ཕུན་ཚོགས་གནས་མཆོག་ཙོང་ཁའི་སྐྱེད་ཚལ་དུ།།
བསྟོད་འོས་ལྷ་དང་ལུང་གིས་ཡང་ཡང་གཞོལ།།
སྐལ་བས་རྙེད་པའི་བསམ་འཕེལ་ཡིད་བཞིན་ནོར།།
རེ་ལྟོས་མཐོང་བ་དོན་ལྡན་དེ་ལ་འདུད།།
ལེགས་ཚོགས་མཛད་འཕྲིན་ཉི་ཟླའི་འོད་སྣང་ལྟར།།
སྤྲོ་མཛད་ཁྱེད་ཀྱི་རྣམ་ཐར་ཤིན་ཏུ་མངས།།
མཁས་བཟང་བཙུན་པའི་ཡོན་ཏན་ཇི་བཞིན་དུ།།
སྨྲ་བའི་ལྕེ་བརྒྱ་སྤྲུལ་ཀྱང་ག་ལ་ནུས།།
གཤིས་སུ་གྲུབ་པའི་བྱམས་བརྩེའི་མཐུན་སྦྱོར་གྱིས།།
ང་རྒྱལ་ཁྱོད་ཕམ་རྩོད་པའི་རབ་རིབ་བསལ།།
འཇིག་རྟེན་རེ་བའི་མགོན་དང་ཡིད་རྟེན་དུ།།
བཞུགས་པའི་སྐྱབས་གཅིག་དམ་པ་ཞབས་བརྟན་གསོལ།།
མཉེས་གཤིན་བྱམས་པའི་སྟོབས་ཀྱིས་དགྲ་ལ་ཡང་།།
ཕ་མ་དང་ནི་བུ་ལ་བརྩེ་བ་ཡི།།
ཐུགས་རྗེའི་སྣང་བ་འབར་བའི་གཟི་བྱིན་ཅན།།
ཕན་བདེའི་འབྱུང་གནས་བླ་མའི་སྐུ་དྲིན་དྲན།།
དབུལ་ཕྱུག་གོ་ས་རིགས་རུས་མཐོ་དམན་ཀུན།།
སྡུག་བསྔལ་མི་འདོད་བདེ་བས་ཕོངས་པ་ལ།།
གང་འདུལ་རེ་བ་སྐོང་བའི་བསམ་འཕེལ་དབང་།།
བརྩེ་བའི་བདག་ཉིད་བླ་མ་སྤྱན་རས་གཟིགས།།
ལྷར་བཅས་སྐྱེ་དགུའི་དབུས་སུ་ཐུབ་དབང་བཞིན།།
འཕྲལ་ཕུགས་གཉིས་ཕན་རིགས་ཁམས་དག་པའི་དབྱིངས།།
མ་རྟོགས་འགྲོ་བ་སྒྲོལ་བའི་ཐབས་ཚུལ་རྣམས།།
གང་འདུལ་སྐྱེ་བོ་ཁྲི་མ་འབུམ་ལ་གདམས།།
གསུང་གི་ཆེ་བས་རྟེན་འབྱུང་ལེགས་པར་འདོམས།།
བདག་བས་གཞན་གཅེས་སྟོབས་ཀྱིས་ཞིང་འདི་རུ།།
བདེ་སྐྱིད་རེ་བ་སྐོང་བའི་འཕྲིན་ལས་ཅན།།
གོང་ས་རྒྱལ་བའི་དབང་བོ་ཁྱེད་ཉིད་ཙམ།།
ས་སྟེང་བསྟན་པའི་བདག་པོ་ཁྱེད་འཁྲུངས་ཚེ།།
རྟག་ཏུ་ཆོས་མེད་སྨྲ་བའི་ཡུལ་ནས་ཀྱང་།།
གངས་ཅན་ཆོས་ཚུལ་རིག་པའི་འཕྲིན་ལས་རྒྱས།།
ཁྱེད་ཀྱི་བཀའ་དྲིན་འདི་འདྲ་གང་ལས་རྙེད།།
ས་ལམ་རྟོགས་པའི་མཛོད་ལ་མངའ་བརྙེས་ཤིང་།།
རྟག་ཏུ་གཞན་ཕན་སེམས་མཆོག་ཐུགས་ལ་འཁྲུངས།།
ལུས་ཅན་འགྲོ་བ་སྐྱོབ་པའི་ཐུགས་རྗེ་ཅན།།
ཆོས་ནོར་ཐར་པའི་དཔལ་སྟེར་ཁྱེད་མིན་སུ།།
གཉེན་ལ་བྱམས་དང་བརྩེ་བས་དགྲ་ཡང་སྐྱོང་།།
བྱང་གྲོལ་ལམ་སྟོན་ཀླུ་སྒྲུབ་ཞབས་ཀྱི་ཟླ།།
དཔལ་ལྡན་ཡོན་ཏན་བྱེ་བའི་མཛོད་ལ་སྤྱོད།།
ཐུབ་དབང་གཉིས་པ་ཁྱོད་ལས་གཞན་ན་གང་།།
སེམས་ཀྱི་བདེ་སྐྱིད་བསྐྲུན་པའི་རྒྱབ་རྟེན་དུ།།
བྱང་ཆུབ་སེམས་མཆོག་ཉིད་ལས་གཞན་མེད་ཅེས།།
གདམས་པའི་འོད་དཀར་འགྱེད་པའི་ཀེ་ལ་ཤ།།
རྒྱལ་བསྟན་ས་ཆེན་མཛེས་པའི་རྒྱན་དུ་ཆེ།།
རྒྱལ་བསྟན་ཡོངས་རྫོགས་ཉམས་ཤིང་འཇིག་པ་ན།།
གཞན་ཕན་སེམས་ཀྱིས་བསྐྲུན་པའི་ལེགས་བྱས་ལས།།
ཁྲིམས་ལྡན་འདུས་སྡེ་དར་བའི་དཔལ་ཡོན་དེའི།།
ངོ་མཚར་གླིང་འདིའི་དཔྱོད་ལྡན་མི་རྣམས་གླེང་།།
མི་ཆོས་བསླབ་བྱ་གདམས་བྱའི་མན་ངག་སོགས།།
ཆོས་དང་སྲིད་ཀྱི་ལེགས་བཤད་སྐྱེས་བཟང་གིས།།
བོད་རིགས་ཆོལ་གསུམ་སྐྱིད་པའི་གངས་ལྗོངས་སུ།།
ཕུན་ཚོགས་སྡེ་བཞིའི་དཔལ་འཚོལ་སྐལ་བ་རྙེད།།
མགོན་པོ་གང་གི་གདུལ་བྱ་གངས་ཅན་པར།།
སྔོན་མེད་སྲོག་གི་རིན་ཐང་དར་བ་འདི།།
ལུང་གིས་མ་བསྒྲུབས་རིགས་པས་མ་དཔྱད་ཀྱང་།།
ཁྱེད་ཀྱི་དྲིན་དུ་བདག་གིས་མངོན་སུམ་མཐོང་།།
ཆོས་རྒྱལ་གོང་མའི་འཁོར་འབངས་ཁ་བ་ཅན།།
སྲོག་དང་མ་བྲལ་ས་ཆེན་གོ་ལའི་སྟེང་།།
བཙན་པོའི་སྙིང་སྟོབས་མ་དོར་ཁྱེད་ཀྱི་དྲིན།།
དྲན་ནོ་བདག་སོགས་མགོན་པོ་ཐུགས་རྗེའི་གཏེར།།
ཇི་སྲིད་བར་དུ་གངས་ཅན་བོད་ཡུལ་གྱི།།
རིག་གཞུང་ནོར་བུ་རིན་ཆེན་བདུན་གྱི་མཛོད།།
མི་ཉམས་དངོས་དང་བརྒྱུད་པའི་མ་ལུས་ཀུན།།
སྤེལ་མཁས་ཁ་བའི་སྐྱབས་གཅིག་དེ་ལ་གུས།།
ཉམས་རྒུད་ཁྲོད་ཀྱི་སྐྱེ་བོ་མགོན་མེད་པ།།
སྲད་བུའི་སྦུབས་སུ་ཚུད་པའི་དགྲ་ལ་སོགས།།
མ་དག་ལས་ཀྱིས་གནས་འདིར་ཡང་ནས་ཡང་།།
མནར་བའི་མགོན་དཔུང་གང་དེའི་མཛད་ལ་རངས།།
དར་ནས་རྒུད་པར་ཐུག་པའི་གངས་ཅན་མགོན།།
གཏེར་དང་འདྲ་བའི་བྱང་ཆུབ་སེམས་ལ་དབང་།།
རྣམ་དག་རྒྱལ་བའི་དཀྱིལ་འཁོར་རྫོགས་པའི་ཐུགས།།
ལྗོངས་འདིའི་ཐུབ་བསྟན་བདག་པོ་དེ་ལ་འདུད།།
སྲིད་པའི་གྲོང་ལ་བསམ་བཞིན་སྤྲུལ་བའི་སྐུ།།
ཞི་བདེའི་དེད་དཔོན་ཞི་བདེ་འབྱུང་བའི་གནས།།
པད་དཀར་ལྟར་བསྔགས་ཐུབ་བསྟན་རྒྱ་མཚོའི་རྒྱན།།
དུས་ཀྱི་སྟོན་པ་ཆེན་པོའི་མཚན་སྙན་ལྡང་།།
སྲིད་ཞིའི་ལེགས་ཚོགས་འདོད་རྒུར་འཇོ་བའི་དཔྱིད།།
རྒྱལ་བའི་རྒྱལ་ཚབ་ངུར་སྨྲིག་འཆང་བའི་གར།།
གངས་དཀར་རྒྱན་དུ་འཁྲུངས་པ་ཁྱེད་ཀྱི་སྐུའི།།
འཁྲུངས་རབས་དྲན་ན་དད་པས་བ་སྤུ་གཡོ།།
ཡངས་པའི་ཁམས་འདིར་མཚན་སྙན་འབར་ན་ཡང་།།
བཅོས་མིན་ཐུགས་ལ་ཁེངས་དྲེགས་འབྱུང་བ་མེད།།
རྗེས་སུ་འཛིན་པའི་གདུལ་བྱ་ཡོངས་རྫོགས་ལ།།
བརྩེ་བ་འདི་ནི་ལྷད་མེད་བ་སོའི་མདངས།།
མིག་གིས་མཇལ་ན་ཆ་བྱད་མཛེས་པའི་སྐུ།།
མཁྱེན་པའི་མཁའ་ཀློང་རྒྱ་མཚོ་བཞིན་དུ་ཡངས།།
ལེགས་པར་བཤད་པས་གྲུ་འཛིན་བདག་པོ་ཞེས།།
གླིང་བཞིའི་མི་ཡི་ངག་ནས་ཡང་ཡང་གླེང་།།
ས་ཆེན་ཁྱོན་འདིར་དཔེ་དང་མཚུངས་ཟླ་བྲལ།།
བརྩེ་བའི་གཏིང་མཐའ་རྒྱ་ཆེན་རོལ་མཚོའི་ཀློང་།།
མཛད་ཆེན་རྣམ་བཞིས་བསྟན་འགྲོ་སྐྱོང་བའི་གཉེན།།
ཁྱེད་ཀྱི་གོ་སྟོན་སྙིང་གི་ཁོང་ནས་བསུ།།
གླིང་བཞིའི་མཁའ་ལ་ཉི་ཟླ་བཞིན་དུ་ཤར།།
མཛད་པའི་བྱ་བ་མཚོ་ཆེན་བཞིན་དུ་འཕེལ།།
བདེན་པར་སྨྲ་བའི་གསུང་འདི་གདམས་པའི་ཕུལ།།
བསམ་ཞིང་བསམ་ན་གང་གི་བཀའ་དྲིན་དྲན།།
ཐུབ་པའི་གསུང་གིས་བསྔགས་པའི་རང་ཡུལ་གྱི།།
ཆོས་ལྡན་རྒྱལ་ཁབ་ལུགས་ཟུང་ཀུན་དགའི་ཚལ།།
སྣ་ཚོགས་ཤིང་རྟའི་འོད་ཀྱིས་བསྐྱངས་པ་འདི།།
ནང་གི་བསམ་པའི་གདུང་སེལ་མུན་འཇོམས་དངོས།།
དག་པའི་གནས་མཆོག་འཕགས་པའི་ཞིང་ཉིད་དུ།།
བཅོས་མིན་དྭངས་པའི་མཁའ་ལ་ཀུན་གསལ་བཞིན།།
བུ་རམ་ཤིང་བའི་མཛད་འཕྲིན་གཉིས་པ་ཞིག །
སླར་ཡང་བསྐྱངས་པ་བསྟན་པའི་རྐྱེན་སེལ་ཉིད།།
ཚངས་ཆེན་བློ་ཡིས་མ་བཀོད་ལས་སྨོན་ལས།།
རྙེད་པའི་འཕགས་མཆོག་ཁྱེད་ཐུགས་བརྩེ་བའི་དབྱིངས།།
བུ་སློབ་ཉམས་ཐག་སྐྱོབ་པའི་གུར་ཁང་ལ།།
ཡང་ཡང་གནང་ཤོག་གངས་རིའི་ལྷ་སྐལ་མཆོག །
སྨོན་པའི་རྟ་མཆོག་རྒྱང་དུ་བྱོལ་བའི་ལམ།།
ཆེས་ཆེར་རིང་ཡང་སེམས་ཀྱི་ཕྱི་ནང་གསང་།།
ཆེ་བཙན་ཕོ་བྲང་དམར་བོའི་ཁྲི་འཕངས་ལ།།
གསོལ་འདེབས་ཐུགས་ནས་མ་དོར་གངས་རིའི་མགོན།།
ལྷག་པར་གླིང་འདིར་འཚེ་བ་མེད་པའི་ལམ།།
རྒྱ་ཆེར་སྤེལ་བས་གྲགས་པ་ས་གསུམ་གྱི།།
ཁྱོན་དུ་ལྡིར་བའི་མཚན་སྙན་དབྱར་མཚོ་བཞིན།།
དར་བ་ཁྱེད་ནི་ཐུགས་རྗེ་ཆེན་པོ་དངོས།།
བྱམས་བརྩེའི་མཛེས་སྡུག་བཞད་པའི་འཇུག་པ་བརྒྱས།།
འཕྱིན་ལས་གསལ་ལྡན་ཟེར་འཕྲེང་གཡོ་བའི་གར།།
བསྟན་པའི་རྒྱན་དང་གདུལ་བྱ་རྒྱ་མཚོའི་མགོན།།
གསོལ་བ་འདེབས་ཡུལ་ཁྱོད་ལས་གང་ན་སུ།།
རིན་ཐང་གང་གིས་གཞལ་དུ་མེད་པའི་ནོར།།
རྒྱལ་བསྟན་སྤེལ་མཛད་ཚད་མེད་སྙིང་རྗེའི་གཏེར།།
ཤུལ་དུ་ལུས་པའི་གྲུ་འཛིན་བདག་པོ་དེ།།
ཁྱེད་ལ་འོས་སོ་གང་གི་ཞབས་སོར་སྒྱུར།།
ཆོས་སྲིད་རྒྱལ་ཐབས་ཟུང་གིས་ཉེར་བསྐྲུན་པའི།།
བཙན་པོའི་ཕ་ཁྱིམ་གངས་རིའི་སྨན་ལྗོངས་དེ།།
གཉིས་སྨན་དབུ་མ་བསྟན་པའི་ལེགས་བྱས་ལས།།
ཤོར་བ་ཐོབ་པའི་བཞེད་དོན་འགྲུབ་ལ་ཉེ།།
བཙན་པོའི་མི་རྗེ་རྒྱལ་ཐབས་སྐྱོང་བ་ཚོའི།།
བཞུགས་གནས་བོད་ཀྱི་གྲགས་ཅན་དམར་བོ་རིར།།
ལྷན་འཛོམས་ཉིན་མོ་མ་རྫོགས་མི་རིང་བར།།
སྙིང་དུ་བརྣགས་པའི་འདོད་དོན་གསལ་བར་ངེས།།
རླབས་ཆེན་སྙིང་རྗེས་དྲངས་པའི་རྒྱལ་སྲས་ཤིག །
གྲུ་འཛིན་རི་ནས་མ་བཞུགས་བསྟན་འགྲོའི་དོན།།
ཕྱག་ན་པད་མོས་ཕྱག་གིས་ཡོངས་བཞེས་པ།།
ངོ་མཚར་མཛད་པའི་རི་དབང་ལྷུན་རེ་ཆགས།།
ཆོས་ཉིད་བདེན་པའི་སྟོབས་ཀྱིས་ཆོས་སྲིད་ཟུང་།།
རི་བོ་གངས་ཅན་ལྗོངས་འདིའི་སྐྱེ་འགྲོའི་ཚོགས།།
ཕྱི་ན་དགྲ་མེད་ནང་ན་གེགས་མེད་པར།།
སྐལ་བཟང་འཆར་བའི་རེ་བ་མྱུར་འགྲུབ་སྨོན།།
སྟོང་གསུམ་གསེར་གྱིས་མི་ཁུག་ཕ་མེས་ཆོས།།
ལྟར་སྣང་ལོག་སྨོན་ཁ་ལས་སྐྱོབ་པའི་མགོན།།
ཕྱག་ན་པད་མོའི་མཛད་འཕྲིན་འོད་ཀྱི་རིས།།
ཀུན་བཟོད་ཡངས་པོའི་ཐ་གྲུ་མཛེས་པར་ཤོག །
ཅེས་དུས་རབས་ཉེར་གཅིག་པའི་བླ་ན་མེད་པའི་སྟོན་པ་ཆེན་པོ། འཇིག་རྟེན་ཞི་བདེའི་དེད་དཔོན། སྤྱི་ནོར་༸གོང་ས་སྐྱབས་མགོན་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་དགུང་གྲངས་དགུ་བཅུ་བཞེས་པའི་སྐུའི་གོ་སྟོན་ལ་ཕུལ་བའི་བྱ་དཀའ་བའི་སྙན་ངག་གི་རྒྱན་གྱི་མཆོད་པ་རེ་བའི་རྫོགས་ལྡན་བསུ་བའི་ཕོ་ཉ་ཞེས་བྱ་འདི་ནི་རྒྱལ་དབང་ཐམས་ཅད་མཁྱེན་པའི་ཐུགས་རྗེའི་གྲིབ་བསིལ་གྱིས་འཚོ་བའི་སྙོམ་ལས་པ་གསེར་རྟ་ཚུལ་ཁྲིམས་བསྟན་འཛིན་ནམ། པིར་མིང་དུ་བོད་སྙུག་ཐོགས་པར་འབོད་པས་ཨུ་རུ་སུའི་རྒྱལ་ཁབ་ཀྱི་ཤར་ལྷོའི་ཕྱོགས་སུ་གནས་ཆགས་པ། རི་བོ་དགེ་རྒྱས་དགའ་ལྡན་བཀྲ་ཤིས་ཆོས་འཁོར་གླིང་ནས། བོད་རྒྱལ་ལོ་༢༡༥༢ བོད་ཟླ་ ༥ཚེས་ ༥ ཕྱི་ལོ་༢༠༢༥ ཕྱི་ཟླ ༦ ཚེས་ ༣༠ ཉིན་བྲིས་པ་དགེ་བར་གྱུར་ཅིག ། །།
