་ལུགས་འཁོད་པ་དང་ནང་འགལ་དུ་མངོན་པས་ཇི་ཡིན་ཞུ་ལན་འབུལ་དགོས་སྤྱི་ཕེབས་བྱུང་ལགས་ན། གུས་འབངས་པའི་མ་རྒན་དེ་ཉིད་ནས་ཤུགས་ལྡན་སྐྱེས་མའི་བརྒྱུད་ཀྱི་ལྷ་ཡིན་ཚུལ་གྱིས་ད་བར་བསྟེན་གསོལ་བྱ་དགོས་བྱུང་ཡང༌། ཕྱིན་ཆད་རང་ནོངས་ལ་འགྱོད་སྡོམ་དྲག་པོས་བསྟེན་གསོལ་བསྐང་འཕྲིན་ནམ་ཡང་མི་ཞུ་བ་ཞེ་དམ་ཤུགས་དྲག་སྙིང་དབུས་སུ་གུས་བཅངས་ཞུས་ཆོག་པ། གནས་ཆུང་ཆོས་རྒྱལ་ཆེན་པོ་དགོངས་འཁྲུག་གི་གཞི་རྩར་གྱུར་པ་དང༌། སྐྱབས་འགྲོའི་བསླབ་བྱ་དང་ནང་འགལ་བྱུང་བ་སོགས་དེང་ཕན་ཞུ་འཛོལ་ཅི་མཆིས་དམན་ལ་ལྷག་པར་བརྩེ་བའི་མགོན་པོ་མཆོག་ནས་བརྩེ་ཆེན་བྱམས་གཟིགས་ཀྱིས་ལྷ་དགོངས་གསལ་དྭངས་བརྩེ་བས་གཟིགས་པ་མཁྱཻེན། མཁྱཻན། མཁྱཻེན། ཞེས་གསོལ་བ་འདེབས་རྟེན་ལྷ་རེག་ཨ་ཤེ་དང༌། རྟེན་དོད་དངུལ་སྲང་ལྔ་བཅས་གུས་པ་ཆེན་པོས་ཕུལ།” ཞེས་སོགས་གསལ་འདུག་པ་འདི་ཡིན་ལ། གལ་ཏེ་སྐབས་དེར་ཡང་གནས་ཆུང་ཆོས་སྐྱོང་ཆེན་པོས་གལ་ཆེའི་བཀའ་ལུང་འདི་འདྲ་ཞིག་བསྩལ་གནང་མེད་ན། ད་ལྟ་གདན་ས་ཆེན་པོ་འབྲས་སྤུངས་དེ་དམ་སྲི་དོལ་རྒྱལ་བསྟེན་གསོལ་བྱེད་མཁན་ཞིག་ཏུ་གྱུར་ཡོད་པ་ཟུར་བལྟས་ལེབ་མཐོང་ཡིན་ནོ། །
ཁ༽ གཞན་ཡང་༸གོང་ས་མཆོག་དགུང་གྲངས་༡༤་ཡིན་སྐབས། ཕྱི་ལོ་༡༩༤༩་ལོར་གནས་ཆུང་གིས་བོད་གཞུང་བཀའ་ཤག་ལ་བཀའ་ལུང་ཕེབས་ཏེ། བོད་ཀྱི་རྒྱལ་སྲིད་ཆོས་སྲིད་ཀྱི་འགན་དབང་ཡོངས་རྫོགས་༸གོང་ས་མཆོག་ལ་འབུལ་རྒྱུའི་དུས་ལ་སླེབས་ཡོད། ཅེས་གསུངས་ཡོད་ཀྱང་། སྐབས་དེའི་འབྲེལ་ཆགས་བཀའ་བློན་སོགས་ཀྱིས་རྒྱལ་ཚབ་སྟག་བྲག་ལ་ཞུ་མ་ཕོད་པར། གནས་ཆུང་གི་བཀའ་ལུང་དེ་མུར་སྣང་མེད་བཏང་བ་དང་། ཕྱི་ལོ་༡༩༥༠་ལོའི་ཟླ་༡༠་པའི་ནང་རྒྱ་དམར་སྒེར་གཅོད་སྲིད་གཞུང་གི་དམག་མི་ཁྲི་ཕྲག་ཁ་ཤས་ཁམས་ཕྱོགས་བརྒྱུད་བོད་ཀྱི་གྲོང་ཁྱེར་གཉིས་པ་ཆབ་མདོར་བཙན་འཛུལ་བྱུང་སྐབས། བོད་གཞུང་བཀའ་ཤག་སོགས་ཀྱིས་ད་ཇི་ལྟར་བྱས་ན་ལེགས་སམ། ཞེས་གནས་ཆུང་ཆོས་སྐྱོང་ཆེན་པོར་བཀའ་ལུང་ཞུས་སྐབས། གནས་ཆུང་གིས་ཇི་ལྟར་བྱེད་དགོས་མིན་སྔོན་ནས་ཞུས་ཟིན་པ་ཡིན་ཏོ། །ཞེས་ལྷ་ཕྱིར་དྭངས་སོང་བར་ཤེས་སམ། གལ་ཏེ་དེའི་སྔོན་༡༩༤༩་ལོར་གནས་ཆུང་ཆོས་སྐྱོང་ཆེན་པོས་བཀའ་ལུང་ཕེབས་པ་ལྟར། ༸གོང་ས་མཆོག་ལ་བོད་ཀྱི་ཆོས་སྲིད་ལུགས་གཉིས་ཀྱི་འགན་དབང་ཕུལ་ཡོད་ཚེ། སྐབས་དེར་སྐུའི་གཅེན་པོ་སྐུ་ངོ་ས་དབང་ཆེན་མོ་ལྷ་སྲས་རྒྱལ་ལོ་དོན་གྲུབ་ཁོང་རྒྱ་གར་ཀ་ལི་ཀ་ཏར་བཞུགས་ཡོད་པ་དང་། རྒྱ་གར་གཞུང་དང་། ཨ་རིའི་གཞུང་སོགས་ནས་ལྷ་སྲས་མཆོག་བརྒྱུད་བོད་གཞུང་ལ་འབྲེལ་བ་ཞུ་ཐབས་དང་། ཁོང་ཚོས་བོད་ལ་རྒྱབ་སྐྱོར་བྱེད་དགོས། ཞེས་སོགས་ཁས་ལེན་གནང་བཞིན་པའི་སྐབས་ཡིན་པས། ཆེས་དུས་ཚོད་གལ་ཆེན་ཞིག་དོན་མེད་ཆུད་ཟོས་སུ་ཕྱིན་པར་བརྟེན། མཐར་བོད་གཞིས་བྱེས་གཉིས་སུ་གྱེས་པར་མ་ཟད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ད་ལྟ་ད་དུང་གཞན་ཡུལ་ན་བཙན་བྱོལ་དུ་བཞུགས་བཞིན་པ་དང་། རྒྱ་དམར་སྒེར་གཅོད་སྲིད་གཞུང་གི་བཙན་གནོན་འོག་གཞིས་བཞུགས་བོད་མི་རྣམས་ཀྱིས་མྱལ་བ་མི་ཡུལ་དུ་བྱུང་བ་ལྟ་བུའི་དཀའ་སྡུག་མྱང་དང་མྱོང་བཞིན་པ་སོགས་ཀྱི་གནས་སྟངས་འདི་ཡིན་ནོ། །
ག༽ དེ་བཞིན་༸རྒྱལ་དབང་སྐུ་འཕྲེང་ན་རིམ་གང་དང་མི་འདྲ་བར། ༸གོང་ས་བཅུ་བཞི་པ་ཆེན་པོ་སྐུ་ན་གཞོན་དུས་དོལ་རྒྱལ་བསྟེན་གསོལ་བྱ་དགོས་བྱུང་བར་བརྟེན། ཕྱིས་སུ་༸གོང་ས་མཆོག་ལ་གནས་ཆུང་ཆོས་སྐྱོང་ཆེན་པོས་བཀའ་ལུང་ཕེབས་ཏེ། དོལ་རྒྱལ་བསྟེན་གསོལ་གནང་ན་ཁེ་ལས་གྱོང་དང་། དགེ་ལས་སྐྱོན་ཆེ་བས། དོལ་རྒྱལ་བསྟེན་གསོལ་མི་འོས་ཚུལ་ཞུས་པར་བརྟེན། ཕྱིས་སུ་༸གོང་ས་ཆེན་པོས་གསར་དུ་ཞིབ་འཇུག་གནང་སྐབས། ༸གོང་ས་ལྔ་པ་ཆེན་པོའི་གསུང་འབུམ་ནང་དུ་དོལ་རྒྱལ་སྐོར། སྨོན་ལམ་ལོག་པའི་དམ་སྲི་འབྱུང་པོ་འདིས། །བསྟན་དང་འགྲོ་བ་ཀུན་ལ་འཚེ་བྱེད་ན། །མགོན་སྐྱབས་དཔུང་གཉེན་མ་མཛད་ཐལ་བར་རློགས། །ཞེས་སོགས་དོལ་རྒྱལ་ག་འདྲ་ཡིན་མིན་སྐོར་ཤིན་ཏུ་གསལ་བར་གསུངས་ཡོད་པ་གསར་རྙེད་བྱུང་བ་ཡིན་ནོ། །
དེ་དང་དེ་བཞིན་དུ་གནས་ཆུང་ཆོས་སྐྱོང་ཆེན་པོའི་བཀའ་དྲིན་ད་བར་བསམ་གྱིས་མི་ཁྱབ་པ་ཡིན་ཡང་། དྲིན་ལན་ལོག་འཇལ་ཞུས་ཏེ། ༸གོང་ས་བཅུ་གསུམ་པ་ཆེན་པོར་སྨན་ལོག་ཕུལ་ཏེ། སྐུ་བཀྲོངས་ཚུལ་སོགས་གཞི་མེད་སྒྲོ་སྐུར་ཁོ་ན་ཞུས་ཏེ། ༸གོང་ས་༡༣་པ་ཆེན་པོ་ཞིང་དུ་ཕེབས་མ་ཐག་ཏུ། དེའི་སྔོན་ཁོང་གི་རླབས་ཆེན་ཐུགས་དགོངས་ཇི་བཞིན་སྒྲུབ་རྒྱུ་ཁོ་ན་མ་གཏོགས། གཞུང་གི་མཐོ་རིམ་སྐུ་དྲག་སོགས་ཀྱི་དབང་དུ་མི་འགྲོ་མཁན་སྤྱན་གསལ་ཐུབ་བསྟན་ཀུན་འཕེལ་ལགས་དང་། སྐབས་དེའི་གནས་ཆུང་སྐུ་སྟེན་སོགས་ལ་གཞུང་གི་སྐུ་དྲག་ཚོས་འཁོན་ལན་སློག་རྒྱུའི་གོ་སྐབས་དམ་འཛིན་བྱས་ཏེ། ཕམ་པར་བརྒྱབ་རབས་སོགས་ལ་ཞིབ་ཏུ་བསམ་བློ་ཐོང་དང་། ཨོ་རྒྱན་གུ་རུ་པདྨ་འབྱུང་གནས་ཀྱིས་ཀྱང་། “བོད་ལ་དྲིན་ཆེན་བྱས་ཀྱང་དྲིན་མི་གོ །”ཞེས་སོགས་གསུངས་པ་དེ་རང་ཡིན་ནོ། །
༧༽ ད་ཐེངས་ཡང་གནས་ཆུང་ཆོས་སྐྱོང་གི་བཀའ་ལུང་ལ་སྒྲོ་སྐུར་ཞུ་མཁན་འགའ་རེ་འབྱུང་བཞིན་པ།
༢༠༢༥་ལོའི་ཟླ་༡༢་ཚེས་༢༧་ཉིན་གནས་ཆུང་ཆོས་སྐྱོང་ཆེན་པོས་འབྲས་སྤུངས་བླ་སྤྱིར་བཀའ་ལུང་ཕེབས་པ་དེ་སྤྱི་ཚོགས་དྲ་ལམ་དུ་ཁྱབ་མ་ཐག་བསྟན་དགྲ་རྒྱ་དམར་གྱི་མངོན་འདོད་སྒྲུབ་མཁན་དམ་ཉམས་མི་ངན་གླུད་ལྟ་བུ་རེ་ཟུང་དང་། གདོན་འདྲེ་དམ་སྲི་དོལ་རྒྱལ་རྗེས་འབྲང་པ་སོགས་བདེན་རྫུན་གོ་ལྡོག་གིས་དགྲ་དགའ་གཉེན་སྡུག་གི་ལས་ངན་སྒྲུབ་མཁན་རྒྱལ་ཚོང་ནང་རུལ་བ་རྣམས་བཅས་མི་ངན་སྐོར་ཞིག་གིས་གོ་སྐབས་དམ་འཛིན་གྱིས། དྲ་ཐོག་ནས་མི་བདེན་རྫུན་བསྒྲིགས་ཀྱི་ལོག་བཤད་འདྲ་མིན་སྤེལ་ཏེ། “གནས་ཆུང་ཆོས་སྐྱོང་མ་དྲངས་པ་རེད།” ཅེས་དང་། “ཆོས་སྐྱོང་གི་བཀའ་ལུང་དེ་རྫུན་མ་རེད།” ཅེས་དང་། “གནས་ཆུང་ལྷ་ཕེབས་རྒྱུ་ཡོད་པ་མ་རེད།” ཅེས་དང་། “བཀའ་ལུང་དེ་གནས་ཆུང་གྲྭ་ཚང་གི་དགེ་བཤེས་རྒན་རྡོ་རྗེ་ལགས་ཀྱིས་རྫུན་བཟོ་རེད།” ཟེར་བ་སོགས་ངོ་ཚ་མེད་པའི་ལོག་བཤད་སྤེལ་མགོ་བཙུགས་སོང་།
འོན་ཀྱང་དེའི་རིགས་ནི་རྟག་ཏུ་རྒྱལ་ཚོང་གི་ལས་ཀ་བྱེད་མཁན་ནམ། དགྲ་དགའ་གཉེན་སྡུག་གི་བྱ་སྤྱོད་ངན་པ་སྤེལ་མཁན་རིགས་ཡིན་པས། ད་ལྟ་ཡང་ཁོ་ཚོས་གོ་སྐབས་དམ་འཛིན་བྱས་ཏེ། རང་ཉིད་ཀྱི་ལྟོ་རྒྱབ་ཀྱི་ཁེ་བཟང་ཆེད་མི་ངན་དེའི་རིགས་ཀྱིས་ཧ་ལས་པ་ཞིག་ཤེས་མདོག་དང་། གོ་མདོག་གིས་དེ་འདྲ་ལོས་བཤད། སྙམ་པ་མ་གཏོགས་དེའི་རིགས་ནི་ནང་རུལ་བའི་རྒྱུན་ལྡན་གྱི་བྱ་ངན་རིགས་ཡིན་པས། དེ་ལ་ང་ནི་ཧ་ལས་དགོས་པ་ཅི་ཡང་མ་བྱུང་།
༨༽ ང་ཧ་ལས་དགོས་ས་གཙོ་བོ་ནི་འབྲས་སྤུངས་བློ་གསལ་གླིང་གི་ཕ་ར་ཁང་ཚན་གྱི་གྲ་རྒན་བློ་བཟང་ངག་དབང་ཟེར་བའི་རྒྱགས་པ་དེའི་བྱ་སྤྱོད་དེ་ཡིན།
སྤྱིར་ང་རང་ཉིད་ལ་མཚོན་ན། རང་ཉིད་ཀྱི་དགོན་པའི་བླ་མ་ལས་སྣེ་དང་། དགོན་པའི་ལྷ་ཆོས་སྐྱོང་སྲུང་མ་ལ་མཐའ་གཅིག་ཏུ་གུས་ཞབས་དང་། ཡིད་ཆེས་གཙང་མ་ཡོད་མཁན་ཞིག་ཡིན། དེ་ཡང་ང་རང་ཡོན་ཏན་ཆེ་དྲགས་ནས་མ་ཡིན་པར། ང་ལ་ཆོས་འབྲེལ་དངོས་ཐོབ་ཀྱི་སངས་རྒྱས་དངོས་ལྟ་བུའི་བཀའ་དྲིན་མཚུངས་མེད་ཀྱི་ངའི་བླ་མ་མཚན་ལྡན་དགེ་བའི་བཤེས་གཉེན་རྣམས་ཀྱི་ཐུགས་རྗེ་བྱིན་རླབས་ལ་བརྟེན་ནས་བྱུང་བ་ཞིག་རེད། དེའི་ཕྱིར་ནམ་རྒྱུན་ངའི་སེམས་ལ་ང་དང་གཅིག་མཚུངས་གྲྭ་བ་སུ་ཡིན་ཡང་རང་ཉིད་ཀྱི་དགོན་པའི་བླ་མ་ལས་སྣེ་དང་། དགོན་པའི་ཆོས་སྐྱོང་སྲུང་མ་ལ་ཡིད་ཆེས་གཙང་མ་ཡོད་ངེས་རེད་སྙམ་བཞིན་ཡོད་མོད། འོན་ཀྱང་དེ་རིང་སྟབས་མ་ལགས་པ་ཞིག་ལ། ངས་དྲ་ལམ་དུ་ལྟ་སྐབས་བློ་བཟང་ངག་དབང་ཟེར་བའི་བླ་རྒན་ཤ་རྒྱགས་པ་ཅན་ཞིག་གིས་གནས་ཆུང་ཆོས་སྐྱོང་དང་། གནས་ཆུང་གི་བཀའ་ལུང་བཅས་ཀྱི་སྐོར་ལ་སྐྱུག་བྲོ་བའི་སྐད་ཆ་ཤོད་བཞིན་འདུག
ཀ༽ གོང་ཞུས་ལྟར། ངས་དྲ་ལམ་དུ་ལྟ་སྐབས་ཆེས་བཀྲ་མི་ཤིས་པའི་ཐན་ལྟས་ཤིག་མཐོང་བ་དེ་ནི། བླ་རྒན་མགོ་དཀར་ཤ་རྒྱགས་པ་ཅན་བློ་བཟང་ངག་དབང་ཟེར་བས་གནས་ཆུང་ཆོས་སྐྱོང་དང་། གནས་ཆུང་ཆོས་སྐྱོང་ཆེན་པོའི་བཀའ་ལུང་བཅས་ལ་གཡས་སྐོར་གཡོན་སྐོར་གྱིས་འགྲེལ་བཤད་གང་མང་རྒྱག་ཁུལ་གྱི་སྙིང་པོ་ནི། ཆེས་སྐྱུག་བྲོ་བའི་ཐན་སྐད་ཞིག་སྟེ། ཆོས་སྐྱོང་སྲུང་མ་དང་། དེའི་བཀའ་ལུང་བཅས་ལ་ཡིད་ཆེས་མེད་རབས་སོགས་ལོག་བཤད་ཚབས་ཆེན་སྤེལ་བཞིན་འདུག ཁོས་ལོག་བཤད་དེ་འདྲ་རང་སྤེལ་མེད་ཤས་ཆེ་སྙམ་མཁན་ཡོད་སྲིད་པས། འདིར་ཁོས་བཤད་པའི་ལོག་བཤད་དེའི་དྲ་བྱང་བཀོད་པ་འདི་ལྟར་ཡིན་ནོ། །
https://youtu.be/xMPbFz_uV3M
བློ་བཟང་ངག་དབང་ཟེར་བའི་ཆེས་ཐ་ཆད་པའི་གྲྭ་གཟུགས་རྒྱགས་པ་མགོ་དཀར་ཁོ་ནི་འབྲས་སྤུངས་བློ་གསལ་གླིང་ཕ་ར་ཁང་ཚན་གྱི་གྲྭ་རྒན་ཞིག་རེད་འདུག
ད་ནི་ཚང་མས་བསམ་བློ་ཞིག་ཐོངས་དང་། བློ་བཟང་ངག་དབང་ཟེར་བའི་འབྲས་སྤུངས་བློ་གསལ་གླིང་ཕ་ར་ཁང་ཚན་གྱི་གྲྭ་རྒན་རྒྱགས་པ་འདིས་རང་ཉིད་ཀྱི་དགོན་པ་འབྲས་སྤུངས་ཀྱི་ལྷ་ཆོས་སྐྱོང་ལ་ཡིད་ཆེས་བྱེད་བཞིན་མེད་ན། འབྲས་སྤུངས་ཐོག་མར་ཕྱག་འདེབས་པ་པོ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་ལའང་ཡིད་ཆེས་མི་བྱེད་ངེས་ཅན་རེད། གལ་ཏེ་ཁོས་འབྲས་སྤུངས་ཕྱག་འདེབས་པ་པོ་འཇམ་དབྱངས་ཆོས་རྗེ་ལ་ཡིད་ཆེས་ཡོད་ཀྱང་། འཇམ་དབྱངས་ཆོས་རྗེས་འབྲས་སྤུངས་དགོན་པ་བཀའ་བསྒོས་གཉེར་གཏད་གནང་ཡུལ་གནས་ཆུང་ཆོས་སྐྱོང་ལ་ཡིད་ཆེས་ཡོད་ཟེར་ན། ཆེས་གད་མོ་འཆོར་བྱེད་ཀྱི་སྐྱག་རྫུན་ཆེན་པོ་ཞིག་གོ །
གཞན་ཡང་ད་ནི་ང་ཚོ་ཚང་མ་དོགས་པ་ཟ་ས་གཙོ་བོ་ཞིག་ནི། འབྲས་སྤུངས་དགོན་པ་ཐོག་མར་ཕྱག་འདེབས་པ་པོ་བླ་མ་དང་། བླ་མ་དེས་དགོན་པ་བཀའ་བསྒོས་གཉེར་གཏད་གནང་ཡུལ་ལྷ་ཆོས་སྐྱོང་བཅས་ལ་ཡིད་ཆེས་མེད་མཁན་འབྲས་སྤུངས་དགོན་པའི་ནང་ཁུལ་དང་། བློ་གསལ་གླིང་གྲྭ་ཚང་ནང་ཁུལ། ཕ་ར་ཁང་ཚན་གྱི་ནང་ཁུལ་བཅས་སུ་གྲྭ་རྒན་བླ་རྒན་འདིའི་རིགས་ག་ཚོད་ཡོད་དམ། འབྲས་སྤུངས་བློ་གསལ་གླིང་ཕ་ར་ཁང་ཚན་གྱི་གྲྭ་རྒན་བློ་བཟང་ངག་དབང་ཟེར་བ་འདིའི་བྱ་སྤྱོད་ཀྱང་ཆེས་འཇིགས་སུ་རུང་བའི་ཞབས་འདྲེན་ཚབས་ཆེན་ཞིག་རེད་ཨང་།
ཁ༽ ད་དུང་སྔོན་ཞིག་ལ་གོང་གསལ་གྲྭ་རྒན་བློ་ངག་རྒྱགས་པ་མགོ་དཀར་གྱིས། ང་ཚོས་དོལ་རྒྱལ་ཚོགས་པ་ལ་དགོངས་སེལ་ཞུ་དགོས། ཞེས་བཤད་སོང་། དངོས་གནས་བྱས་ན། དོལ་རྒྱལ་ཚོགས་པས་ད་བར་བཙན་བྱོལ་བོད་མིའི་སྤྱི་ཚོགས་ནང་མི་བསད་ཁྲག་སྦྱོར་ཚབས་ཆེན་བྱས་པར་མ་ཟད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་ཡིད་བཞིན་ནོར་བུ་མཆོག་བོད་བསྟན་སྲིད་ཀྱི་ཆེད་འཛམ་གླིང་རྒྱལ་ཁབ་གང་དུ་ཕེབས་ཀྱང་། རྒྱ་དམར་སྒེར་གཅོད་སྲིད་གཞུང་གི་མངོན་འདོད་ལྟར། ༸གོང་ས་༸སྐྱབས་མགོན་ཆེན་པོ་མཆོག་ལ་དོལ་ཚོགས་ཀྱིས་ངོ་རྒོལ་ལས་འགུལ་རྒྱ་གང་ཆེ་སྤེལ་ཏེ། ༸གོང་ས་མཆོག་ལ་གཞི་མེད་སྒྲོ་སྐུར་ཚབས་ཆེན་ཞུས་དང་ཞུ་བཞིན་པ་སོགས་ང་ཚོས་མཐོང་བཞིན་པ་དེ་ཡིན་པར་མ་ཟད། རྒྱ་དམར་སྲིད་གཞུང་གིས་དོལ་རྒྱལ་ཚོགས་པ་ལ། ཁྱོད་ཚོས་༸གོང་ས་མཆོག་གི་སྐུ་སྲོག་ལ་བར་ཆད་རྩོམ་ནུས་ན། སྐབས་དེར་རྒྱ་དམར་སྒེར་གཅོད་སྲིད་གཞུང་གིས་དོལ་ཚོགས་ལ་དངུལ་དངོས་ཚད་མེད་པ་ཞིག་སྦྱིན་ངེས་ཡིན། ཞེས་རྒྱ་གཞུང་གིས་ཁས་ལེན་བྱས་རབས་སོགས་ལི་ཐང་གི་བླ་མ་ཚེ་བཀྲ་རིན་པོ་ཆེས་ཡོངས་ཁྱབ་གསལ་བསྒྲགས་སྤེལ་བ་ལྟར་ཡིན་པས། ཚང་མས་མཁྱེན་རྟོགས་ཆེད། འདིར་བླ་མ་ཚེ་བཀྲ་རིན་པོ་ཆེའི་གསུང་བཤད་ཀྱི་དྲ་རྒྱའི་ཁ་བྱང་འདིར་ཇི་བཞིན་བཀོད་ཡོད་པ་འདི་https://youtu.be/9uB7Wjuw4Fg?si=kZV28rrXKFPsn1dG
དང་། འདི་https://youtu.be/bSvUJFiGrFA?si=IESz9Lhyc_DNzVky བཅས་རང་སོར་བཀོད་ཡོད་པ་འདི་དག་ཡིན་ནོ།།
དེའི་ཕྱིར་གོང་གསལ་ལྟར་ལི་ཐང་གི་བླ་མ་ཚེ་བཀྲ་རིན་པོ་ཆེས་འགྲེལ་བཤད་གནང་བཞིན་པ་འདི་དག་ལ་ཀུན་གྱིས་ཞིབ་ཏུ་ལྟོས་དང་། ད་དུང་ང་ཚོས་དོལ་ཚོགས་ལ་དགོངས་དག་ཞུ་དགོས་དོན་ཞིག་འདུག་གམ། དེའི་ཕྱིར། གྲྭ་གཟུགས་བློ་བཟང་ངག་དབང་ཟེར་བའི་རྒྱགས་པ་དེས་ང་ཚོས་དོལ་ཚོགས་ལ་དགོངས་དག་ཞུ་དགོས། ཞེས་པའི་བརྙན་དེ་ཡང་ད་ཐེངས་ངས་འདིར་བཞག་དགོས་སྙམ་ཡང་། ད་ལྟ་བརྙན་དེ་ཁོས་ཕྱིར་འཐེན་བྱས་ཚར་འདུག དེའི་ཕྱིར་གྲྭ་གཟུགས་འདིའི་བྱ་སྤྱོད་ལ་དངོས་གནས་ང་ཧ་ལས་དགོས་པ་ཞིག་བྱུང་སོང་།
ག༽ ཡང་སྔོན་ཞིག་ལ་འབྲས་སྤུངས་བློ་གླིང་ཕ་ར་ཁང་ཚན་གྱི་གྲྭ་རྒན་བློ་ངག་རྒྱགས་པས། “དབུ་མའི་ལམ་གྱི་ལྟ་བ་ཁུར་མཁན་ཡོངས་སུ་རྫོགས་པ་དེ་རྒྱལ་ཚོང་པ་རེད།” ཟེར་བ་སོགས་ལོག་བཤད་སྣ་ཚོགས་སྤེལ་འདུག་ཀྱང་། ད་ལྟ་དེའི་བརྙན་དེ་ཡང་ཕྱིར་འཐེན་བྱས་ཟིན་འདུག་པས། དེ་རིང་དྲ་ཐོག་འདིར་བཞག་ཆོག་ཆོག་ཅིག་མི་འདུག་ཀྱང་། གཞན་དག་གིས་བརྙན་དེའི་འདྲ་བཤུས་ཉར་ཚགས་བྱས་ཡོད་པར་ཤེས་རྟོགས་བྱུང་བས། དགོས་མཁོ་བྱུང་སྐབས་ཁོག་བཤད་ཀྱི་བརྙན་དེ་དྲ་ཐོག་ཏུ་བཞག་ཆོག་ཆོག་ཡིན།
ང༽ གཞན་ཡང་ཉིན་ཤས་སྔོན་ནས་འབྲས་སྤུངས་བློ་གླིང་ཕ་ར་ཁང་ཚན་གྱི་གྲྭ་རྒན་བློ་ངག་རྒྱགས་པ་མགོ་དཀར་གྱིས། བོད་པའི་སྤྱི་ཚོགས་འདི་ཁྲག་དཀྲུག་རྣག་དཀྲུག་ཆེད། ཁོས་མུ་མཐུད་དྲ་ཐོག་ནས་ལོག་བཤད་གང་མང་སྤེལ་བཞིན་འདུག་པ་དང་། དེ་ཡང་ཁ་བྱང་ལ་<< སྤྱི་འཐུས་གཉིས་ཀྱིས་གནས་ཆུང་ཁྲིམས་གཏུགས་བྱེད་པ་ཡིན་ནམ། >> ཞེས་ཟེར་བའི་ལོག་བཤད་ཅིག་ཁྱབ་སྤེལ་བཏང་འདུག་པ་དེའི་ནང་། གནས་ཆུང་གི་བཀའ་ལུང་དེ་རྒྱ་གར་གྱི་ཁྲིམས་ཁང་ལ་གཏུགས་ན། “དང་པོ་ལུང་བསྟན་ཞུ་གི་ཡིན་ཟེར་མཁན་དེ་དང་། མཉམ་ཞུགས་བྱེད་མཁན། ལུང་བསྟན་རྒྱག་མཁན་དེ་ཚོ་ཚང་མ་ཁྲིམས་ར་ནང་ལ་སླེབས་འགྲོ་གི་རེད། དེ་འདྲ་སོང་ཙང་དེའི་ནང་ལ་སུ་ཚུད་འགྲོ་གི་རེད་ཟེར་ན། འབྲས་སྤུངས་དགོན་པའི་ཕྱག་མཛོད་དེ་ཚོ་ཚུད་འགྲོ་གི་རེད། གཉིས་པ་དེ་འབྲས་སྤུངས་ཁྲི་པ་ཚུད་འགྲོ་གི་རེད། དེའི་སྟེང་ལ་གནས་ཆུང་གི་སྐུ་སྟེན་ཚུད་འགྲོ་གི་རེད། དེའི་སྒང་ལ་དྲུང་ཡིག་རྡོ་རྗེ་དང་། གནས་ཆུང་གྲྭ་ཚང་གི་མི་སྣ་ཁ་ཤས་ཞིག་བཅས་ཁྲིམས་ར་ནང་ལ་ཚུད་འགྲོ་གི་རེད།” ཅེས་འཇིགས་སྐུལ་ཚད་མེད་བྱས་ཏེ། ད་ཐེངས་ཀྱི་གནས་ཆུང་བཀའ་ལུང་དེ་རྒྱ་གར་གྱི་ཁྲིམས་ཁང་ལ་གཏུག་ན། འབྲས་སྤུངས་བླ་སྤྱིའི་ཕྱག་མཛོད་རྣམས་དང་། འབྲས་སྤུངས་ཁྲི་པ་སྐྱབས་རྗེ་བྲག་གཡབ་རྟོགས་ལྡན་རིན་པོ་ཆེ་ཁྲིམས་ར་ནང་ཚུད་རྒྱུ་ཡིན་རབས་སོགས་སྙིང་གིས་བཟོད་དཀའ་ཞིང་། བློ་ཡུལ་དུ་ཤོང་དཀའ་བའི་ལོག་བཤད་འདྲ་མིན་སྤེལ་བཞིན་པ་འདི་དག་དངོས་སུ་མཐོང་སྐབས། འདི་ལྟར་ཤོད་མཁན་གྱི་མི་འདིའི་རྒྱབ་ན་སུ་ཡོད་དམ། གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་སྐྱོང་ཆེན་པོས་བོད་བསྟན་སྲིད་སྤྱིའི་དོན་དང་། ལེགས་ཉེས་བླང་དོར་སོགས་ཀྱི་སྐོར་ནས་བཀའ་ལུང་ཚད་མ་རྗེས་སུ་མི་གནང་རྒྱུའི་ཆེད་གྲྭ་གཟུགས་བླ་རྒན་འདིའི་འབད་བརྩོན་འདི་འདྲ་ཞིག་བྱེད་པ་འདི། སུ་ཞིག་གི་ཆེད་དུ་ཡིན་ནམ། གྲྭ་གཟུགས་བླ་རྒན་འདིས་འདི་འདྲའི་ལོག་བཤད་རྐྱང་རྐྱང་ཅིའི་ཕྱིར་སྤེལ་བ་ཡིན་ནམ། སྙམ་ནས་ང་ལ་ནི། དོགས་པ་ཇེ་ཆེ་ནས་ཇེ་ཆེར་འགྲོ་བཞིན་འདུག འོན་ཀྱང་དེ་འདྲའི་ལོག་བཤད་སྤེལ་ཨེ་ཡོད་སྙམ་མཁན་རེ་བྱུང་ན། གཤམ་གྱི་དྲ་ཐག་འདི་ལ་ཞིབ་གཟིགས་གནོངས་དང་། ཧ་ཅང་གསལ་ལོ། །
https://www.youtube.com/watch?v=Ut0WDZkv1U8
དེའི་ཕྱིར། “རང་གི་འཁྲུལ་པ་རང་གིས་མ་བརྟགས་ན། །ཆོས་པའི་གཟུགས་ཀྱིས་ཆོས་མིན་བྱེད་སྲིད་པས། །”ཞེས་གསུངས་པ་དེ་ཡང་འདི་འདྲའི་རིགས་ལ་དགོངས་ནས་གསུངས་པ་ཡིན་ནོ། །
ཅ༽ གོང་གསལ་ལྟར། འབྲས་བློ་གླིང་ཕ་ར་ཁང་ཚན་གྱི་གྲྭ་རྒན་བློ་ངག་རྒྱགས་པ་མགོ་དཀར་གྱིས་གནས་ཆུང་ཆོས་སྐྱོང་ཆེན་པོ་དང་། དེའི་བཀའ་ལུང་བཅས་ལ་དངོས་ཤུགས་བརྒྱུད་གསུམ་གྱིས་ལོག་བཤད་འདི་ལྟར་སྤེལ་བཞིན་པ་མཐོང་སྐབས། དེ་སྔོན་རྒྱ་དམར་གྱི་སྲིད་བློན་ལིས་ཕིན་གྱིས་བཤད་པའི་སྐད་ཆ་ཞིག་ངའི་སེམས་ལ་ཤར་ཡོང་གིན་འདུག
དེ་ཡང་དུས་རབས་༢༠་བའི་ལོ་རབས་༩༠་ནང་སྟེ། ཕྱི་ལོ་༡༩༩༠་གོ་གྲངས་སུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འབྲེལ་བ་འཛིན་ཕྱོགས་དང་། བོད་དོན་ཐག་གཅོད་བྱེད་ཕྱོགས་ཆེད་རྒྱ་དམར་སྒེར་གཅོད་སྲིད་གཞུང་གིས་གོ་སྒྲིག་བྱས་ཏེ། རྒྱ་གཞུང་གི་ཆེས་མཐོའི་མགོ་ཁྲིད་དང་། རྒྱ་ནག་གི་ཞིང་ཆེན་རིམ་པའི་མགོ་ཁྲིད་སོགས་གལ་ཆེའི་ཚོགས་འདུ་ཞིག་གི་ཚོགས་ཐོག་ཏུ། སྐབས་དེའི་རྒྱ་ནག་གི་སྲིད་བློན་ལིས་ཕིན་གྱིས། “ཏཱ་ལའི་བླ་མ་ནི་ཤེས་ཡོན་དང་། འཇོན་ཐང་སོགས་ཧ་ཅང་ཡོན་ཏན་ཆེན་པོ་ཅན་ཞིག་རེད། དེ་བཞིན་ཁོང་གི་མཛད་འཕྲིན་སོགས་ལ་བལྟས་ན། ཁོང་ལ་རྒྱབ་རོགས་བྱེད་མཁན་གྱི་ལྷ་ཞིག་ཏན་ཏན་ཡོད་ཐག་ཆོད་རེད།” ཅེས་སོགས་ནམ་རྒྱུན་ལྷ་འདྲེའི་རྣམ་གཞག་ཁས་མི་ལེན་ཟེར་མཁན་རྒྱ་དམར་སྒེར་གཅོད་དམར་གཞུང་གི་ཆེས་མཐོའི་དཔོན་རིགས་ཁོའི་ཁ་ནས་བཤད་ཡོད་པ་དེའི་སྐོར་སྐབས་དེའི་ཚོགས་ཞུགས་མི་སྣའི་ངག་ལམ་བརྒྱུད། སྤྱི་ཚོགས་ནང་དུ་སྐད་ཆ་དེ་གང་འཚམས་ཁྱབ་གདལ་དུ་ཕྱིན་ཡོད་པ་སོགས་ལ་བལྟས་ཀྱང་། རྒྱ་དམར་སྒེར་གཅོད་སྲིད་གཞུང་གིས། འདས་པའི་ལོ་མང་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཞེད་སྣང་དང་། དོགས་ཟོན་བྱས་དང་། བྱེད་བཞིན་པ་དེ་བཞིན་དུ་གཞུང་བསྟེན་དགྲ་ལྷའི་གཙོ་བོ་གནས་ཆུང་ཆོས་སྐྱོང་ཆེན་པོ་སོགས་ལའང་དོ་སྣང་དེ་ཙམ་བྱེད་བཞིན་པའི་སྐབས་འདིར། ཚུར་ཕྱོགས་འདི་ནས། གདོན་འདྲེ་དོལ་རྒྱལ་གྱི་རྗེས་འབྲང་པ་སོགས་ནང་རུལ་བ་མི་ངན་རེ་ཟུང་གིས། ༸གོང་ས་༸སྐྱབས་མགོན་ཆེན་པོ་མཆོག་དང་། གཞུང་བསྟེན་དགྲ་ལྷའི་གཙོ་བོ་ཁག་བཅས་ལ་གཞི་མེད་སྒྲོ་སྐུར་ཚབས་པོ་ཆེ་ཞུ་བཞིན་ཡོད་པ་འདི་དག་ཡོངས་རྫོགས་ཀྱི་རྒྱབ་ལོགས་ན་སུ་ཞིག་ཡོད་མེད་ཚང་མས་ཤེས་དཀའ་བ་མེད་ཀྱང་། ཀུན་གྱིས་ད་དུང་དུས་ནས་དུས་སུ་དོ་སྣང་ཤུགས་ཆེན་གནང་གལ་ཤིན་ཏུ་ཆེ།
༩༽ གུས་པའི་སེམས་གཏིང་གི་བསམ་ཚུལ།
སྤྱིར་ང་ཚོར་བོད་ལ། “དགེ་འདུན་སྒྲིག་འོག་ནས་སངས་རྒྱས། །” ཞེས་པའི་གཏམ་དཔེ་ཞིག་ཡོད་ལ། གཏམ་དཔེ་འདིའི་དོན་དག་ནི། དགེ་འདུན་པའམ། གྲྭ་བ་རྣམས་ཀྱིས་ཆོས་འདུལ་བའི་བཅས་ཁྲིམས་དང་། དགེ་འདུན་པའི་ནང་ཁྲིམས་སོགས་ཁྲིམས་སྒྲིག་ལམ་ཡིན་ལུགས་ཚུལ་མཐུན་གྱིས་སྲུང་དགོས་ཀྱིན་ཡོད་པ་དེ་རེད། དེ་བཞིན་དེང་སྐབས་ཀྱང་། བཙན་བྱོལ་ནང་གི་གདན་ས་སེ་འབྲས་དགེ་གསུམ་གྱིས་གཙོས་ས་དགེ་བཀའ་རྙིང་ཇོ་ནང་བོན་བཅས་ཀྱི་དགོན་སྡེ་གྲྭ་ཚང་ཡོངས་ལ་ཁྲིམས་དང་། སྒྲིག་གཞི་མང་དག་ཅིག་ཡོད་པ་ཤེས་རྟོགས་བྱུང་།
འོན་ཀྱང་གྲོས་ཚོགས་ནང་གི་ཆོས་བརྒྱུད་སོ་སོའི་མགྲིན་ཚབ་ཏུ་རེ་བ་གླང་དམར་༡༠་དང་། འབྲས་བློ་གླིང་ཕ་ར་ཁང་ཚན་གྱི་གྲྭ་རྒན་བློ་བཟང་ངག་དབང་རྒྱགས་པ་མགོ་དཀར་ལྟ་བུ་འདིས་རིགས་ཀྱིས་ཁྱིམ་པ་སུན་འབྱིན་གྱི་ལས་ངན་ཚད་མེད་པ་བསགས་ཏེ། རང་རེའི་བཙན་བྱོལ་སྤྱི་ཚོགས་འདི་ཁྲག་དཀྲུག་རྣག་དཀྲུག་བྱེད་བཞིན་པར་བརྟེན། དེ་ལྟར་བྱེད་བཞིན་འདུག ཅེས་ད་ནི་ལྷ་ཆོས་སྐྱོང་སྲུང་མས་ཀྱང་བཀའ་ལུང་ནན་པོ་ཕེབས་བཞིན་པ་ང་ཚོ་ཚང་མས་མཐོང་གསལ་འདི་ཡིན་ཡང་། གདན་ས་གྲྭ་ཚང་གི་ཁྲིམས་སྒྲིག་གི་བདག་པོ་བླ་མ་ལས་སྣེ་ཚོས་ཀྱང་། གོང་གསལ་གླང་དམར་༡༠་སོགས་ཁྱིམ་པ་སུན་འབྱིན་གྱི་ལས་ངན་གསོག་མཁན། དགོན་སྡེ་གྲྭ་ཚང་དང་། སྐྱབས་ཡུལ་དགེ་འདུན་འདུས་སྡེ་བཅས་ཀྱི་ཞབས་ནས་མར་འཐེན་མཁན་དེའི་རིགས་ལ་ཐག་གཅོད་ནན་པོ་ཅི་ཡང་མེད་པར། བསྟན་བཤིགས་དམ་ཉམས་གླང་དམར་བཅུ་སོགས་དེའི་རིགས་རྒྱ་ཡན་དུ་འཇོག་བཞིན་པ་དེས། གདན་ས་གྲྭ་ཚང་ཁག་གི་ཁྲིམས་སྒྲིག་རྣམས་ཀྱང་ཤོག་ཐོག་གི་རི་མོ་ཙམ་དུ་འགྲོ་བཞིན་མི་འདུག་གམ།
༡༠༽ དགོན་སྡེ་གྲྭ་ཚང་གི་མཁན་བླ་ལས་སྣེ་ཚོར་སེམས་གཏིང་གི་རེ་སྐུལ།
དེ་སྔོན་ནས་སྤྱི་ནོར་༸གོང་ས་༸སྐྱབས་མགོན་ཆེན་པོའི་ཞལ་ནས། “རྒྱ་ཆེའི་མང་ཚོགས་ཆོས་ལ་ཤེས་ནས་དད་པ་ཐོབ་པའི་སྤྱི་ཚོགས་ཤིག་བཟོ་ཐུབ་ན་བསྟན་པ་གནས་རྒྱུ་རེད། སྤྱི་ཚོགས་ལ་ཆོས་དད་ཉམས་སོང་ན་དགེ་འདུན་པ་འབྱུང་རྒྱུ་ལྟག་ཆུ་ཆད་པའི་རྫིང་བུ་ནང་བཞིན་ཆགས་འགྲོ་གི་རེད།” ཅེས་སོགས་ཡང་ནས་ཡང་དུ་མ་འོངས་མངོན་གཟིགས་ཀྱི་བཀའ་སློབ་ལམ་སྟོན་ལན་མང་ཕེབས་ཟིན་པ་ལྟར། ད་ལྟའི་དུས་འདིར་དགོན་སྡེ་གྲྭ་ཚང་ཁག་གི་ཁོངས་གཏོགས་གོང་གསལ་གྲོས་ཚོགས་ནང་གི་གླང་དམར་ཞེས་ཡོངས་སུ་གྲགས་པའི་ཆོས་འཐུས་བཅུས་གཙོས་གོང་གསལ་བསྟན་བཤིག་དེས་རིགས་ཀྱིས་ནི། འདས་པའི་ལོ་མང་རིང་དུ། རང་རེའི་སྤྱི་ཚོགས་ལ་ཆོས་དད་ཉམས་བྱེད་ཀྱི་ལས་ངན་ཚབས་པོ་ཆེ་བསགས་ཏེ། ད་ལྟ་ཛ་དྲག་གི་གནས་སྟངས་འདི་འདྲ་ཞིག་ཏུ་འགྱུར་བཞིན་པའི་སྐབས་འདིར། ད་དུང་ང་ཚོས་སྡིག་པ་མིག་བཙུམ་གྱིས་མ་ཤེས་མ་གོ་མདོག་མདོག་བྱས་ཏེ། མུ་མཐུད་བསྡད་ན། བསྟན་བཤིག་ལ་བསྟན་པ་བཤིག་རོགས་དང་། རྒྱབ་སྐྱོར་བྱས་པ་དང་གཉིས་སུ་མེད་པར་འགྱུར་བཞིན་འདུག་པའི་ཛ་དྲག་གི་གནས་སྟངས་འདི་ལ་ཐུགས་ཁུར་ཆེ་བཞེས་ཀྱིས། རྒྱལ་བསྟན་རིན་པོ་ཆེ་དང་། སྐྱབས་ཡུལ་དགེ་འདུན་འདུས་སྡེའི་མཚན་མཐོང་བཅས་སྲུང་སྐྱོབ་སོགས་ཀྱི་ཆེད་དུ། དགོན་སྡེ་གྲྭ་ཚང་གི་ཁྲིམས་སྒྲིག་གཞིར་བཞག་སྡིག་ཆེན་དམ་ཉམས་བསྟན་གཤིག་འདིའི་རིགས་ཚར་གཅོད་གནང་སྐྱོང་ཡོང་བར་མཁྱཻན། མཁྱེན།
ཞེས་སྒོ་གསུམ་རབ་གུས་བཅས་ཕྲན་ཆབ་སྲིད་བཙོན་ཟུར་མགོ་ལོག་འཇིགས་མེད་ཀྱིས་ལྷག་བསམ་རྣམ་དག་གིས་ཕྱི་ལོ་༢༠༢༦་ཟླ་༡་ཚེས་༧་རེས་གཟའ་ལྷག་དཀར་ཉིན་སྤེལ་བ་དགེའོ། །བོད་རྒྱལ་ལོ།། །།
