ཞོགས་ལྗང་།
སྐུ་ཉིད་ཐུགས་ལྷོད་ཁམས་ཡངས་ཀྱིས་བཞུགས་དང་ཁོ་བོ་འདི་སྙམ་དུ་ཞུ་རྒྱུར། གྲོགས་མེ་ལྕེས་བྲིས་པའི་རྩོམ་ཐུང་དེས་སྐུ་ཉིད་འཁོར་དང་བཅས་པ་ཐམས་ཅད་ལ་དྲང་བོའི་ལམ་སྟོན་པ་ཕར་ཞོགསྙིང་ནད་ལྟ་བུ་ཞིག་བསླངས་འདུག་པ་ཉིད་ཀྱི་རྩོམ་ལ་བལྟས་པས་གསལ་བོར་མཐོང་། དྲ་ཐོག་གི་མང་པོ་དག་ཀྱང་ཁྱོད་ཀྱི་ཁྲོས་སྟངས་ལ་བལྟས་ནས་ཕངས་སེམས་ལྟ་བུ་ཞིག་འོང་གི་འདུག་མོད། མི་རྣམས་མ་གཞི་ནས་དགའ་སྐྱོ་ཆགས་སྡང་གི་སྐྱོན་ཅན་དུ་སོང་ཙང། དེ་ཙམ་ངོ་མཚར་བའང་མ་བྱུང་། རང་གི་ཞེ་སྡང་དང་ཁོང་ཁྲོའི་མགོ་གནོན་པ་ལ་སོ་སོས་ཤེས་རབ་མཆོག་ཏུ་གྱུར་པ་དག་བསླབས་ཤིང་ཉམས་སུ་ལེན་དགོས་པ་ཡིན་པས་ཤིན་ཏུ་དཀའ། རང་ཅག་གི་དམ་པ་གོང་མ་དག་ཀྱང་དེ་ལྟར་གསུངས། ལྷག་ཏུ། བཀའ་གདམས་གོང་མ་རྣམས་ནི་སྐྱོན་བརྗོད་པ་བསླབ་བྱའི་མཆོག་ཏུ་བརྩི་བས་འདི་དག་ལ་ལེགས་པར་བསམ་ན་རིན་ཐང་ཅི་བས་ཆེ། ཁྱེད་ཅག་ཀྱང་ཤིན་ཏུ་གླེན་པ་གནས་ལུགས་སོར་ཙམ་མི་འགྲོ་བ་ཡེ་མིན་པས། ཁོང་རྣམས་ཀྱི་ཐུགས་དཀྱེལ་དང་ཉམས་ལེན་ལ་སོམས་དང་སེམས་རྒྱུད་ལྷོད་ཤིག་གེ་བ་ཞིག་ངེས་པར་འོང་། འདི་ཙམ་སྨོས་པས་ཀྱང་ཁྱོད་རིག་གཞུང་གི་དེབ་གཅིག་མེད་པ་དྲ་ཐོག་ནས་ཁ་འབར་འབར་དུ་རྩོམ་འབྲི་བ་ཞིག་གིས་ང་འབུམ་རམས་པ་ཚུན་ཆད་ལ་བསླབ་སྟོན་གནང་བའི་ཐོབ་མེད་མ་གསུང་རོགས། སེམས་དཀར་པོ་ཤ་སྟག་གིས་ཞུས་པ་ཡིན། དེས་ན། གཞན་གྱིས་སྐྱོན་བརྗོད་པ་ལ་དགྲ་རུ་བཟུང་ནས་སྡང་དགོས་པ་དེ་རང་རེའི་སྲོལ་མིན་པ་ཤེས་པར་གྱིས།
དེ་ལྟར་རང་དང་མི་མཐུན་པ་ཐམས་ཅད་དགྲ་རུ་བཟུང་ནས་ཚར་གཅོད་པའི་ལུགས་ཤིག་ཀྱང་མེད་པ་མིན་ཏེ། འཛམ་གླིང་ལོ་རྒྱུས་སུ་སྐད་གྲགས་ཆོད་པའི་སྒེར་གཅོད་ཀྱི་ལྟ་གྲུབ་དེ་དག་གོ། ཁོ་རང་ཚོས་རང་གི་ལྟ་གྲུབ་ཐམས་ཅད་གཞན་གྱིས་དང་དུ་ལེན་པ་ལ། དང་པོར་ཕྱོགས་ཁ་བཟོས། བར་དུ་ཚོགས་པ་བསྒྲིགས། མཐར་རང་དང་མི་མཐུན་པ་དང་རང་གི་བཀའ་གསུང་དང་དུ་མི་ལེན་པ་མི་སེར་ཕལ་བ་ཚུན་ཆད་ལ་རྡུང་བ་དང་འབྲེག་པ་སོགས་སེམས་ཀྱིས་མི་བཟོད་པ་ཤ་སྟག་བྱས། དེ་དག་ཀྱང་དང་པོ་ཉིད་ནས་ཆབ་སྲིད་ཀྱི་ཚོགས་སྡེ་ཤ་སྟག་ག་ལ་ཡིན། དང་པོར་བསམ་བློའི་ལྟ་གྲུབ་སྨྲ་བའི་མཁས་པ་དག་ལམ་དུ་ཞུགས། བར་ནས་དེ་ཡི་རིགས་སུ་གྱུར་པ་དག་རྗེས་སུ་རྒྱུགས། མཐར་ང་དང་མི་མཐུན་པ་དག་ཚར་གཅོད་དོ་ཞེས་བརྒྱ་ཁ་མཐུན་པས། དཔྱོད་ཤེས་ཀྱི་བློ་མིག་ཐམས་ཅད་སྐད་ཅིག་དེ་ཉིད་ལ་རྨེག་མེད་དུ་གྱུར། ཕྱིར་འཁོར་ནས་རང་གི་བྱས་ཉེས་ལ་བསམ་དུས། ཨ་ཙི། དེ་དག་གིས་ང་རང་གིས་བསྒྲུབས་པ་ཡིན་ནམ་སྙམ་པའི་བློ་འགྱོད་སྐྱེས་མཁན་ཡང་ཡོད་རབས་ཟེར་ཏེ། རྗེས་ནས་དེ་ལྟར་བསམ་པ་ལ་ཐམས་ཅད་འགྱངས་ཚར་བས་སྙིང་བོ་དེ་ཙམ་མེད། དེ་བས། ཞེ་སྡང་དང་ཁོང་ཁྲོས་བསྐྱེད་པའི་བྱ་བ་ཐམས་ཅད་ལོག་ལམ་དུ་འགྲོ་ཚབས་ཤིན་ཏུ་ཆེ་ཞེས་ཁོ་བོ་ཉམ་ཆུང་བ་ཞིག་ཀྱང་སེམས་ཁོང་དུ་ཆུད་པའི་སྐབས་འོང་ན། ཁྱོད་ཅག་འབུམ་རམས་པ་ཚུན་ཆད་ཀྱི་མཁས་པ་རྣམས་ནི་ལྟ་ག་ལ་ཞིག
འདི་དག་ལ་སེམས་ཀྱིན་ཁྱོད་རང་གིས་གང་བཤད་པའི་སྐད་ཆ་དག་ལ་ལེགས་པར་སོམས་དང་། ནོངས་འགྱོད་གཞན་ཞིག་འོང་རྒྱུ་མེད་དམ། བདེན་ན། ཁྱེད་ལ་སྐུལ་ཏེ། “ཁ་ཞིག་གྲགས་ན་མ་གཏོགས་འོས་མེད་རེད”ཟེར་མཁན་ཐམས་ཅད་ནི་ཕྱོགས་ཁ་བསྒྲིགས་མཁན་འབའ་ཞིག་ལས་དེ་དག་གིས་གནས་ལུགས་ཅི་ཞིག་ལ་བསམ་གཞིག་གཏོང་གི་འདུག་གམ། གལ་ཏེ་གྲོགས་མེ་ལྕེ་ལགས་ཀྱིས་ཅི་གསུང་བ་ཐམས་ཅད་ལ་གནས་ལུགས་ཏིལ་འབྲུ་ཙམ་མེད་ན་ནི་ཁྱེད་ཅག་ལ་འོས་མེད་ཡིན་པའི་བློ་ཅི་ཡང་སྐྱེས་མི་དགོས་པས་སེམས་ལྷོད་དུ་བཞག་ནས་དགོད་འཛུམ་དང་བཅས་ཇ་བཞེས་པས་འཐུས། གལ་ཏེ་གྲོགས་མེ་ལྕེ་ལགས་ཀྱིས་ཅི་གསུང་བ་དག་གནས་ལུགས་དང་ལྡན་པ་ཡིན་ན་ནི་འོས་མེད་ཀྱི་ལས་ཀ་མུ་མཐུད་དུ་བྱས་ཏེ་ནོར་འཁྲུལ་ལ་སྣོན་མ་རྒྱག་དགོས་པའི་གནས་ལུགས་ཤིག་སུ་ཡིས་བསྩལ་ཏམ་ལགས། ནོར་འཁྲུལ་ནི་ཐུགས་དཀྱེལ་དང་གུ་ཡངས་ཀྱིས་ཡོ་བསྲང་ཐུབ་ཀྱི། དེ་ལ་ལྷན་པ་དགུ་བརྩེགས་ཀྱིས་ག་ལ་འོང་། གལ་ཏེ་ནོར་འཁྲུལ་ལ་ལྷན་པ་བརྒྱབ་ནས་འགེབ་ཐུབ་པ་ཞིག་ཡིན་ན་ནི་སྒེར་གཅོད་པ་དེ་དག་ལས་འཇོན་པོ་སུ་ཞིག་འོང་།
རྩོམ་རིག་འབའ་ཞིག་ནས་གླེང་ན་ཁོ་བོ་ཆ་ཙམ་སྨྲ་བའང་མི་སྤོབས་མོད། ཆབ་སྲིད་ཀྱི་མཐོང་སྣེ་སྤྱད་དེ་བལྟས་ན། སྤྱི་ཚོགས་ཤིག་གི་འཕེལ་རྒྱས་ནི་དེའི་དགག་སྒྲུབ་ལ་རག་ལས། ཆབ་སྲིད་ནི་ནོར་འཁྲུལ་གྱིས་ཁྱབ་ནས་ཡོད་པས་དེ་ལ་ནམ་ཞར་ཡང་ཤེས་ཡོན་ཅན་གྱི་དགག་སྒྲུབ་ཀྱིས་གཏོང་བ་མེད། སྒེར་གཅོད་ཀྱི་ཁ་འབར་བའི་ན་ཛི་དང་སུའུ་ལེན་སོགས་ཀྱི་སྐབས་སུའང་རྒྱུ་འབྲས་བློ་མིག་དང་ལྡན་པའི་ཤེས་ཡོན་ཅན་གྱི་སྐད་སྒྲ་ཡིས་མི་རྣམས་རྨོངས་པ་ལས་བསླངས་པ་ཡིན། ཇི་སྲིད་མིའི་སྤྱི་ཚོགས་གནས་པ་དེ་སྲིད་དུ་ཤེས་ཡོན་ཅན་གྱི་ཡི་གེ་དག་རིན་ཐང་གིས་གནས་པ་ཡིན་མོད། “ཁྱེད་ཀྱི་ནམ་རྒྱུན་གྱི་བཤད་སྒྲོས་སོགས་དང་མཐུན་པས་དེ་ལ་དང་དོད་མ་བྱས”ཞེས་པ་བཞིན། རང་རེ་རྣམས་ནམ་ཞར་ཡང་ཤེས་ཡོན་ཅན་གྱི་སྐད་སྒྲ་ལ་དང་དོད་མི་བྱེད་པ་འདི་ཨ་མཚར། ཤེས་ཡོན་ཅན་ནི་གཞན་གྱི་ཡོན་ཏན་ལ་ཕྲག་པ་དོག་པས་མ་ཡིན་ཏེ། གཞན་སྐྱོན་སྣ་གཅིག་གིས་ཀྱང་ཐུན་མོང་གི་སྤྱི་ཚོགས་ལ་ཤུགས་རྐྱེན་སྣ་ཚོགས་ཐེབས་པ་ལ་མ་བཟོད་པ་ཡིན་མོད། བློ་མ་དག་པ་རྣམས་ནི་དགོད་བྲོ་བའི་གཏམ་སྣ་ཚོགས་ལབ་པ་ལ་མཁས། དེ་ལྟར་ཟེར་མཁན་ཁྱོད་ཅག་འབའ་ཞིག་ག་ལ་ཡིན་ཏེ། སྒེར་གཅོད་པ་དེ་དག་གིས་ཀྱང་ཤེས་ཡོན་ཅན་གྱི་ཁ་ན་གནས་ལུགས་མེད་པ་དང་། དེ་དག་ལ་དང་དོན་བྱེད་རིན་མེད་པ། དེ་དག་ནི་ཁོ་རང་ཚོའི་ཕུན་ཚོགས་སེམས་ཀྱིས་མ་བཟོད་པ་ཤ་སྟག་ཡིན་ཚུལ་ལབ། དེ་ལྟ་ནའང་། སྒེར་གཅོད་པའི་མགོ་རྟིང་བསློགས་པ་ལ་ཤེས་ཡོན་ཏན་མེད་དུ་མི་རུང་བའི་གནས་ལུགས་ལ་ཁྱོད་ཅག་ཀྱང་མི་རྨོངས་པའི་ཚོད་ཡིན། སོམས་དང་། མིའི་གཉུག་གཤིས་ནི་ཅི་ནས་ཀྱང་ཤིན་ཏུ་ཆ་འདྲ་བོ་མ་རེད་དམ།
ལར་ཤེས་ཡོན་ཅན་ལངས་ཤོར་དུ་སོང་བའི་སྐབས་ཤིག་ཨེ་ཡོད་སྙམ་མོད། བརྒྱ་ལ་ཡོད་ན་ནི་སྨྲ་བརྗོད་རང་དབང་གི་དུས་རབས་ཤིག་ངེས་པར་ཡིན་དགོས། ཅི་ཙམ་སྨྲ་བརྗོད་ལ་རང་དབང་ལྡན་པ་དེ་ཙམ་དུ་ཤེས་ཡོན་ཅན་གྱི་དགག་རྩོམ་འབོལ་ཆེན་ཐོན། ཅི་ཙམ་ཤེས་ཡོན་ཅན་གྱི་དགག་རྩོམ་འབོལ་ཆེན་ཐོན་པ་དེ་ཙམ་དུ་སྣོག་ལས་ལ་གོམས་པའི་མི་རྣམས་འཚིག་པ་ཟ། ཤེས་ཡོན་ཅན་གྱི་རྒྱུ་འབྲས་བློ་མིག་གིས་ཡས་མཐའི་སྒེར་གཅོད་པའི་སྲིད་དབང་ཚུན་ཆད་དང་། མས་མཐའི་ཡོན་ཏན་པའི་རུལ་སུངས་ཐམས་ཅད་གཅིག་ཀྱང་གུ་ཡངས་སུ་གནང་བ་མེད་པས། དེ་དག་ཐམས་ཅད་བརྒྱ་ཁ་མཐུན་ཏེ་ཤེས་ཡོན་ཅན་ལངས་ཤོར་དུ་སོང་བ་མི་ལེགས་ཞེས། གོང་ནས་གནོན་ཞིང་འགབ་ནས་བཙིར། དེ་ལྟར་བྱས་པའི་མཇུག་འབྲས་ལ་ཁོ་རང་ཚོ་འཆམ་མཐུན་གྱི་མིང་གིས་སྙན་སྙན་དུ་བརྗོད། ཁྱོད་རང་ཡང་དེ་ལྟར“ལངས་ཤོར་དུ་འགྲོ་བཞིན་པའི་སློབ་གྲོགས”ལ་བཙིར་འདེད་ཐེངས་ཤིག་བྱ་སྙམ་གྱིས་ལམ་དུ་ཆས། ལམ་དུ་ཆས་མ་ཐག་ནས་གྲོགས་ཀྱི་འདང་བརྩེའི་རྟེན་འབྲེལ་ཚུན་ཆད་ལ“ཁ་ཞེ་མི་མཐུན་པའི་སྦྱོར་བ”ཞེས་དམོད་ཅིང་། ཐ་ན་སྐད་གདངས་ཀྱི་མཐོ་དམའ་ཐམས་ཅད་སྦ་གསང་མེད་པར་ཀུན་གྱི་སྤྱན་སྔར་བྱོ། ངའི་ཕ་ཡུལ་ནས་འདི་དང་འདི་ལྟ་བུ་ལ་རྒན་མོ་སྨྱོན་མའི་ཁ་ཞེས་དམའ་འབེབ་པ་ཡིན་མོད། དིང་སང་འདི་ལྟར་མཐུན་དུས་ཀྱི་ནང་གཏམ་ཐམས་ཅད་ཁྲོམ་ཆེན་པའི་དཀྱིལ་ལ་སྒྲོག་མཁན་ཇེ་མང་ནས་ཇེ་མང་དུ་འགྲོ་བའང་རིག་གཞུང་གི་ཤུགས་རྐྱེན་བཞིན་སྤང་ལ་མེ་མཆེད་པ་ལྟར་ཁྱབ་ནས་འགྲོ་བས་སྐྱོ་ཨང་།
ཞིབ་ཏུ་བསམ་ན་རྨོངས་དགོས་པ་ཅི་ཡང་མེད་མོད། རང་གི་སྙན་གྲགས་ཙམ་ལ་ང་རྒྱལ་གྱིས་ཁེངས་པ་རྣམས་ནི་གནས་ལུགས་ཀྱི་གྲོས་ལ་ཁ་མིག་མི་གཡོར། གྲོགས་མེ་ལྕེའི་རྩོམ་ཐུང་དེ་ཉིད་ཧྲིལ་གྱིས་བཀླགས་ན་ཁྱོད་རང་གི་སྒེར་ལ་བརྣག་པའི་བརྗོད་བྱ་ཅང་མེད་མོད། མིང་ཐོན་པ་ཙམ་གྱིས་ང་རང་གཟས་པ་ཡིན་སྙམ་གྱི་འཁུ་འཁྲིག་དང་། གཡས་གཡོན་གྱི་ཁ་མང་དག་གི་ཁ་ལ་རྒྱུགས་ཏེ་ཁྱོད་ཀྱང་ཧོལ་རྒྱུགས་ཐེངས་ཤིག་བྱས་པ་ཡིན་འདུག སྒེར་གྱི་གནད་དོན་དང་སྤྱི་པའི་སྣང་ཚུལ་ནི་གཉིས་སུ་འདུག ཁྱོད་རང་གིས་སྤེལ་བའི་མཛད་སྒོ་རྒྱ་ཆེན་པོ་དང་། དེ་ཡི་སྟེང་གི་གཏམ་བཤད་ཤོམ་ཆེན་པོ་དག་ནི་སྒེར་གྱི་གནད་དོན་ཙམ་ལས་འདས་ཏེ། སྤྱི་པའི་སྣང་ཚུལ་དུ་གྲུབ་པས། གཞི་ནས་རྩོམ་ཐུང་རྣོ་ངར་ཅན་དེ་འདྲ་ཞིག་ཐོན་པ་མིན་ནམ། སྣང་ཚུལ་དེ་ཁྱོད་ཅག་རེ་རེས་བཟོས་པའི་མཇུག་འབྲས་ཡིན་མོད། དེ་རེ་རེ་ལ་རྩོམ་རེ་འབྲི་དགོས་ན་སྙིང་བོ་ཏིལ་ཙམ་མེད་པ་ཁྱོད་ཀྱང་ཤེས། དེས་ན། སྣང་ཚུལ་དེ་ཉིད་གཞིར་བྱས་ཏེ། ཁྱོད་རང་གིས་ཁས་བླངས་པ་བཞིན་གྱི“བསྟོད་པ་ཅུང་ཐལ་ཆེ་བའི”མཁས་པ་ཆེ་ཆུང་ཀུན་ནམ། “འབུམ་རམས་པའི”ངོ་བསྟོད་ཁ་གསག་གི་རུལ་སུངས་ལ་ཐེར་འདོན་ཐེངས་ཤིག་བྱས་པས་ཁྱོད་རང་དེ་ཙམ་འཚབ་ལངས་དགོས་པའང་ཨེ་འདུག་གམ། ཞིབ་ཏུ་ཕྱེས་ན། ཉིན་འགའི་སྔོན་ལ་ཁ་པར་བརྒྱུད་ནས་ཁྱོད་ལ་རྟེན་འབྲེལ་ཞུས་པ་ནི་ཁྱོད་རང་མི་སྒེར་གྱི་བྱས་འབྲས་ལ་རྗེས་སུ་ཡི་རང་མ་རེད་དམ། གྲོགས་ཀྱི་འདང་བརྩེ་མ་རེད་དམ། རིགས་ཀྱི་ཞེན་ཁོག་མ་རེད་དམ། མི་སྒེར་གྱི་འབྲེལ་བ་ནི་དེ་ལྟར་མཚོན་དགོས་པ་མ་རེད་དམ། ད་རེས་ཀྱི་སྣང་ཚུལ་ལ་རུལ་སུངས་ཐེར་འདོན་གྱི་རྩོམ་ཞིག་སྤེལ་བ་ནི་སྤྱི་པའི་ལས་དོན་ལ་འགན་ཁུར་བ་མ་རེད་དམ། ང་ཚོར་ཡོད་འོས་པའི་རྩ་དོན་གྱི་དོན་དག་མ་རེད་དམ། འགྲོ་མིའི་སྤྱི་ཚོགས་ཀྱི་ཕྲ་རགས་ལ་ཤིན་ཏུ་ཞིབ་ཆེ་བའི་ནུབ་ཕྱོགས་པ་རྣམས་དེ་ལྟར་འབྱེད་པ་མ་རེད་དམ། སྤྱི་སྒེར་གཉིས་ཀྱི་དབྱེ་མཚམས་ཀྱང་འཁྲུགས་དགོས་པའི་འུ་ཅག་ཅི་ཞིག་གིས་ཉེས་སམ། རྩ་དོན་ལྟར་བཤད་ན། ངོ་བསྟོད་ཁ་གསག་གི་ལས་རྣམས་ཕུད། ཁྱོད་རང་གིས་རྒྱ་ཡིག་ཏུ་བཟོས་པའི་དེབ་ལ་འགྲེམ་སྟོན་དེ་འདྲ་རྒྱ་ཆེན་པོ་ཞིག་ཚོགས་དགོས་པའི་དགེ་བ་ཁྱད་པར་ཅན་ཅི་ཡང་མི་མཐོང་། གལ་ཏེ། “དེའི་ཤུགས་ན་རྣམ་འགྱུར་མང་པོ་ཞིག་སྟོན་བཞིན་ཡོད”ན། དེ་ནི་རྒྱ་ཡིག་པར་མའི་འགྲེམ་སྟོན་གྱིས་སྟོན་དགོས་པ་མ་ཡིན་པར། བོད་ཡིག་པར་མའི་འགྲེམ་སྟོན་གྱིས་སྟོན་དགོས་པ་ཡིན་མོད། ཁྱོད་རང་གིས་དོན་དངོས་སུ་ཇི་ལྟར་བསམ་ཡོད་པ་སྐྱེ་བོ་ཕལ་བ་སུ་ཞིག་རྟོགས། ནམ་ཞིག ཁྱོད་རང་གིས་བོད་ཡིག་པར་མའི་དེབ་ཀྱི་འགྲེམ་སྟོན་རྒྱ་ཆེན་པོ་བསྡུས་ཏེ་རྣམ་འགྱུར་མང་པོ་སྟོན་ནུས་ན། གྲོགས་མེ་ལྕེ་ལགས་ཀྱང་སྔར་བཞིན་རྟེན་འབྲེལ་ཞུ་བ་ལ་བློ་ལྡན་སུ་ཞིག་ཡིད་གཉིས་འགྱུར།(ངོ་བསྟོད་རྐྱང་བ་མིན་པའི་དོན་གནས་ཀྱི་དཔྱད་བརྗོད་ནི་མེད་དུ་མི་རུང་།) རྒྱ་ཡིག་སློབ་གྲྭའི་འབུམ་རམས་དཔྱོད་རྩོམ་རྒྱ་ཡིག་ཏུ་འབྲི་དགོས་པའི་བླང་བྱ་གྲོགས་མེ་ལྕེས་མ་ཤེས་པ་ག་ལ་ཡིན། ཤེས་པ་དང་ལྷག་ཏུ་ཁྱོད་རང་གིས་བོད་ཡིག་པར་གཞི་ཞིག་ཀྱང་གྲ་སྒྲིག་བྱས་ཡོད་པ་སོགས་རྗེས་སུ་ཡི་རང་གིས་རྟེན་འབྲེལ་ཞུས་པ་ཅི་ལ་མིན། ཞུ་དགོས་པ་ཡང་ཡིན། ཡིན་མོད། ཁྱོད་རང་དཀའ་ལས་བརྒྱབ་ཚད་ལ་གཞན་གྱིས་བཟང་ངན་བརྗོད་མི་ཆོག་པའི་ང་རྒྱལ་དེ་ཉིད་ཇི་ལྟར་སྐྱེས་པ་ལགས་སམ། སྣང་ཚུལ་གྱི་ངོས་ནས་བཤད་ན་གནད་འགག་གཅིག་ནི་འདི་རེད། འབུམ་རམས་པ་ཚུད་ཡི་གེ་འབྲི་མཁན་ཐམས་ཅད་ཀྱིས་དཀའ་ལས་རྒྱག་གི་ཡོད་པ་རེད། དཀའ་ལས་བརྒྱབ་ཚད་ལ་གཞན་གྱིས་ཁ་གྲགས་མི་ཆོག་པ་ཡིན་ན། འདི་ལས་ཐུ་བའི་སྒེར་གཅོད་ཀྱི་ས་བོན་ཅི་ཞིག་ཡོད་དམ། ལེགས་པར་སོམས། གལ་ཏེ། འདིའི་སྐོར་ནས་ཞིབ་ཏུ་བགྲོ་གླེང་ལ་འཇུག་བསམ་ན་ངེད་གཉིས་ག་ལེར་འོང་བས་ཆོགའདིར་མང་པར་དོགས་ཏེ་མ་སྤྲོས།
ལོ་ཙའི་ལས་ཀ་འདི་ཉིད་རླབས་ཆེ་བ་ཁྱོད་རང་ཡང་སེམས། གཅིག་ཏུ་ན་ཁྱོད་རང་གིས་སྒྲུབ་སྒྲུབ་ཐམས་ཅད་རླབས་ཆེན་དུ་སྙམ་པ་ཡིན་ཡང་སྲིད་མོད། གང་ལྟར། ཁྱོད་ཀྱིས་གང་བསྒྱུར་པའི་ལས་ཀ་དག་ལ་གྲོགས་མེ་ལྕེ་གཙོས་ང་ཚོ་རང་གི་ལས་དབང་ལ་སེམས་ཁུར་བྱེད་མཁན་ཐམས་ཅད་ཀྱིས་རྗེས་སུ་ཡི་རང་མི་ཞུ་བ་ག་ལ་སྲིད། ཡིན་ནའང་། ང་ཚོས་མེས་པོའི་ལོ་རྒྱུས་ལ་མཇལ་ན། རང་གི་རིག་གནས་ཀྱི་རིན་ཐང་སྐྲུན་བྱེད་ཐམས་ཅད་ནི་གཞན་གྱི་མཆོག་ཏུ་གྱུར་པ་དག་ཚུར་བསྒྱུར་པ་དེ་ངེས་པར་ཡིན་པས། ཁྱོད་ཅག་རྩལ་དང་ལྡན་པ་དག་ལ་བློ་ཐག་ཉེ་བོས་དེ་ཙམ་གྱི་བླང་བྱ་བཏོན་པ་ཅིས་མི་འོས། ཤེས་ན་དེ་དག་ཐམས་ཅད་རང་གི་གཟི་བརྗོད་དུ་སོམས། ཤེས་ཡོན་ཅན་ལ་དེ་ལས་ལྷག་པའི་བརྩི་བཀུར་ཞིག་ཨེ་ཡོད་མི་ཤེས། གཞན་དུ་ན་རང་སེམས་ལ་ཅི་དྲན་དྲན་དུ་ཁ་བསྒྱུར་པས་འཐུས་སོ།།
གསར་རྩོམ་གྱིས་ངོས་ནས་གླེང་ན། མི་རིགས་ཤིག་གི་རིག་གནས་འཕེལ་རྒྱས་ལ་རྒྱུ་རྐྱེན་གཉིས་འདུག གཅིག་དེ་མི་རིགས་རང་གིས་གསར་རྩོམ་བྱེད་དགོས། གཅིག་དེ་མི་རིགས་གཞན་གྱི་ལེགས་ཆ་ཚུར་བསྒྱུར་དགོས། མི་རིགས་གཞན་གྱི་ལེགས་ཆ་ཚུར་བསྒྱུར་བ་གང་དེ་མི་རིགས་རང་གི་ཡི་གེ་རུ་ཕབ་པ་སྨོས་མ་དགོས། གསར་རྩོམ་ཡང་མི་རིགས་རང་གི་སྐད་ཡིག་ཏུ་ཕབ་དགོས་པ་གལ་ཆེ། མི་རིགས་གཞན་གྱི་སྐད་ཡིག་ལ་བྲིས་ནས་འདི་ང་ཚོའི་རིག་གནས་སོ་བརྗོད་མཁན་ཡང་མེད་པ་མིན་མོད་བྲིན་མི་ཆེ། ལྷག་ཏུ། མི་རིགས་རང་གི་སྐད་ཡིག་ཉམ་ང་ཉག་ཕྲའི་སྐབས་སུ། གཞན་གྱི་སྐད་ཡིག་ཏུ་བྲིས་ནས་ངས་ནི་རང་གི་མི་རིགས་རིག་གནས་ལ་ཕན་བཏགས་སོ་ཞེས་ང་རྒྱལ་ཆེན་པོ་བྱེད་པ་དག་མི་འོས། མི་རིགས་གཞན་གྱི་སྐད་ཡིག་ཏུ་བྲིས་ནས་ངའི་རིག་གནས་སོ་བརྗོད་མཁན་དག་ལ་ཁྱད་ཆོས་གཅིག་ཡོད་པ་ནི་མི་རིགས་དེ་གཉིས་ཀའི་སྐད་ཁོངས་འདྲ་བའོ། །བོད་རྒྱ་ཡིག་རིགས་གཉིས་ནི་སྐད་ཁོངས་རྦད་དེ་མི་འདྲ་བ་གཉིས་ཡིན་པ་ནི་ཁྱོད་ཅག་རྣམས་ཐུགས་ལ་ཆུད་པ་དེ་བཞིན་ནོ། །དེས་ན། ལེགས་པར་བསམ་དགོས་པ་འདི་འདྲའང་འདུག་པས་སྣང་ཆུང་མ་བྱེད་རོགས།
མཐར་ཞུ་འདོད་པ་ཞིག་ལ། ཁོ་བོ་དྲ་ངོས་ཀྱི་འབོལ་རྩོམ་འབྲི་མཁན་ཞིག་གིས་ཁྱོད་འབུམ་རམས་པ་རིག་གཞུང་གི་དེབ་རྩོམ་མཁན་ཞིག་ལ་འདི་ཙམ་སྨོས་པས་བརྔོ་མི་ཐོགས་མོད། ལེགས་བཤད་བྱིས་པའི་ཁ་ལས་ཀྱང་། །མཁས་པ་རྣམས་ཀྱིས་ཡོངས་སུ་ལེན། །ཞེས་པ་བཞིན། མེས་པོའི་བློ་ཁོག་ལ་བསམ་ནས་ཁྱོད་ཅག་ཀྱང་རྩིས་མེད་མི་གཏོང་བའི་གདེང་བྲོད་ཡོད། ད་རེས་རྩོམ་བྱང་ལ་ཁྱོད་ཀྱི་མིང་གིས་སྨོས་པས་འདི་ཡང་མི་གཞི་ལ་རྡོག་བརྫིས་སུ་སོང་འདུག་སྙམ་པ་མ་འཆར་རོགས། དེ་ཁྱོད་རང་མ་ཤེས་པ་ཡིན། མི་གཞི་ཞེས་པ་ནི་མིང་གིས་སྨོས་པ་ཙམ་གྱིས་རྡོག་བརྫིས་སུ་འགྲོ་བ་ཡིན་ན་ང་རང་ཚོ་མི་རེར་མིང་རེས་ཅི་བྱེད་དམ། འཁྲུག་པའི་གཞི་མིན་ནམ། གལ་ཏེ་སྐྱོན་ལ་འཇིགས་ཏེ་བཤད་པ་ཡིན་ན་ནི། མིང་གིས་མ་བཟུང་ཡང་མི་གཞི་བརླགས་ཚར་བ་ཡིན་པས་རང་གིས་རང་ལ་ལེ་འདེད་པ་ལས་འོས་མེད། གནས་ལུགས་དང་ལྡན་ན་དྲ་ངོས་ཀྱི་རྩོམ་ཐུང་ཙམ་མ་ཟད། ཚིགས་སུ་བཅད་པ་གཅིག་གི་དོན་དུ་སྲོག་ཚུན་ཆད་བཏང་བའི་ལོ་རྒྱུས་ཡོད་ན། ཡི་གེ་མང་ཉུང་ཙམ་ལ་ང་རྒྱལ་མ་བྱེད་རོགས། རང་རེ་རྣམས་རྨོངས་པའི་མཐར་ཐུག་ཏུ་འགྱུར་ཉེན་ཆེའོ་ཞེས།
ཡུལ་བླ་བྲང་གི་ཡི་གེ་བ་ཞོགས་ལྗང་དུ་འབོད་པས་ཤར་མར་སྤེལ་བ་དགེའོ།། ༢༠༢༥ ༡༠ ༢༦
