གཅིག
བསྟན་པའི་ནང་དོན་མ་ཤེས་གོང་།།
སྟོན་པའི་རྗེས་འཇུག་ཡིན་རབས་སྨྲ།།
རང་རྒྱུད་མ་འདུལ་གོང་ཞིག་ནས།།
གདུལ་བྱ་གཞན་ཞིག་འདུལ་དགོས་སྙམ།།
གང་འདུལ་འགྲོ་དོན་བྱེད་ཟེར་ནས།།
གང་ས་གང་ལ་འདུར་རྒྱུག་བྱེད།།
བསྟན་པ་ཁ་ལ་ཁྱེར་ཁྱེར་ནས།།
སྟོན་པའི་ལུགས་དང་རྒྱབ་འགལ་བྱེད།།
འདི་ནི་ད་ལྟའི་མི་མང་ལུགས།།
སྔོན་ཡང་དེ་འདྲའི་བྱེད་ལུགས་མང་།།
སྟོན་པ་འཇིག་རྟེན་མིག་དེ་ཟིམ་གྱུར་ནས།།
བསྟན་པའི་གཏད་རབས་དེ་དག་རྫོགས་པ་ནས།།
ཉན་ཐོས་སྡེ་བ་སོ་སོར་གྱེས་པ་ནས།།
ཐེག་ཆེན་ཐེག་དམན་གཉིས་སུ་ཕྱེ་བ་ནས།།
བསྟན་ལ་ཕྱི་དགྲ་ནང་དགྲ་མང་བོ་བྱུང་།།
སྟོན་པས་མ་གསུངས་ཆོས་མང་དར།།
བསྟན་པའི་ནང་ལ་ནང་སླད་ཞུགས།།
ཐེག་ཆེན་འུད་སྒྲོགས་བྱེད་དྲགས་ནས།།
ཉན་ཐོས་རིགས་དེ་དམན་སར་བཅད།།
ཐེག་པའི་ཡང་རྩེར་སྙེག་ཁུལ་གྱིས།།
སྤྱོད་ལམ་མ་བཅོས་རང་སར་ཤོར།།
མཐོ་འདོད་གྲགས་འདོད་དུ་མ་ཡིས།།
དེ་ལ་བསྟོད་པའི་མཐེ་བོང་བསྒྲེངས།།
གྲུབ་རྫུན་གཏེར་རྫུན་དུ་མ་ཡིས།།
གཏེར་ཆོས་རྫུན་ཆོས་མང་བོ་སྤེལ།།
དེ་རྗེས་འཇུག་པའི་སྐྱེ་བོ་ཚོས།།
རྫུན་གྱི་ལུང་ཚིག་དུ་མ་བསྒྲིགས།།
སྔགས་དང་རྒྱུད་སྡེའི་ཁྲོད་དུ་ཡང་།།
ཁུངས་མེད་ལུང་མེད་དུ་མས་བསླད།།
དག་སྣང་བརྒྱུད་པ་སྤེལ་དྲགས་པས།།
མ་དག་རྒྱུད་འབྱམས་དུ་མ་བྱུང་།།
ལྷ་སྣང་ཆོས་དེ་སྤེལ་དྲགས་པས།།
ལྷ་ཆོས་འདྲེ་ཆོས་དུ་མས་ཁེངས།།
ཐོས་པ་མི་དགོས་རང་སར་གྲོལ།།
སྒོམ་པ་མི་དགོས་མངོན་སངས་རྒྱ།།
སྤྱོད་པ་མི་དགོས་ཚུལ་ཁྲིམས་འདོར།།
རྒྱུ་འབྲས་སྤང་བླང་མི་གཙོ་ཞིང་།།
མི་ཆོས་ཀུན་སྤྱོད་མི་དགོས་ཟེར།།
སྐྲ་དང་གོས་ལུད་ལ་སོགས་པའི།།
རྫས་ངན་བདུག་ན་གདོན་བགེག་སེལ།།
གཅིན་དང་སྤྱི་ས་ལ་སོགས་པའི།།
ངན་སྐྱུག་འཐུང་ན་དངོས་གྲུབ་ཐོབ།།
འདོད་ལོགས་སྤྱོད་པ་མང་ན་ཡང་།།
སྔགས་མང་འཆལ་བོའི་ལུགས་གྱུར་ཀྱང།།
ཆོས་པའི་སྤྱོད་པ་ཅི་བྱུང་རུང་།།
ཐམས་ཅད་དེ་ལ་དག་སྣང་སྒོམ།།
དེ་ལྟར་བྱེད་པ་མང་དྲགས་པས།།
མི་སེམས་རྨོངས་པས་སྤྲིན་གྱིས་བསྒྲིབས།།
འདི་ལྟར་བྱེད་པ་མང་དྲགས་པས།།
བསྟན་པའི་སྙིང་བོ་སྟོར་ལ་ཉེ།།
བསྟན་པ་ལ་གེག་བྱུང་བའི་སྐོར་ཏེ་དང་བོའོ།།
གཉིས།
འོན་ཀྱང་བསྟན་པའི་གནད་ཤེས་པའི།།
བསྟན་འཛིན་སྐྱེས་བུ་ཉུང་ཤས་ཀྱིས།།
ལུས་སྲོག་ལོངས་སྤྱོད་ཕངས་མེད་ཀྱིས།།
བསྟན་ལ་དག་ཐེར་ལན་ཡང་མཛད།།
སྐྱེས་བུ་དེ་ཚོའི་མཛད་འཕྲིན་མཐའ།།
ད་ལྟ་ད་དུང་བོད་ན་དར།།
བོད་ཀྱི་དགོན་སྡེའི་ལམ་ལུགས་ལ།།
རིམ་བཞིན་བསྒྱུར་བཅོས་བྱས་ནས་ཡོང་།།
བོད་ཀྱི་ཆོས་པའི་སྤྱོད་པ་ལ།།
རིམ་བཞིན་ལེགས་བཅོས་བྱས་ནས་ཡོང་།།
ཕ་ཤུལ་བུ་ཡིས་འཛིན་པ་ཡི།།
དགོན་བདག་ལུགས་དེ་བཅོས་ནས་ཡོང་།།
རིགས་སྲས་གདུང་སྲས་ཟེར་བ་ཡི།།
སྔགས་པའི་ལུགས་དེ་བསྒྱུར་ནས་ཡོང་།།
སྡེ་སྣོད་གསུམ་གྱི་འཆད་ཉན་དང་།།
བསླབ་པ་གསུམ་གྱི་ཉམས་ལེན་དང་།།
རྒྱུད་སྡེ་སྤྱི་ཡི་བཤད་པ་དང་།།
སྒྲུབ་སྡེ་སོ་སོའི་ཕྱག་ལེན་སོགས།།
མ་ནོར་ཡང་དག་བཅོས་པ་ཉིད།།
འདི་ན་རིམ་བཞིན་དར་བར་བྱས།།
བཀའ་སྲོལ་ཕྱག་བཞེས་བཟང་བོ་དང་།།
གདམས་པ་མན་ངག་ཟབ་མོ་དང་།།
དབང་ལུང་ཁྲིད་གསུམ་ལ་སོགས་པའི།།
བརྒྱུད་པ་བར་མ་ཆད་དུ་བྱུང་།།
ཕྱི་རུ་ཉན་ཐོས་སྤྱོད་པ་དང་།།
ནང་དུ་རིམ་གཉིས་རྣལ་འབྱོར་བ།།
མདོ་སྔགས་ལམ་བཟང་འགལ་མེད་དེ།།
ད་ལྟ་ད་དུང་བོད་ན་དར།།
མ་སྨད་ཚུལ་ཁྲིམས་གཙང་མ་ཡིས།།
ལུས་ལ་བརྒྱན་པའི་དགེ་སྦྱོང་རིགས།།
ཚེ་གཅིག་བཞུགས་སའི་བསྟི་གནས་ལ།།
ཚད་ལྡན་དགོན་པ་དུ་མ་བསྐྲུན།།
རྣམ་དཔྱོད་རྩལ་དང་རབ་འགྲོགས་ཤིང་།།
ཐོས་བརྩོན་འདབ་མ་སྒྱུར་མཁས་པའི།།
རབ་བྱུང་བུང་བའི་འཁོར་ཡུག་ལ།།
ཆོས་གྲྭ་བཤད་གྲྭའི་དགའ་ཚལ་བསྐྲུན།།
ཚེ་གཅིག་སྒྲུབ་པ་ལྷུར་ལེན་པའི།།
རྟོགས་ལྡན་རྒན་པོ་དེ་ནས་བྱུང་།།
ཚེ་གང་ཐོས་པར་བསྟིམས་མཁས་པའི།།
ལུང་རིགས་སྨྲ་བ་འདི་ནས་བྱུང་།།
འཆད་ཉན་སྒོམ་སྒྲུབ་རྐང་འཛིན་པའི།།
བསྟན་འཛིན་སྐྱེས་བུ་དེ་ན་བཞུགས།།
རྡོ་རྗེ་འཆང་ནས་བརྒྱུད་པ་ཡི།།
མན་ངག་གཏེར་བརྒྱ་འདི་ན་བཞུགས།།
མེས་པོ་གོང་མས་བསྐྲུན་པ་ཡི།།
གནའ་བོའི་རིག་མཛོད་འདི་ན་བཞུགས།།
འདི་ནི་གཞན་དང་བསྡུར་ཐབས་མེད།།
འདི་ལ་གཅེས་འཛིན་གནད་དུ་ཆེ།།
ཤར་ནུབ་རིག་པས་མི་འགྲུབ་ཅིང་།།
གཞན་ལ་ལད་མོ་མ་ཡིན་པའི།།
རང་ཚུགས་ཚད་ཐུབ་རིག་པའི་དཔལ།།
བོད་བརྒྱུད་ནང་བསྟན་འདི་ནས་བྱུང་།།
འདི་ནི་སྔོན་གྱི་མཁས་པའི་ལུགས།།
རྒྱ་གར་པཎ་གྲུབ་བཅུ་བདུན་དང་།།
བོད་ཀྱི་འཇམ་དབྱངས་རྣམ་གསུམ་སོགས།།
ཚད་ལྡན་སྐྱེས་བུ་མཐའ་དག་གི།།
ཐུགས་ཀྱི་བུམ་བཟང་ལས་བརྡོལ་ཅིང་།།
རྣམ་དཔྱོད་དཔལ་ལས་འཁྲུངས་པ་ཡི།།
འགྲོ་བ་སྤྱི་ལ་ཕན་ཆེ་བའི།།
ཡང་དག་ལམ་བཟང་འདི་ནས་བྱུང་།།
འདི་ལ་དོན་མེད་བཅོས་དོན་མེད།།
དཀའ་བའི་དོན་དེ་བསྒྲུབ་ཤེས་ན།།
སླ་བའི་དོན་དེ་འགྲུབ་ངེས་ཡིན།།
འདི་ལ་དཔྱད་པ་བྱེད་དགོས་ན།།
གཞུང་བརྒྱ་ཐུགས་ལ་ཤར་བ་དགོས།།
ཕལ་བའི་མི་ཡིས་རྟོགས་ཐབས་མེད།།
ཚད་ལྡན་དགོན་པའི་ཕྱག་བཞེས་དང་།།
རབ་འབྱམས་གཞུང་གི་བཤད་པ་ལ།།
མ་བརྟགས་མ་སྦྱངས་འོལ་ཚོད་ཀྱིས།།
བཤད་པ་བྱས་ན་གླེན་པའི་རྟགས།།
བསྟན་པ་འཛིན་སྟངས་སྐོར་གྱི་སྐབས་ཏེ་གཉིས་པའོ།།
གསུམ།
འོན་ཀྱང་སྔོན་གྱི་བྱུང་བ་ལ།།
ད་དུང་ཕྱིར་ལྟ་མི་ཤེས་ཤིང་།།
ད་ལྟའི་སྤྱི་ཚོགས་སྤྱོད་པ་ལ།།
རྒྱུས་ལོན་ཙམ་ཡང་མི་བྱེད་པར།།
གང་བྱུང་ཁ་ནས་སྒྲོགས་པ་དང་།།
ཅི་བསམ་ལག་ཏུ་ལེན་པ་མང་།།
འདུལ་ཁྲིམས་ཉམས་ན་སྔགས་པ་ཡིན།།
སྐྱ་སར་བབས་ན་བཙུན་པ་ཡིན།།
སྡོམ་པ་མེད་པ་མཁས་པ་ཡིན།།
སྦྱངས་པ་མེད་ཀྱང་གྲུང་བོ་ཡིན།།
ད་ལྟ་དེ་དག་ཤིན་ཏུ་བྲིན།།
སྦྱངས་པའི་རིམ་པ་མ་བརྒྱུད་ཅིང་།།
གོམས་པའི་ཉམས་མྱོང་མ་ཐོན་པར།།
གོ་ལོ་ཐོས་ལོའི་སྐད་ཆ་ལ།།
ཆ་འཇོག་བྱེད་པའི་རིགས་དག་མང་།།
སྔོན་བྱོན་སྐྱེས་བུ་དམ་པ་ཚོས།།
བསྲེག་བཅད་བརྡར་གསུམ་བྱས་པ་ཡི།།
གཞུང་གི་བཤད་པ་ལག་ལེན་མན་ངག་སོགས།།
རིགས་པ་བརྒྱ་ཡིས་གཏན་ལ་ཕབ་པ་དེ།།
ད་ལྟ་མི་ཤེས་ཟེར་མཁན་མང་།།
གཞུང་བཤད་ལག་ལེན་ལམ་གྱི་རིམ་པ་དག།
མ་ནོར་མ་འཆུག་ང་ཚོར་གཏད་པ་དེ།།
ད་ལྟ་མི་དགོས་ཟེར་མཁན་མང་།།
དགོན་པའི་ཕྱག་ལེན་འདུལ་ཁྲིམས་སྲུང་ལུགས་དང་།།
གྲྭ་གྲོང་གཉིས་ཀྱི་ཁྱད་པར་ཕྱེ་ལུགས་དང་།།
རབ་བྱུང་དག་གིས་ལག་ཏུ་བླང་བྱ་སོགས།།
འདི་ལྟར་ཡིན་ཞེས་མཁས་པའི་གསུངས་ན་ཡང་།།
ད་ལྟ་དེ་དག་མི་དགོས་ཟེར།།
རབ་བྱུང་དག་གིས་འཁོར་བ་སྐྱོང་།།
ཁྱིམ་པ་དག་གིས་འཆད་ཉན་བྱེད།།
བླ་མ་དག་གིས་རྒྱལ་བོ་བྱེད།།
ལྡོག་སྟེ་མཁས་པའི་གསུང་དང་འགལ།།
ཆོས་པ་དག་ནི་ཆོས་ལ་ཕྱོགས་པ་ནས།།
སྒོམ་སྒྲུབ་ཉམས་ལེན་བྱེད་པ་ཕྲག་ཏུ་བབས།།
འཆད་ཉན་སྒོམ་སྒྲུབ་བྱེད་པ་དེ།།
མི་ཚེ་གཅིག་ལ་རྫོགས་པ་མེད།།
མི་ཚེ་དོན་གྱིས་ཕྱུག་དགོས་ན།།
ད་གཟོད་དེ་ཡིས་འབྲས་བུ་ལེན།།
ཁྱིམ་པ་དག་ནི་ཁྱིམ་གྱིས་བྱ་བཞག་གིས།།
མི་ཚེ་གཅིག་ལ་ཁོམ་པའི་སྐབས་དང་བྲལ།།
ཐོན་སྐྱེད་ངལ་རྩོལ་བྱེད་པའི་ལས།།
ཁྱིམ་གྱི་བྱ་བའི་འགན་འཁྲི་ཡིན།།
ཆོས་པའི་ལད་མོ་བྱས་གྱུར་ཀྱང་།།
དོན་གྱི་འབྲས་བུ་ལེན་པ་དཀའ།།
བློ་རྩེ་གཉིས་ཀྱིས་དོན་མི་འགྲུབ།།
ཁབ་རྩེ་གཉིས་ཀྱིས་བཟོ་མི་ཕུག།
ཁྱིམ་པ་ཁྱིམ་ལ་ཆགས་པ་དེ།།
ཁྱིམ་མི་ཞིག་གི་སྤྱོད་བཟང་ཡིན།།
རབ་བྱུང་ཁྱིམ་ལ་ཆགས་པ་དེ།།
བདུད་ཀྱི་བསླུ་བྲིད་ཐེབས་པ་ཡིན།།
འཇིག་རྟེན་འཁོར་བའི་བྱ་གཞག་ལ།།
ཞུགས་ན་དེ་ལ་དགའ་བར་གྱིས།།
འཁོར་བ་སྲིན་མོའི་གྲོང་ཁྱེར་དུ།།
སྒོམ་ན་དེ་ལ་རྒྱང་གིས་ཁྱེད།།
འཁོར་བ་བདུད་ཀྱི་བཙོན་ར་ཡིན།།
བུད་མེད་བདུད་ཀྱི་བཙོན་སྲུང་ཡིན།།
བྱིས་པ་ལན་ཆགས་ཁུར་བོ་ཡིན།།
འདོད་ཡོན་བདུད་ཀྱི་བསླུ་བྲིད་ཡིན།།
དེ་ལ་སྐྱོ་ན་ཆོས་པ་ཡིན།།
མི་ཚེ་ལ་ནི་དགའ་བ་དང་།།
མི་ཡུལ་འདི་ལ་དུང་བ་དང་།།
འཚོ་བ་ལ་ནི་སྤྲོ་བ་སོགས།།
འཇིག་རྟེན་པ་ཡི་སྤྱོད་བཟང་ཡིན།།
འདི་ལ་གཞན་གྱིས་འགོག་དོན་མེད།།
མི་ཚེ་ལ་ནི་ཡིད་རྟོན་མེད།།
རྒྱུ་འབྱོར་གང་ལ་སྙིང་བོ་མེད།།
འཇིག་རྟེན་འདི་ལ་ཞེན་པ་མེད།།
འཁོར་བའི་ཐོག་མར་ཐུག་པ་མེད།།
དེའི་ཕྱིར་སྙིང་བོའི་ལྷ་ཆོས་བཙལ།།
དེ་ལ་ངེས་འབྱུང་ཟེར་ཀྱང་ཆོག
ངེས་པར་འབྱུང་བའི་བློ་མེད་ན།།
དེ་ཡིས་སྡོམ་པ་བསྲུང་དོན་མེད།།
སྡོམ་དང་ཚུལ་ཁྲིམས་བསྲུང་བ་དེ།།
ཆོས་པའི་རྩ་བའི་དམ་ཚིག་ཡིན།།
ཆོས་དང་འཇིག་རྟེན་བྱ་བཞག་ཁ་ཁ་ཡིན།།
གྲྭ་བ་གྲོང་བ་གཉིས་པོ་སོ་སོ་ཡིན།།
ཆོས་མིན་སྲིད་མིན་སྐྱ་མིན་སེར་མིན་དང་།།
བན་མིན་བོན་མིན་ར་མིན་ལུག་མིན་སོགས།།
རྫུན་མའི་རིགས་ཀྱིས་ས་སྟེང་ཁེངས་པའི་དུས།།
ཐམས་ཅད་དེ་ལ་ལད་མོ་བྱེད་དོན་མེད།།
གྲོང་བ་གྲོང་བའི་ནང་དུ་བྱ་བ་ཡོད།།
གྲྭ་བ་གྲྭ་བའི་ས་ན་བྱ་བ་ཡོད།།
དེ་དག་ཕན་ཚུན་མ་ནོར་མ་འཆུག་པར།།
རང་རང་ས་ནས་བརྩོན་པས་འབྲས་སུ་ལོངས།།
གྲྭ་བ་གྲོང་བ་གཉིས་ཀྱི་ཁྱད་པར་ཕྱེ་བའི་སྐབས་ཏེ་གསུམ་པའོ།།
རྫོགས་སོ།། །།
རྒྱལ་བསྟན་རིས་མེད་དྲ་ཚོམས་ནང་དུ་གྲྭ་གྲོང་གཉིས་ཀྱི་ཁྱད་པར་དང་། བོད་ཀྱི་དགོན་སྡེ་དང་གྲོང་སྡེ་གཉིས་ཀྱི་འཆད་ཉན་སྒོམ་སྒྲུབ་ཀྱི་བྱ་བ་ཐ་དད་ཡིན་མིན་སྐོར་གྱི་བརྗོད་གཞི་བྱུང་བར་ཆེད་དུ་ཕུལ་བ། ཕྱི་ལོ་ ༢༠༢༤ ཟླ་བ་ ༡༠ ཚེས་ ༣༠
