༡༽ དོལ་རྒྱལ་རྗེས་འབྲང་པའི་ཁུངས་མེད་ལོག་བཤད།
ཕྱི་ལོ་༢༠༢༥་ཟླ་༧་ཚེས་༢༡་ཉིན་དྲ་ལམ་དུ་དོལ་རྒྱལ་རྗེས་འབྲང་པ་འགའ་རེས་སྐད་ཆ་ཞིག་ཤོད་བཞིན་པ་མཐོང་འཕྲལ། ག་རེ་ཤོད་བཞིན་ཡོད་ཉན་པར། ཡུ་རོབ་དམངས་ཁྲོད་ཁ་བརྡ་ཟེར་བའི་ནང་རྟག་ཏུ་ལོག་བཤད་སྤེལ་མཁན་དོལ་རྒྱལ་རྗེས་འབྲང་པ་ད་ལྟ་སྤ་རན་སེའི་ནང་དུ་ཡོད་པའི་བཀྲ་ཤིས་དོན་གྲུབ་ཟེར་བ་དེས་ནམ་རྒྱུན་མཁས་དབང་དཀོན་མཆོག་རྒྱལ་མཚན་ཞེས་ལབ་འདུག་ས་ཨ་ར་དཀར་པོ་རིང་པོ་ཅན་དེས་༸གོང་ས་མཆོག་ལ་དགག་པ་རྒྱག་ཁུལ་བྱེད་བཞིན་འདུག ངས་དངོས་གནས་འདི་མཁས་དབང་ཞིག་ཨེ་ཡིན་སྙམ་ཞོར་ཁོའི་སྐད་ཆ་ལ་ཉན་སྐབས་ཁོས་ཉེ་སྔོན་༸གོང་ས་མཆོག་གི་བཀའ་སློབ་ཅིག་ལ་དགག་པ་རྒྱག་ཁུལ་བྱེད་བཞིན་འདུག ཁོས་དགག་ཡུལ་གྱི་བཀའ་སློབ་དེ་ཡང་། ༢༠༢༥་ཕྱི་ཟླ་༧་ཚེས་༡༠་ཉིན་༸གོང་ས་མཆོག་གིས། “ངས་དོལ་རྒྱལ་སྐོར་ལ་དོ་དོ་ཏན་ཏན་བྱས་ནས། ཞིབ་འཇུག་མཐར་ཕྱིན་པ་བྱས་པའི་འབྲས་བུ་དེ། གང་ལྟར་༸རྒྱལ་དབང་རིམ་བྱོན་དང་ཏོག་ཙམ་མ་འགྲིག་པ་ཞིག་རེད་བསྡད་འདུག བྱས་ཙང་ད། ང་ཡང་༸རྒྱལ་དབང་གོང་མ་ཚོའི་རྗེས་སུ་འབྲང་མཁན་ཞིག་རེད། དེ་ནས་བོད་ཁྲི་སྐོར་བཅུ་གསུམ་ལ་ལྟ་མཁན་ཞིག་རེད། བྱས་ཙང་དེ་འདྲ་ཡིན་དུས། དོལ་རྒྱལ་ཚོགས་པ་ཁོ་ཚོ་ཆུང་ཆུང་ཞིག་གི་ངོ་ལ་བལྟས་ནས། བོད་རྒྱ་ཆེའི་ཁྱོན་ཡོངས་ཀྱི་ལྟ་སྟངས་དེ་ལྷོད་ཡངས་བཏང་ན། ནོར་འཁྲུལ་རེད་ཨ། བྱས་ཙང་བློ་བདེ་བོ་བྱས་ནས་སྡོད་ཆོག” ཅེས་གསུངས་པའི་བཀའ་སློབ་དེ་མ་འགྲིག་རབས་དང་། དེ་ནོར་འཁྲུལ་ཡིན་རབས་ཟེར།
༢༽ ཚེས་གྲངས་ནོར་བའི་ལོག་བཤད།
འོན་ཀྱང་ཆེས་གད་མོ་འཆོར་བྱེད་ཅིག་ནི། ནམ་རྒྱུན་དཀོན་མཆོག་རྒྱལ་མཚན་ཟེར་བ་དེ་ལ་མཁས་དབང་ཟེར་མཁན་བཀྲ་ཤིས་དོན་གྲུབ་ཁོ་དང་། དཀོན་མཆོག་རྒྱལ་མཚན་ཨ་ར་དཀར་པོ་ཅན་བཅས་ཁོ་གཉིས་ཀས། ༸གོང་ས་མཆོག་གི་བཀའ་སློབ་དེའི་ཚེས་གྲངས་ཀྱང་ནོར་ཏེ། ༢༠༢༥་ཕྱི་ཟླ་༧་ཚེས་༡༢་ཉིན་གནང་བ་རེད། ཅེས་བསྐྱར་ལྡབ་ཡང་ལྡབ་བྱེད་བཞིན་འདུག མཁས་དབང་ཟེར་མཁན་དེ་དང་། རང་ཉིད་མཁས་དབང་ཞིག་ཡིན་མདོག་སྟོན་མཁན་འདི་གཉིས་ཀྱི་ངོས་ནས་དེ་འདྲ་རང་ནོར་ཨེ་ཡོད་དམ། སྙམ་མཁན་རེ་ཡོད་ན་དྲ་བྱང་འདི་ (https://youtube.com/watch?v=0YE_po9CCMU&si=finAsbwUSHf25sGQ)བརྒྱུད་ནས་ཞིབ་ཏུ་ལྟོས་ཤིག
༣༽ བཀའ་སློབ་གནང་བའི་ཚེས་གྲངས་ཁུངས་ལྡན་ངོ་སྤྲོད།
དངོས་གནས་བྱས་ན། ༸གོང་ས་མཆོག་གི་བཀའ་སློབ་དེ་ནི་༢༠༢༥་ཕྱི་ཟླ་༧་ཚེས་༡༠་ཉིན་གནང་བ་ཡིན་པ་ཉིན་དེའི་སྐུ་སྒེར་གྱི་དྲ་རྒྱས་གཙོས་དྲ་ལམ་ཁག་ཏུ་ཡོངས་གྲགས་རེད། དེ་ཡང་ཡིད་མི་ཆེས་མཁན་ཚོས་དྲ་བྱང་འདི་(https://www.facebook.com/share/v/19EAK5ezqw/?mibextid=wwXIfr) བརྒྱུད་ནས་ཞིབ་ཏུ་ལྟོས་ཤིག
༤༽ རྒྱ་ཁྱི་ཨ་ར་དཀར་པོ་ཅན་དེས་མུ་མཐུད་ལོག་བཤད་ཚབས་ཆེན།
བྱས་ཙང་༸གོང་ས་མཆོག་གི་བཀའ་སློབ་དེ་གནང་རྗེས་ཀྱི་ཉིན་༡༠་པ་སྟེ། ༢༠༢༥་ཟླ་༧་ཚེས་༢༠་ཉིན་ཁོ་ཚོས་༸གོང་ས་མཆོག་ལ་དགག་རྒྱག་བྱེད་ཁུལ་བྱེད་བཞིན་འདུག་ཀྱང་། དོན་དངོས་ལ་ཁོ་ཚོ་རང་ཉིད་ཀྱིས་༸གོང་ས་མཆོག་གིས་བཀའ་སློབ་དེ་གནང་སྐབས་ཀྱི་ཚེས་གྲངས་ཙམ་ཡང་མི་ཤེས་བཞིན་ཏུ། ༢༠༢༥་ཟླ་༧་ཚེས་༡༢་ལ་གནང་བ་རེད། ཅེས་ས་བསྒྲགས་གནམ་བསྒྲགས་ཧམ་བཤད་སྤེལ་བཞིན་འདུག ༸གོང་ས་མཆོག་ནས་བཀའ་སློབ་དེ་ཕེབས་ནས་ཉིན་༡༠་ལས་མ་འགོར་ཡང་། ད་དུང་དེའི་ཚེས་གྲངས་ཙམ་ཡང་ཡིད་ལ་མི་ངེས་ཤིང་། དེ་ལ་ཞིབ་འཇུག་བྱེད་མི་ནུས་པའི་བླུན་རྨོངས་གླེན་ལྐུགས་མི་ངན་འདི་འདྲ་རེས་ཀྱང་༸གོང་ས་མཆོག་ལ་དགག་པ་རྒྱག་ཁུལ་བྱེད་སྐབས། དེ་འགྲིག་ཡོད་ཤག་བྱས་ཏེ། བོད་ཀྱི་སྐད་ཡིག་མི་ཤེས་ཤིང་། གོ་བ་དང་རིགས་ལམ་ཅི་ཡང་མེད་པའི་རྒྱ་དམར་འཐབ་ཕྱོགས་གཅིག་གྱུར་ལས་ཁུངས་ཀྱིས་མི་ངན་འདི་རིགས་ལ་ལྐོག་ཏུ་དངུལ་དངོས་སྤྲོད་བཞིན་ཡོད་པ་ནི་ཡོངས་གྲགས་རེད། འོན་ཀྱང་དོན་དངོས་ལ་གླེན་ལྐུགས་མི་ངན་འདི་རིགས་ཀྱིས་རྒྱ་དམར་སྒེར་གཅོད་སྲིད་གཞུང་གི་གསང་བའི་དངུལ་དངོས་དེ་ཚང་མ་ཟ་ཤེས་པ་ཙམ་ལས། དེས་རྒྱ་དམར་སྲིད་གཞུང་ལ་ཕན་ཅི་ཡང་མི་ཐོགས་པར་མ་ཟད། རྒྱ་དམར་སྲིད་གཞུང་ཡང་ངོ་ཚ་ཁ་སྐྱེངས་དགོས་པའི་ཁུངས་མེད་ཧམ་བཤད་སྐྱག་རྫུན་ཤ་སྟག་བཤད་དེ། རྒྱ་དམར་སྲིད་གཞུང་མགོ་སྐོར་གཏོང་བཞིན་ཡོད་པའི་གནས་ཚུལ་འདི་རིགས་རྒྱ་དམར་འཐབ་ཕྱོགས་གཅིག་གྱུར་ལས་ཁུངས་ཀྱིས་ཤེས་རྟོགས་གསལ་བོ་བྱུང་ཚེ། དུས་དེ་ག་རང་ལ་རྒྱ་དམར་སྲིད་གཞུང་གིས་མི་ངན་འདི་རིགས་དང་འབྲེལ་བ་མཚམས་འཇོག་བྱ་ངེས་ཡིན་མོད། འོན་ཀྱང་རྒྱ་དམར་འཐབ་ཕྱོགས་གཅིག་གྱུར་ལས་ཁུངས་ཀྱི་དཔོན་རིགས་ཚོས་བོད་ཀྱི་སྐད་ཡིག་སོགས་ཡག་པོ་མི་ཤེས་པར་བརྟེན། ད་དུང་མི་ངན་འདི་ཚོས་དོལ་རྒྱལ་ཁ་ལ་ཁྱེར་ཏེ། མུ་མཐུད་རྒྱ་དམར་སྒེར་གཅོད་སྲིད་གཞུང་མགོ་སྐོར་གཏང་ངེས་རེད། དེ་ཡང་ཁོ་ཚོའི་འཇོན་ཐང་རེད་དོ། །ཧ་ཧ་ཧ།
ཡང་རྒྱ་ཁྱི་དཀོན་མཆོག་རྒྱལ་མཚན་ཟེར་བ་དེས། གོང་གསལ་ཉིན་དེའི་༸གོང་ས་མཆོག་གི་བཀའ་སློབ་ནང། “ངས་དོལ་རྒྱལ་སྐོར་ལ་དོ་དོ་ཏན་ཏན་བྱས་ནས། ཞིབ་འཇུག་མཐར་ཕྱིན་པ་བྱས་པའི་འབྲས་བུ་དེ། གང་ལྟར་༸རྒྱལ་དབང་རིམ་བྱོན་དང་ཏོག་ཙམ་མ་འགྲིག་པ་ཞིག་རེད་བསྡད་འདུག” ཅེས་གསུངས་པ་དེ་ནོར་འཁྲུལ་ཡིན་ཚུལ་དང་། དེ་ཡང་༸རྒྱལ་དབང་སྐུ་འཕྲེང་དང་པོ་བཞིའི་སྐབས་དོལ་རྒྱལ་བྱུང་མེད་རབས་སོགས་ཟེར་མོད། ༸གོང་ས་མཆོག་གི་བཀའ་སློབ་དེའི་ནང་། “༸རྒྱལ་དབང་རིམ་བྱོན་དང་ཏོག་ཙམ་མ་འགྲིག་པ་ཞིག་རེད་བསྡད་འདུག” ཅེས་གསུངས་པ་ཙམ་མ་གཏོགས། ༸རྒྱལ་དབང་རིམ་བྱོན་ཡོངས་རྫོགས་དང་དོལ་རྒྱལ་འགྲིག་མི་འདུག ཅེས་གསུངས་མེད་པས། འདི་ཙམ་གྱི་ཁྱད་པར་ཡང་མི་ཤེས་པའི་མཁས་དབང་ཞིག་ཇི་ལྟར་འབྱུང་ངམ།
ཡང་རྒྱ་ཁྱི་དཀོན་མཆོག་རྒྱལ་མཚན་ཟེར་བ་དེས། ༸གོང་ས་ལྔ་པ་ཆེན་པོ་དོལ་རྒྱལ་བསྟེན་མཁན་ཡིན་རབས་ཟེར། དེ་བདེན་ན། འོ་ན་༸གོང་ས་ལྔ་པ་ཆེན་པོས། དམ་མིན་དམ་བརྫུ་གྲགས་པ་རྒྱལ་མཚན་ཞེས། །སྨོན་ལམ་ལོག་པའི་དམ་སྲི་འབྱུང་པོ་འདིས། །བསྟན་དང་འགྲོ་བ་ཀུན་ལ་འཚེ་བྱེད་ན། །མགོན་སྐྱབས་དཔུང་གཉེན་མ་མཛད་ཐལ་བར་རློགས། །ཞེས་སོགས་དོལ་རྒྱལ་སྦྱིན་བསྲེགས་བླུག་སྐབས་ཀྱི་གཟུ་དཔང་རྩོམ་དགོས་དོན་གང་ཡིན་ནམ། ཀུན་གྱིས་མཐོང་སར་འདི་ལྟར་བདེན་རྫུན་གོ་ལྡོག་གི་ལོག་བཤད་སྤེལ་མཁན་གྱི་མཁས་དབང་ཞིག་ཇི་ལྟར་འབྱུང་ངམ།
ཡང་རྒྱ་ཁྱི་དཀོན་རྒྱམ་ཟེར་བ་དེས། ལམ་རིམ་འཇམ་དཔལ་ཞལ་ལུང་ནི་༸གོང་ས་ལྔ་པ་ཆེན་པོས་དོལ་རྒྱལ་ལ་བཤགས་པ་འབུལ་ཆེད་དུ་བརྩམས་པ་རེད་ཟེར། ཧ་ཧ་ཧ། ལམ་རིམ་འཇམ་དཔལ་ཞལ་ལུང་བརྩམས་ནས། ལོ་༡༨་འགྲོ་བཞིན་པའི་སྐབས་༸གོང་ས་ལྔ་པ་ཆེན་པོས་དོལ་རྒྱལ་སྦྱིན་བསྲེགས་བླུག་པ་ཙམ་ཡང་མི་ཤེས་པའི་མཁས་དབང་ཞིག་བྱུང་བ་ཡིན་ནམ།
ཡང་རྒྱ་ཁྱི་དཀོན་མཆོག་རྒྱལ་མཚན་ཟེར་བ་དེས། ༸གོང་ས་བཅུ་གསུམ་པ་ཆེན་པོ་ཡང་དོལ་རྒྱལ་བསྟེན་མཁན་རེད་ཟེར་མོད། གལ་ཏེ་དེ་བདེན་པ་ཡིན་ན། རྒྱལ་བསྟན་ཡོངས་རྫོགས་ཀྱི་མངའ་བདག་དང་། བོད་མིའི་དབུ་ཁྲིད་༸གོང་ས་བཅུ་གསུམ་པ་ཆེན་པོས། སྐྱབས་རྗེ་ཕ་བོང་ཁ་པ་ཁྱོད་ཀྱིས་དོལ་རྒྱལ་དར་སྤེལ་གཏོང་བཞིན་པ་དེ་ཅི་ཡིན། འགྲེལ་བཤད་གསལ་བོ་དགོས་ཚུལ་གྱི་བཀའ་བརྩད་ཤུགས་དྲག་པོ་ཕེབས་སྐབས། རྗེ་ཕ་བོང་ཁ་པ་རང་ཉིད་ཀྱི་རྩ་བའི་བླ་མ་༸གོང་ས་༸སྐྱབས་མགོན་༸རྒྱལ་མཆོག་བཅུ་གསུམ་པ་ཆེན་པོའི་སྐུ་མདུན་དུ་ཕ་བོང་ཁ་པས་དོལ་རྒྱལ་ཁོང་གི་མ་རྒན་གྱི་སྐྱེས་ལྷ་ཡིན་ཚུལ་དང་། ད་བར་བསྟེན་གསོལ་བྱས་ཀྱང་། ཕྱིན་ཆད་རང་སྐྱོན་ངོས་ལེན་དང་། སྔ་འགྱོད་ཕྱིས་སྡོམ་གྱི་སྒོ་ནས་དོལ་རྒྱལ་བསྟེན་གསོལ་བསྐང་འཕྲིན་ནམ་ཡང་མི་བྱེད། ཅེས་སོགས་ཁས་ལེན་དམ་འབུལ་གཙང་མ་ཞུས་འདུག་པ་འདི་ཅི་ཞིག་ཡིན་ནམ། འདི་༸གོང་ས་༸སྐྱབས་མགོན་༸རྒྱལ་མཆོག་བཅུ་གསུམ་པས་དོལ་རྒྱལ་དམ་བསྒྲགས་གནང་བར་བརྟེན། ཕ་བོང་ཁ་པས་ཁོང་གིས་དོལ་རྒྱལ་ད་བར་བསྟེན་གསོལ་བྱས་པ་དེ་རང་སྐྱོན་ངོས་ལེན་དང་། སྔ་འགྱོད་ཕྱིས་སྡོམ་གྱི་སྒོ་ནས་ཕྱིས་སུ་དོལ་རྒྱལ་བསྟེན་གསོལ་བསྐང་འཕྲིན་ནམ་ཡང་མི་བྱེད། ཅེས་ཁས་ལེན་དམ་འབུལ་ཞུས་པ་མིན་ན་ཅི་ཡིན་ནམ། ཡང་ན་༸གོང་ས་བཅུ་གསུམ་པ་ཆེན་པོ་དོལ་རྒྱལ་བསྟེན་མཁན་ཡིན་པར་བརྟེན། ཁོང་གི་སྐུ་མདུན་དུ་རྗེ་ཕ་བོང་ཁ་པས་དོལ་རྒྱལ་བསྟེན་གསོལ་མི་བྱེད་རྒྱུ་ཁས་ལེན་དམ་འབུལ་ཞུས་པ་རེད། ཟེར་རམ། སྐད་ཆ་འདི་ལ་འབྲེལ་བ་ཞིག་འདུག་གམ། འདི་ལས་ལྷག་པའི་ལོག་བཤད་ཅིག་གང་ན་འདུག་གམ། ཧ་ཧ་ཧ།
གལ་ཏེ་ཕ་བོང་ཁ་པས་དོལ་རྒྱལ་དར་སྤེལ་གཏོང་བཞིན་འདུག ཅེས་༸གོང་ས་བཅུ་གསུམ་པ་ཆེན་པོར་གནས་ཆུང་གིས་ཞུས་པར་བརྟེན། ༸གོང་ས་བཅུ་གསུམ་པའི་སྐུ་མདུན་དུ་ཕ་བོང་ཁ་པས་སྔ་འགྱོད་ཕྱིས་སྡོམ་གྱི་སྒོ་ནས་དོལ་རྒྱལ་བསྟེན་གསོལ་མི་བྱེད་པ་ཁས་ལེན་དམ་འབུལ་ཞུ་དགོས་བྱུང་བ་རེད། ཟེར་ན། འོ་ན་༸གོང་ས་བཅུ་གསུམ་པ་ཆེན་པོས་ཀྱང་དོལ་རྒྱལ་ལས། གནས་ཆུང་རྩ་ཆེན་པོར་བརྩིས་ཏེ། ཁོང་གི་སྐུ་མདུན་དུ་ཕ་བོང་ཁ་པས་སྔ་འགྱོད་ཕྱིས་སྡོམ་གྱི་སྒོ་ནས་དོལ་རྒྱལ་བསྟེན་གསོལ་མི་བྱེད་པ་ཁས་ལེན་དམ་འབུལ་ཞུ་དགོས་བྱུང་བ་མ་ཡིན་ནམ།
ཡང་རྒྱ་ཁྱི་དཀོན་རྒྱམ་ཟེར་བ་དེས། གནས་ཆུང་ཆོས་སྐྱོང་ཆེན་པོར་གདོན་འདྲེ་ཡིན་ཚུལ་སོགས་སྐུར་འདེབས་ཞུ་ཁུལ་བྱེད་བཞིན་འདུག་མོད། དེ་ལ་འདི་ལྟར་འདྲི་བར་བྱ་སྟེ། ཁམས་གསུམ་འགྲོ་བའི་བླ་མ་ཤར་རྒྱལ་བ་ཙོང་ཁ་པ་ཆེན་པོའི་ཐུགས་སྲས་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་ཆེན་པོས། ཐོག་མར་དཔལ་ལྡན་འབྲས་སྤུངས་ཆོས་སྡེ་ཆེན་པོ་ཕྱག་འདེབས་སྐབས་ནས་དགོན་གནས་དེའི་སྲུང་མར་བཀའ་བསྒོས་་གཉེར་གཏད་གནང་ས་གཙོ་བོ་དེ་གནས་ཆུང་ཆོས་སྐྱོང་ཆེན་པོ་ཡིན་ཚུལ་ཕ་བོང་ཁ་པའི་རྣམ་ཐར་ནང་གསལ་ལྟར་ཡིན་པས། གལ་ཏེ་རྒྱ་ཁྱི་དཀོན་རྒྱམ་གྱིས་བཤད་པ་ལྟར། གནས་ཆུང་འདྲེ་ཡིན་ན་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པས་ཀྱང་དཔལ་ལྡན་འབྲས་དཀར་སྤུངས་པའི་གདན་ས་ཆེན་པོ་དེ་བཀའ་བསྒོས་གཉེར་གཏད་ཞུ་ཡུལ་དེ་ནོར་སོང་བ་རེད་ཟེར་རམ། དེ་ནོར་སོང་བ་རེད་ཟེར་ན། འོ་ན་འཇམ་དབྱངས་ཆོས་རྗེ་ལས་ཀྱང་རྒྱ་ཁྱི་དཀོན་རྒྱམ་ཨ་ར་དཀར་པོ་ཅན་མཁས་པར་ཐལ་ལོ། །
འདི་འདྲའི་སྒྲོ་འདོགས་སྐུར་འདེབས་ཚབས་པོ་ཆེའི་ལོག་བཤད་སྤེལ་མཁན་གྱི་མཁས་དབང་ཞིག་ཇི་ལྟར་བྱུང་བ་ཡིན་ནམ།
ཡང་རྒྱ་ཁྱི་དཀོན་མཆོག་རྒྱལ་མཚན་ཟེར་བ་དེས། “དོལ་རྒྱལ་གྱིས་བོད་བསྟན་སྲིད་ལ་གནོད་ཀྱིན་འདུག རྒྱལ་བའི་སྐུ་ཕྱྭ་ལ་གནོད་ཀྱིན་འདུག ཆོས་ལུགས་མཐུན་སྒྲིལ་ལ་གནོད་ཀྱིན་འདུག” ཅེས་༸གོང་ས་མཆོག་གིས་གསུང་བཞིན་པ་དེ་ཡང་ཞལ་རྫུན་ཡིན་ཚུལ་སོགས་བཤད་མོད། འོ་ན་དོལ་རྒྱལ་གྱིས་བོད་བསྟན་སྲིད་ལ་གནོད་ཀྱིན་མེད་ན། གོང་གསལ་ལྟར། ༸གོང་ས་ལྔ་པ་ཆེན་པོས། སྨོན་ལམ་ལོག་པའི་དམ་སྲི་འབྱུང་པོ་འདིས། །བསྟན་དང་འགྲོ་བ་ཀུན་ལ་འཚེ་བྱེད་ན། །ཞེས་གསུངས་དགོས་དོན་གང་ཡིན་ནམ། ༸གོང་ས་སྐུ་འཕྲེང་རིམ་བྱོན་གྱི་མཛད་འགན་གཙོ་བོ་དང་། རླབས་ཆེན་ཐུགས་བཞེད་གཙོ་བོ་དེ་ནི་བསྟན་པ་དང་འགྲོ་བའི་དོན་བསྒྲུབ་རྒྱུ་དེ་ཁོ་ན་ཡིན་ཕྱིར། དེའི་ལྡོག་ཕྱོགས་ནས་དོལ་རྒྱལ་གྱིས་བསྟན་པ་དང་འགྲོ་བ་ལ་གནོད་འཚེ་བྱས་ཏེ། ༸གོང་ས་ན་རིམ་གྱི་རླབས་ཆེན་མཛད་འགན་གཙོ་བོའམ། རླབས་ཆེན་ཐུགས་བཞེད་གཙོ་བོ་དེ་བསྒྲུབ་མ་བཅུག་པར། དེ་ལ་བར་ཆད་རྩོམ་རྒྱུ་དེ་ལས་ལྷག་པའི་༸རྒྱལ་བའི་སྐུ་ཕྱྭ་ལ་གནོད་པ་བྱེད་ཚུལ་ཞིག་མེད་ངེས་ཡིན་པས། འདི་ཙམ་ཡང་མི་ཤེས་པའི་མཁས་དབང་ཞིག་ཇི་ལྟར་འབྱུང་ངམ།
ཡང་དོལ་རྒྱལ་གྱིས་ཆོས་ལུགས་མཐུན་སྒྲིལ་ལ་གནོད་ཀྱིན་མེད་ན། དོལ་རྒྱལ་ཧ་ཅང་རྩ་ཆེན་པོར་བརྩིས་ནས་བསྟེན་གསོལ་གནང་མཁན་གྱི་བླ་མ་ཛེ་སྨད་རིན་པོ་ཆེས་བརྩམས་པའི་༼ཕ་རྒོད་བླ་མའི་ཞལ་གྱི་བདུད་རྩི། འམ། ཕ་རྒོད་བླ་མའི་ཞལ་ལུང་།༽ཞེས་པའི་དེབ་ནང། དགེ་ལུགས་པའི་བླ་ཆེན་གང་མང་ཞིག་དང་། བོད་རྒྱ་འོག་ཏུ་མ་ཤོར་གོང་གི་བོད་ཀྱི་རྒྱལ་ཚབ་དང་། བོད་གཞུང་གི་བཀའ་བློན་སོགས་དང་། ཡང་སྐབས་དེའི་བོད་གཞུང་གི་དྲུང་ཆེ་སོགས་གོ་གནས་དམིགས་བསལ་ཡོད་མཁན་ཆོས་བརྒྱུད་དགེ་ལུགས་པ་ཡིན་མཁན་གང་མང་ཞིག་གིས་དགེ་ལུགས་པ་མ་ཡིན་པའི་བླ་མ་གཞན་ནས་གསུང་ཆོས་ཞུས་ཏེ། ཆོས་ལུགས་རིས་མེད་གནང་བར་བརྟེན། དོལ་རྒྱལ་མ་དགའ་ནས། དོལ་རྒྱལ་གྱིས་ཁོ་ཚོ་ཚང་མ་བསད་པ་རེད། ཅེས་དོལ་རྒྱལ་གྱིས་བསད་པའི་བླ་ཆེན་མི་ཆེན་༡༧་གྱི་མཚན་དངོས་སུ་བྲིས་འདུག་པ་དེ་དག་གི་མཚན་དངོས་སུུ་འདིར་རེ་རེ་བཞིན་བརྗོད་ན། འདི་ལྟར། ༡༽ ༸ཀུན་གཟིགས་༸པཎ་ཆེན་སྐུ་འཕྲེང་བརྒྱད་པ་བསྟན་པའི་དབང་ཕྱུག་ཚང་། ༢༽ ༸པཎ་ཆེན་སྐུ་འཕྲེང་བཅུ་པའི་ཡོངས་འཛིན་དཀའ་ཆེན་ཨང་ཉི་མ་ཚང་། ༣༽ ཏྲེ་ཧོར་གཟིག་རྒྱབ་སྐུ་གོང་མ་བློ་བཟང་དཔལ་ལྡན་ཆོས་ཀྱི་དབང་ཕྱུག ༤༽ སེར་བྱེས་རྩེད་ཉ་སྤྲུལ་སྐུ། ༥༽ ཆབ་མདོ་འཕགས་པ་ལྷ་ཧོ་ཐོག་ཐུ་བློ་བཟང་ཐུབ་བསྟན་མི་ཕམ་ཚུལ་ཁྲིམས་རྒྱལ་མཚན། ༦༽ ནག་ཆུ་སྒྲུབ་ཁང་སྤྲུལ་སྐུ་སྐུ་འཕྲེང་དྲུག་པ་ཐུབ་བསྟན་སྐལ་བཟང་བསྟན་འཛིན་སོགས་བླ་སྤྲུལ་ཆེ་ཁག་དང་། ༧༽ བོད་ཀྱི་རྒྱལ་ཚབ་རྭ་སྒྲེང་རིན་པོ་ཆེ། ༨༽ མཁར་རྡོ་སྤྲུལ་སྐུ་སྐལ་བཟང་ཐུབ་བསྟན་སྙན་གྲགས། ༩༽ བཞི་སྡེ་སྨྱུང་གནས་བླ་མ་བློ་བཟང་ཡེ་ཤེས་རྣམ་རྒྱལ། ༡༠༽ ཀུན་བདེ་གླིང་རྟ་ཚག་རྗེ་དྲུང་ཐོང་ཤན་ཧུ་ཐོག་ཐུ་རིན་པོ་ཆེ་བློ་བཟང་ཐུབ་བསྟན་འཇིགས་མེད་རྒྱལ་མཚན། ༡༡༽ ཟུར་ཁང་བཀའ་དྲུང་ཆེ་བ་པདྨ་དབང་ཆེན་གྱི་ཡབ་བསོད་ནམས་དབང་ཆེན། ༡༢༽ ཟུར་ཁང་བཀའ་དྲུང་ཆེ་བ་པདྨ་དབང་ཆེན་རང་ཉིད་དང་། ༡༣༽ དེའི་སྲས་བཅས། ༡༤༽ ལྷ་ཀླུའི་གུང་འཇིགས་མེད་རྣམ་རྒྱལ་དང་། ༡༥༽ དེའི་སྲས་ཕུན་ཚོགས་རྣམ་རྒྱལ་བཅས་དང་། ༡༦༽ རྩིས་དཔོན་ལུང་ཤར་བ། ༡༧༽ བཀའ་བློན་ཁྲི་སྨོན་པ་ནོར་བུ་དབང་རྒྱལ་བཅས་ཀྱི་མཚན་དངོས་སུ་དེབ་ནང་འཁོད་ཡོད་པ་དང་། དེབ་ནང་འཁོད་པའི་གོང་གསལ་གྱི་མི་ཆེན་བླ་ཆེན་༡༧་པོ་དེ་དག་ཐོག་མར་དགེ་ལུགས་པ་ཡིན་ཡང་། ཁོང་ཚོས་དགེ་ལུགས་པ་མ་ཡིན་པའི་བླ་མ་གཞན་ནས་ཆོས་ཞུས་ཏེ། ཆོས་བརྒྱུད་གཞན་ཉམས་ལེན་བྱས་པ་སོགས་ལ་བརྟེན། དོལ་རྒྱལ་མ་དགའ་ནས་དོལ་རྒྱལ་གྱིས་ཁོང་ཚོ་བསད་པ་རེད། ཅེས་དེབ་འདིའི་ནང་དངོས་སུ་འཁོད་ཡོད་པ་ནི། དཔེར་ན། ཕ་རྒོད་བླ་མའི་ཞལ་གྱི་བདུད་རྩིའི་ཤོག་ངོས་༩་ཐིག་འཕྲེང་༡་ན། “གསང་སྔགས་རྙིང་མའི་ཆོས་སྐོར་བཀའ་གཏེར་གྱི་རིགས་ལ་གསན་བསམ་མང་དུ་གནང་ཚུལ་པཎ་ཆེན་དེ་ཉིད་ཀྱི་རྣམ་ཐར་དང་། རྒྱལ་ཆེན་བསྟོད་འགྲེལ་དུ་གསལ་བར་གསུངས་པ་ལྟར་གྱི་མཛད་པ་ལ་བརྟེན་ནས་ཆོས་སྐྱོང་བའི་རྒྱལ་པོ་ཆེན་པོ་རྡོ་རྗེ་ཤུགས་ལྡན་རྩལ་དེ་ཉིད་ཀྱིས་དེ་ལྟར་མི་གནང་བའི་བསྐུལ་མ་ཡང་ཡང་མཛད་པར་ཡང་། ཞེས་སོགས་ནས། པཎ་ཆེན་རིན་པོ་ཆེ་དེ་ཉིད་དགུང་གྲངས་སུམ་ཅུ་པར་ཕེབས་པ་རབ་བྱུང་བཅོ་ལྔ་པའི་ཆུ་ལུག་ལོར་བསྙུན་བཞེས་ཀྱིས་དགོངས་པ་ཞི་དབྱིངས་སུ་གཤེགས་ཁར་གྲྭ་པ་རྒྱ་བོ་གཟབ་མཆོར་ཅན་འཇིགས་སུ་རུང་བ་ཞིག་གཟིམ་ལམ་དུ་འོངས་ནས་ཆོ་འཕྲུལ་དུ་མ་བསྟན་པ་བྱུང་ཞིང་། དེ་ལྟར་པཎ་ཆེན་རིན་པོ་ཆེ་བསྟན་པའི་དབང་ཕྱུག་གི་མཛད་བྱུས་ལམ་ལྷོངས་མ་བྱུང་བ་མ་ཟད།” ཅེས་སོགས་དང་། ཡང་དེའི་ཤོག་ངོས་༡༢་ཐིག་འཕྲེང་༡༢་ན། “རྗེས་སུ་པཎ་ཆེན་ཡོངས་འཛིན་དཀའ་ཆེན་ཨང་ཉི་མ་ལགས་ཞུ་བ་དེས་ཕོ་བྲང་རྒྱལ་མཚན་མཐོན་པོ་གཟིམ་ཆུང་ཉི་འོད་བདེ་ཆེན་ཀུན་འཁྱིལ་དུ་རྒྱལ་ཆེན་གྱི་སྐུ་ཞིག་ཡོད་འདུག་པར་གཟིམ་ཆུང་དཀོན་གཉེར་ལ་གདུག་འདྲེའི་སྐུ་འདི་ཕྱིར་ཐོན་དགོས་ལུགས་གསུངས་པར། ཞེས་སོགས་ནས་ པཎ་ཆེན་ཡོངས་འཛིན་ཨང་ཉི་མ་ལགས་ཀྱང་རྒྱ་ནག་ནས་ཕྱིར་ཕེབས་མ་ཐུབ་པར་ཉི་མའི་བུའི་མཆེ་བའི་ཕྲག་ཏུ་གཤེགས་” ཞེས་དང་། ཡང་ཤོག་ངོས་༡༧་ཐིག་འཕྲེང་༥་ན། “གཟིགས་རྒྱབ་རིན་པོ་ཆེས་ཁྱུང་སྤྲུལ་གྱི་མདུན་ནས་རིན་ཆེན་གཏེར་མཛོད་ཆ་ཚང་གསན་རྒྱུའི་ཐུག་ཐག་བཅད། འདི་དག་གི་དུས་སྐབས་སྔ་ཕྱི་མང་པོར་རྒྱལ་ཆེན་རྡོ་རྗེ་ཤུགས་ལྡན་སྐུ་ཕེབས་ཀྱིས་རྙིང་ཆོས་གསན་བསམ་མཛད་རྒྱུ་མེད་པ་དང་། གལ་ཏེ་འདི་འདྲ་གནང་ན་སྐུ་ཚེ་མཛད་པ་དང་བཅས་པར་བར་ཆད་འོང་བས་མི་ལེགས་པའི་ཚུལ་སོགས་ཀྱི་བཀའ་ལུང་ཤུགས་ཆེ་མང་ཙམ་མཛད་ཀྱང་མ་གསན་པ་དང་། ཞེས་སོགས་ནས། གློ་བུར་དུ་སྐུའི་བསྙུན་གཞི་ཤིན་ཏུ་ལྕི་བ་ཞིག་བྱུང་སྟེ་ཞག་གཅིག་སོང་བའི་ཐོ་རངས་ཁར་ཞིང་ཁམས་གཞན་དུ་གཤེགས།” ཞེས་སོགས་ཤིན་ཏུ་གསལ་བར་བྲིས་འདུག་པ་དེ་དག་ཡོངས་རྫོགས་མུ་མཐུད་འདིར་འབྲི་དགོས་ན་མང་བར་འགྱུར་བས། ཞིབ་ཏུ་ཤེས་འདོད་མཁན་རྣམས་ཀྱིས་ཕ་རྒོད་བླ་མའི་ཞལ་ལུང་ལ་ལྟོས་ཤིག
འདི་ལྟར་རི་བོ་དགེ་ལྡན་པའི་སྐྱེས་ཆེན་དམ་པ་མང་པོས་དགེ་ལུགས་པ་མ་ཡིན་པའི་བླ་མའི་མདུན་ནས་དམ་ཆོས་གསན་བསམ་སྒོམ་གསུམ་བྱས་པར་བརྟེན། དོལ་རྒྱལ་མ་དགའ་ནས། སྐྱེས་ཆེན་དམ་པ་དེ་དག་རེ་རེ་བཞིན་དོལ་རྒྱལ་གྱིས་བསད་བཞག་རབས་རྣམས་(ཕ་རྒོད་བླ་མའི་ཞལ་ལུང་)ནང་ཤིན་ཏུ་གསལ་འདུག་པས། དེ་ལས་ལྷག་པས་ཆོས་ལུགས་མཐུན་སྒྲིལ་ལ་གནོད་ཚུལ་མེད་ངེས་ཡིན་པ་འདི་ཙམ་ཡང་མི་ཤེས་པའི་མཁས་དབང་ཞིག་ཇི་ལྟར་འབྱུང་ངམ།
༥༽ དོལ་རྒྱལ་དམ་བསྒྲགས་གནང་དགོས་པའི་རྒྱུ་མཚན་གཙོ་བོ།
བོད་མིའི་བླ་ན་མེད་པའི་དབུ་ཁྲིད་༸རྒྱལ་དབང་སྐུ་འཕྲེང་ན་རིམ་སྤྱི་དང་། ལྷག་ཏུ་ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་ཡིད་བཞིན་ནོར་བུ་སྐུ་འཕྲེང་བཅུ་བཞི་པ་ཆེན་པོ་སྐུ་ན་ཕྲ་མོའི་སྐབས་ཁོང་གིས་དོལ་རྒྱལ་བསྟེན་གསོལ་གནང་དགོས་བྱུང་ཡོད་ཀྱང་། ཕྱིས་སུ་ཁོང་ནར་སོན་ཞིང་། མཁྱེན་རབ་ཀྱི་རྩལ་རྫོགས་པའི་སྐབས་ཁོང་གིས་དོལ་རྒྱལ་ཟེར་བ་དེས་བསྟན་འགྲོ་སྤྱི་དང་། བོད་བརྒྱུད་ནང་བསྟན་འཛིན་མཁན་ཆོས་བརྒྱུད་ཕན་ཚུན་ཐུགས་མཐུན་ཁྲིམས་གཙང་མི་ཡོང་བའི་རྐྱེན་རྩ་གཙོ་བོ་ཞིག་དང་། དོལ་རྒྱལ་དེ་དགེ་ལྡན་པའི་སྲུང་མ་ཞིག་མིན་པར་གསལ་པོ་མཁྱེན་རྟོགས་བྱུང་རྗེས། བོད་བརྒྱུད་ནང་བསྟན་ཆོས་བརྒྱུད་ཁག་མུ་མཐུད་ཕན་ཚུན་ཐུགས་མཐུན་ཁྲིམས་གཙང་འབྱུང་ཐབས་དང་། རྗེ་རྒྱལ་བ་གཉིས་པ་འཇམ་མགོན་ཙོང་ཁ་པ་ཆེན་པོའི་མདོ་སྔགས་ཟུང་འབྲེལ་གྱི་བསྟན་པ་ལ་དག་ཐེར་བཅས་ཀྱི་ཆེད་དུ་དམིགས། ༸གོང་ས་༸རྒྱལ་མཆོག་བཅུ་བཞི་པ་ཆེན་པོས་ལྷག་བསམ་རྣམ་དག་གིས་དོལ་རྒྱལ་དམ་བསྒྲགས་གནང་དང་གནང་བཞིན་པ་རེད། གཟུར་གནས་རྣམ་དཔྱོད་ཅན་ཚོས་གོང་གསལ་<<ཕ་རྒོད་བླ་མའི་ཞལ་ལུང་།>>ལ་ཞིབ་ཏུ་གཟིགས་ལ། བསམ་བློ་ཡག་པོ་ཞིག་ཐོངས་དང་། དོལ་རྒྱལ་ཟེར་བ་དེ་བོད་མི་རིགས་ཀྱི་སྤྱི་ཚོགས་ནང་དམ་བསྒྲགས་གནང་དགོས་པ་ཞིག་རེད་འདུག་དང་མི་འདུག མང་པོ་བཤད་མི་དགོས་པར་ཤིན་ཏུ་ཤེས་སླའོ། །
༦༽ ངེས་པར་དུ་ཤེས་དགོས་པའི་བོད་ཁྲི་སྐོར་བཅུ་གསུམ་ངོས་འཛིན་གནང་སྟངས།
ཡང་རྒྱ་ཁྱི་དཀོན་མཆོག་རྒྱལ་མཚན་ཟེར་བའི་ཨ་ར་དཀར་པོ་ཅན་གྱི་སྤོ་དེས། ༸གོང་ས་ཆེན་པོའི་བཀའ་སློབ་ནང་། “ང་ཡང་༸རྒྱལ་དབང་གོང་མ་ཚོའི་རྗེས་སུ་འབྲང་མཁན་ཞིག་རེད། དེ་ནས་བོད་ཁྲི་སྐོར་བཅུ་གསུམ་ལ་ལྟ་མཁན་ཞིག་རེད།” ཅེས་གསུངས་པ་དེ་མ་འགྲིག་རབས་དང་། ༸གོང་ས་བཅུ་བཞི་པ་༸རྒྱལ་དབང་གོང་མ་དག་གི་རྗེས་འབྲང་མིན་རབས་དང་། བོད་ཁྲི་སྐོར་༡༣་གསུངས་པ་དེ་ཡང་མ་འགྲིག་རབས་སོགས་ཧམ་བཤད་འདྲ་མིན་བྱེད་བཞིན་འདུག་མོད། དངོས་གནས་སྙིང་རེ་རྗེ། བོད་ཁྲི་སྐོར་༡༣་ལ་དབུས་གཙང་གི་ཁྲི་སྐོར་༡༣་གྱིས་ཁྱབ་པ་དཀོན་རྒྱམ་ཨ་དཀར་ཅན་གྱིས་ཇི་ལྟར་བསྒྲུབ་ནུས་སམ།
དེ་ཡང་མཁས་དབང་རྩིས་དཔོན་ཞྭ་སྒབ་པ་དབང་ཕྱུག་བདེ་ལྡན་གྱིས་བརྩམས་གནང་བའི་བོད་ཀྱི་སྲིད་དོན་རྒྱལ་རབས་ཀྱི་སྟོད་ཆའི་ཤོག་ངོས་༢༧་ཐིག་འཕྲེང་༤་ན། “ཡང་རྒྱལ་མཆོག་བཅུ་གསུམ་པ་ཆེན་པོའི་སྐབས་བོད་ལྗོངས་ཁྲི་སྐོར་བཅུ་གསུམ་བརྩི་སྟངས་ནི། སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་སྟེ་བཅུ་གསུམ་མོ། །” ཞེས་གསུངས་འདུག་པ་ལྟར། བོད་ཁྲི་སྐོར་༡༣་བརྩི་སྟངས་འདི་ཙམ་ཡང་༸གོང་ས་མཆོག་གིས་༸རྒྱལ་དབང་གོང་མ་དག་གི་རྗེས་སུ་འབྲང་ནས་དེ་ལྟར་གསུངས་བཞིན་ཡོད་པ་འདི་ཙམ་ཡང་མི་ཤེས་མཁན་ཞིག་ལ་མཁས་དབང་ཞེས་མིང་བཏགས་ཁུལ་བྱེད་བཞིན་པ་དེ་དོན་ལ་སུའི་ཞབས་འདྲེན་དུ་འགྱུར་བཞིན་འདུག་གམ།
༧༽ ངོ་ཚ་ལ་མི་འཛེམས་པའི་རྒྱལ་ཚོང་པའི་བྱ་སྤྱོད་མངོན་དུ་གྱུར་པ།
འདས་པའི་ལོ་མང་གོང་ནས་སྤྱི་ནོར་༸གོང་ས་མཆོག་གིས་མ་འོངས་པའི་༸རྒྱལ་དབང་སྐུ་འཕྲེང་ཕྱི་མ་རྣམས་མུ་མཐུད་ནས་ཕེབས་དགོས་མིན་ནི་བོད་གངས་ཅན་གྱི་མང་ཚོགས་ཀྱིས་གཙོས་གདུལ་བྱའི་འདོད་མོས་ལ་བསྟུན་དགོས། ཞེས་སོགས་ཡང་ནས་ཡང་དུ་གསུངས་པར་བརྟེན། བོད་གཞིས་བྱེས་གཉིས་སུ་གནས་པའི་དད་ལྡན་རྒྱ་ཆེའི་མང་ཚོགས་དང་། ཧི་མ་ལ་ཡའི་ནང་པའི་མི་རིགས། སོག་ཡུལ་གྱི་དད་ལྡན་རྒྱ་ཆེའི་མང་ཚོགས། རྒྱ་གར་ནག་གཉིས་ཀྱི་དད་ལྡན་ནང་པའི་མི་རིགས་སོགས་འཛམ་གླིང་ཤར་ནུབ་གང་སར་གནས་པའི་༸མགོན་པོ་མཆོག་ལ་དད་དམ་འགྱུར་བ་མེད་པའི་མང་ཚོགས་རྣམས་ཀྱིས་མུ་མཐུད་བསྟན་འགྲོའི་མགོན་སྐྱབས་སུ་༸རྒྱལ་དབང་སྐུ་འཕྲེང་ཕྱི་མ་རྣམས་ཕེབས་དགོས་པའི་གསོལ་འདེབས་ནན་ཏན་དུ་ཡང་ཡང་ཞུས་པར་བརྟེན། དད་ལྡན་གདུལ་བྱའི་རེ་བསྐུལ་ལ་༸མགོན་པོ་མཆོག་གིས་བརྩེ་ཆེན་ཡེ་ཤེས་ཀྱིས་ཆེས་ཆེར་བརྩེ་བས་གཟིགས་ཏེ། ཉེ་ཆར་༸གོང་ས་༸སྐྱབས་མགོན་༸རྒྱལ་དབང་ཡིད་བཞིན་ནོར་བུ་མཆོག་གི་ཞལ་ནས་དངོས་སུ་མ་འོངས་པར་༸གོང་ས་སྐུ་འཕྲེང་བཅོ་ལྔ་པ་ཆེན་པོ་སོགས་མུ་མཐུད་ཕེབས་རྒྱུ་ཡིན་པའི་ཞལ་བཞེས་བཟང་པོ་ཡོངས་ཁྱབ་གསལ་བསྒྲགས་གནང་བར་བརྟེན། འཛམ་གླིང་གང་སར་གནས་པའི་༸མགོན་པོ་མཆོག་གི་དད་ལྡན་གདུལ་བྱ་ས་ཡ་མང་པོས་གཙོས། འཛམ་གླིང་སྤྱི་ཡོངས་ཀྱིས་དགའ་བསུའི་ཐལ་རྡེབ་ཀྱི་འུར་སྒྲ་འབྲུག་སྟོང་གྲགས་པ་ལྟ་བུ་བྱུང་སོང་བ་ནི་གཟུར་གནས་ཚང་མས་ཤེས་གསལ་ལྟར་རེད། འོན་ཀྱང་འཛམ་གླིང་སྤྱིས་དགའ་བསུ་ཞུ་བཞིན་པའི་སྐབས་དེར། སྐྱེ་བ་སྔ་ཕྱི་ཁས་མི་ལེན་ཞིང་། ཆོས་དུག་ཏུ་ལྟ་མཁན་བསྟན་དགྲ་རྒྱ་དམར་སྒེར་གཅོད་སྲིད་གཞུང་གིས་སེམས་ཁྲལ་དང་དངངས་འཚབས་ཆེན་པོའི་སྡུག་སྐད་ཁ་ནས་ཤོར་སོང་བ་དང་ཆབས་ཅིག་རྒྱ་དམར་གྱི་རྒྱུག་ཁྱི་དོལ་རྒྱལ་རྗེས་འབྲང་པ་ཨ་ར་དཀར་པོ་ཅན་གྱི་དཀོན་མཆོག་རྒྱལ་མཚན་སོགས་ཀྱིས་ཀྱང་ངོ་ཚ་འཛེམས་ཟོན་སྤུ་ཙམ་མེད་པར། ༸རྒྱལ་བའི་བཀའ་ལ་ངོས་ལེན་མེད་རབས་ཀྱི་ངུ་སྐད་རྒྱག་བཞིན་པ་འདི་མཐོང་ཚེ། དངོས་གནས་རྒྱལ་ཚོང་པ་ཟེར་བ་དེ་འདི་ཚོ་ལོས་ཡིན་སྙམ་པ་ཞིག་བྱུང་ལ། དེ་དང་ཆབས་ཅིག་ཁོ་ཚོ་ལ་ཁག་མེད། ཁོ་ཚོ་ཐོག་དང་པོ་ནས་དཔལ་འབྱོར་འདོད་རྔམས་ཀྱི་དབང་དུ་ཕྱིན་ཏེ། རྒྱ་དམར་སྒེར་གཅོད་སྲིད་གཞུང་གི་དཔལ་འབྱོར་བསླུ་བྲིད་ཀྱི་གཡོ་འཕྲུལ་གྱི་རྙི་ནང་ཚུད་ཟིན་པར་བརྟེན། ད་ཆར་བསྟན་དགྲ་རྒྱ་དམར་སྲིད་གཞུང་གིས་ཁོ་ཚོ་ལ་སླར་ཡང་ཞི་དྲག་འདྲ་མིན་དང་། ལྷག་ཏུ་དཔལ་འབྱོར་དངུལ་དངོས་ཕྲན་བུ་རེའི་སྣེ་ཁ་བསྟན་ཏེ། འདི་ལྟར་སྐད་ཆ་བཤད་བཅུག་གི་ཡོད་པ་ནི་ཐེ་ཚོམ་མི་དགོས་པ་ཞིག་རེད། སྙམ་ཚེ་དངོས་གནས་ཁོ་ཚོ་སྙིང་རྗེ་དགོས་པ་ཞིག་རེད། དེའི་ཕྱིར་འཇིག་རྟེན་གྱི་མི་སྤྱི་དང་། ལྷག་ཏུ་ང་ཚོ་ཤ་ཁྲག་གཅིག་པའི་བོད་རིགས་སྤུན་ཟླ་ཚོ་སུ་ཡིན་ཡང་དང་པོ་ནས་གཟབ་གཟབ་བྱས་ཏེ། གཞན་གྱི་དཔལ་འབྱོར་བསླུ་བྲིད་སོགས་ཀྱི་གཡོ་འོག་ཏུ་རང་ཉིད་མི་ཚུད་པ་བྱ་རྒྱུ་ནི་ཧ་ཅང་གལ་ཆེན་རེད།
༨༽ རྒྱ་ཁྱི་དཀོན་རྒྱམ་ཨ་ར་དཀར་པོ་ཅན་དང་། བདེ་ཆེན་སྤྲུལ་སྐུ་ཟེར་བ་སོགས་རྒྱལ་ཚོང་པ་ཡིན་པའི་དཔང་རྟགས་གསོན་པོ།
རྒྱ་ཁྱི་དཀོན་རྒྱམ་ཨ་ར་དཀར་པོ་ཅན་སོགས་དོལ་རྒྱལ་རྗེས་འབྲང་པ་རྣམས་རྒྱལ་ཚོང་པ་ཡིན་པ་ནི་ཡོངས་གྲགས་ཡིན་མོད། འོན་ཀྱང་ཨ་ར་དཀར་པོ་ཅན་སོགས་ཀྱིས་ང་ཚོ་རྒྱལ་ཚོང་པ་མིན་ཟེར་ངེས་ཡིན་མོད། དོན་དངོས་ལ་དཀོན་རྒྱམ་ཨ་ར་དཀར་པོ་ཅན་ནི་དོལ་རྒྱལ་ཁ་ལ་ཁྱེར་ནས། བོད་བསྟན་སྲིད་མི་རིགས་དང་བཅས་པ་བཙོང་མཁན་གྱི་རྒྱལ་ཚོང་པ་ཆེན་པོ་ཞིག་རེད། དེ་ཙམ་རང་བདེན་པ་ཨེ་ཡིན་ནམ། སྙམ་མཁན་རེ་ཡོད་ན། དེའི་སྐོར་ལ་ཉམས་མྱོང་དང་ཤེས་རྟོགས་གཏིང་ཟབ་ཡོད་པའི་ལྷག་བསམ་རྒྱལ་ཞེན་ཅན་གྱི་ལི་ཐང་གི་བླ་མ་ཚེ་བཀྲ་རིན་པོ་ཆེའི་གསུང་བཤད་ཀྱི་དྲ་བྱང་ ( https://youtu.be/9uB7Wjuw4Fg?si=vuoXXgz-V8t3A_B1 ) འདི་དང་། གཞན་ཡང་དྲ་བྱང་འདི་བཅས་ལ་ ( https://youtube.com/watch?v=bSvUJFiGrFA&si=fLfA_Dd-8LtDX7qO ) ཞིབ་ཏུ་ལྟོས་ཤིག་དང་ཤེས་པར་འགྱུར་རོ། །
༩༽ བོད་ནང་ཕྱིན་ནས་བཙན་བྱོལ་ནང་དགེ་ལུགས་པའི་བསྟན་པ་བསྣུབ་སོང་རབས་སོགས་རྒྱ་ཁྱི་ཨ་ར་དཀར་པོ་ཅན་དཀོན་རྒྱམ་གྱིས་བོད་ནང་དུ་ལོག་བཤད་སྤེལ་བཞིན་པ།
དེང་སྐབས་རྒྱ་དམར་གྱིས་བོད་ཡུལ་སྤྱི་དང་། ལྷག་ཏུ་བོད་ཀྱི་རྒྱལ་ས་ལྷ་སས་གཙོས་རང་སྐྱོང་ལྗོངས་ཟེར་བ་དེའི་ནང་ཕྱི་རྒྱལ་ནས་ཡོང་བའི་བོད་མི་ཚོ་ཡོང་མ་བཅུག་པར། བཀག་སྡོམ་ནན་པོ་བྱེད་བཞིན་ཡོད་ཀྱང་། ཕྱི་ལོ་༢༠༢༥་ལོའི་ལོ་མགོ་རྒྱལ་ཚོང་པ་ཨ་ར་དཀར་པོ་ཅན་སྦྱིན་བདག་རྒྱ་དམར་སྲིད་གཞུང་གིས་བོད་ཀྱི་རྒྱལ་ས་ལྷ་སའི་ནང་ཆེད་འབོད་བྱས་ཏེ། ཁོས་རྡ་རམ་ས་ལར་རྗེ་རིན་པོ་ཆེའི་སྐུ་འདྲ་མཇལ་རྒྱུ་མེད་རབས་དང་། བཙན་བྱོལ་ནང་དགེ་ལུགས་པ་མགོ་བཀྱག་ས་མེད་རབས་དང་། དེ་ལ་བརྟེན་ད་བར་༸གོང་ས་མཆོག་རྒྱལ་ཁབ་གང་དུ་ཕེབས་ཀྱང་། དགེ་ལྡན་པའི་བསྟན་པའི་ཆེད་དོལ་རྒྱལ་རྗེས་འབྲང་པ་ཁོ་ཚོས་སྐད་འབོད་ངོ་རྒོལ་བྱེད་བཞིན་ཡོད་རབས་དང་། ཕྱི་ལོ་༢༠༠༨་ལོར་བོད་ནང་གི་ས་བྱི་ཞི་རྒོལ་ཆེན་མོ་དེ་ཕྱི་ལོགས་ནས་གོ་སྒྲིག་བྱས་དངུལ་བཏང་། འགྲོ་སོང་བཏང་ནས། ད་ལོངས་ཤོག་ཅེས་ངན་སྐུལ་བྱས་པ་ཡིན་ཚུལ་སོགས་མི་བདེན་རྫུན་བསྒྲིགས་ཀྱིས་ལོག་བཤད་སྐྱག་རྫུན་ཤ་སྟག་སྤེལ་བཞིན་འདུག་པ་དང་།
གཞན་ཡང་ལྟས་ངན་རྒྱལ་ཚོང་པ་ཨ་ར་དཀར་པོ་ཅན་ཁོས། ཁོ་པ་ལ་རྒྱལ་སྤྱིའི་ནང་པའི་རྒྱལ་ཁབ་༧༤་ཡོད་པའི་ཚོགས་ཆེན་ནས་མགྲོན་ཤོག་འབྱོར་བ་ལྟར། ཁོ་པ་ནང་པའི་ཚོགས་ཆེན་ལ་རྒྱ་ནག་ཏུ་ཡོང་བའི་སྐོར་དང་། དེ་བཞིན་བོད་ཡིག་དེ་ནང་པའི་ཡི་གེ་ཟེར་བ་ཞིག་འཛམ་གླིང་རྒྱལ་སྤྱིས་ངོས་ལེན་ཡོད་པ་ཞིག་བཟོ་རོགས་གནང་། ཞེས་ཚོགས་ཆེན་ལ་སྙན་ཞུ་ཕུལ་རབས་དང་། དེ་བཞིན་ཀྲུང་དབྱང་སྲིད་གཞུང་ལའང་ཞུས་རབས་དང་། བོད་ཡིག་དང་། བོད་སྐད་གཉིས་ལ་ཁྱད་པར་ཡོད་རབས་དང་། བོད་སྐད་མ་ཤེས་ཀྱང་། བོད་ཡིག་ཤེས་ན་ནང་ཆོས་ཀྱི་གོ་བ་གཏིང་ཟབ་ལེན་ཐུབ་སྐོར་དང་། བོད་སྐད་མི་ཤེས་ཀྱང་བོད་ཡིག་ཤེས་མཁན་ཚོ་ནང་ཆོས་ལ་མཁས་པ་ཆགས་བཞིན་ཡོད་རབས་སོགས་ཁུངས་མེད་སྐྱག་རྫུན་ཧམ་བཤད་སྤེལ་བཞིན་འདུག་མོད། སྐབས་འདིར་རྒྱ་ཁྱི་དཀོན་རྒྱམ་ཨ་ར་དཀར་པོ་ཅན་ལ་འདི་ལྟར་འདྲི་བར་བྱ་སྟེ། བོད་ཡིག་ལ་བོད་སྐད་ཀྱིས་མ་ཁྱབ་བར་ཐལ་ལོ། འདོད་ཟེར་ན། བོད་ཀྱི་མིང་ཚིག་གཉིས་ཀྱི་རྩོམ་གཞིར་གྱུར་པའི་སྐད་ཀྱི་གདངས་དེ་བོད་ཡིག་གི་མཚན་ཉིད་མ་ཡིན་པར་ཐལ་ལོ། །འདོད་ཟེར་ན། མིང་ཚིག་གཉིས་ཀྱི་རྩོམ་གཞིར་གྱུར་པའི་སྐད་ཀྱི་གདངས་དེ་ཡི་གེའི་མཚན་ཉིད་ཡིན་པ་སྒྲ་ཚད་པ་སྤྱིའི་བཞེད་ཚུལ་མ་ཡིན་པར་ཐལ་ལོ། འདོད་ཟེར་ན། ཡི་གེའི་མཚན་ཉིད་ཞོག་ཅིག འཁོར་གསུམ། འདི་ཙམ་ཡང་མི་ཤེས་མཁན་པའི་གླེན་པ་རྒྱ་ཁྱི་ཞིག་ལ་མཁས་དབང་ཞེས་ཁྱི་ལ་སེང་གེའི་མིང་བཏགས་པ་དེ་དོན་ལ་གནས་འདུག་གམ། ཞིབ་ཏུ་སོམག་ཤིག
གང་ལྟར་དོལ་རྒྱལ་རྗེས་འབྲང་པ་རྒྱ་ཁྱི་དཀོན་མཆོག་རྒྱལ་མཚན་ཨ་ར་དཀར་པོ་ཅན་གྱིས་སྐྱག་རྫུན་ལོག་བཤད་མཐའ་ཡས་པ་ཞིག་སྤེལ་བཞིན་པའི་སྐོར་འདི་ལྟར་གསལ་བཤད་བྱེད་སྐབས་འགའ་རེས་དེ་ཙམ་ཡང་བཤད་ཨེ་ཡོད་དམ། ཁོ་དགེ་བཤེས་ཤིག་གིས་ཁུངས་མེད་སྐྱག་རྫུན་འདི་ལྟར་བཤད་ཨེ་ཡོང་ངམ། སྙམ་མཁན་ཡོད་སྲིད་པས། ཁོས་ག་རེ་བཤད་འདུག་དྲ་བྱང་དེ་གཤམ་འདིར་གཏང་ངེས་ཡིན་པས། ཚང་མས་རྒྱ་ཁྱི་ཨ་དཀར་ཅན་གྱིས་སྐྱག་རྫུན་ལ་ཉོན་ཅིག རྒྱ་ཁྱི་ཨ་དཀར་ཅན་བོད་ཀྱི་རྒྱལ་ས་ལྷ་སར་ཕྱིན་ནས་རྐྱག་རྫུན་ལོག་བཤད་ཚད་མེད་པ་སྤེལ་བཞིན་པའི་དྲ་བྱང་འདི་ ( https://youtube.com/watch?v=p3iU1NiCFkg&si=Geu5zgQFgr6SMwZ9 ) ཡིན་ནོ། །
སྤྱིར་ན་དེ་སྔོན་དུས་རབས་༢༠་པའི་ལོ་རབས་༨༠་པའི་མགོ་སྟོད་དུ་བཙན་བྱོལ་ནང་ནས་ཀཿཐོག་ཞིང་སྐྱོང་སྤྲུལ་སྐུ་ཟེར་བ་ཞིག་ཀྱང་བོད་ནང་དུ་ཡོང་ནས་རྒྱ་གར་ནང་རིག་གནས་གསར་བརྗེ་ཆེན་པོའི་ལས་འགུལ་སྤེལ་བཞིན་ཡོད་ཚུལ་དང་། རིག་གནས་གསར་བརྗེ་ཆེན་པོའི་ལས་འགུལ་སྤེལ་མཁན་གྱི་སྣེ་ཁྲིད་པ་དེ་ཡང་༸སྐུའི་གཅེན་པོ་སྐུ་ངོ་ས་དབང་ཆེན་མོ་ལྷ་སྲས་རྒྱལ་ལོ་དོན་གྲུབ་ཡིན་རབས་དང་། ཁོང་བདུད་ཡིན་རབས་དང་། ཁོང་གིས་རྒྱལ་བ་ཀརྨ་པ་སྐུ་འཕྲེང་བཅུ་དྲུག་པ་རང་བྱུང་རིག་པའི་རྡོ་རྗེ་ལ་གསོལ་དུག་ཐེངས་གསུམ་ལ་ཕུལ་ནས་སྐུ་བཀྲོངས་རབས་དང་། གཞན་ཡང་བླ་ཆེན་མི་ཆེན་གང་མང་ལ་དུག་ཕུལ་ནས་བཀྲོངས་རབས་དང་། མཐའ་མ་ཞིང་སྐྱོང་ཁོ་རང་ཡང་གསོད་གྲབས་བྱས་རབས་སོགས་ཁུངས་མེད་ལོག་བཤད་སྐྱག་རྫུན་གང་མང་སྤེལ་བ་དང་། གཞན་ཡང་༸སྐུའི་གཅེན་པོ་སྐུ་ངོ་ས་དབང་ཆེན་མོ་ལྷ་སྲས་རྒྱལ་ལོ་དོན་གྲུབ་ཁོང་གིས་༸གོང་ས་མཆོག་ལ་བོད་ཀྱི་ཆོས་བརྒྱུད་རྙིང་མ་དང་། བཀའ་རྒྱུད། ས་སྐྱ་སོགས་ཆོས་བརྒྱུད་ཚང་མ་དགེ་ལུགས་ལ་བསྒྱུར་ན་དགེ་མཚན་ཆེ་རབས་དང་། ཆོས་བརྒྱུད་མང་པོ་ཡོད་དགོས་དོན་མེད་རབས་སོགས་ཞུས་པར་༸གོང་ས་མཆོག་གིས་ཀྱང་དེ་ལ་ངོས་ལེན་བྱས་ཡོད་རབས་དང་། འོན་ཀྱང་ཆོས་བརྒྱུད་གཞན་ཚང་མ་མེད་པ་བྱས་རྗེས་དགེ་ལུགས་པའང་མེད་པ་བྱ་རྒྱུ་དེ་༸སྐུའི་གཅེན་པོའི་དམིགས་ཡུལ་ཡིན་རབས་དང་། འོན་ཀྱང་མཐའ་མ་དགེ་ལུགས་པའང་མེད་པ་བྱ་རྒྱུའི་དམིགས་ཡུལ་ངན་པ་དེ་༸སྐུའི་གཅེན་པོའི་སེམས་ལ་ཡོད་པ་དེ་༸གོང་ས་མཆོག་གིས་མཁྱེན་མེད་རབས་དང་། ༸གོང་ས་མཆོག་གིས་དེ་ལྟར་མ་མཁྱེན་ཡང་། ཞིང་སྐྱོང་ཁོ་རང་གིས་དེའི་སྐོར་ཡོངས་རྫོགས་གསལ་རྟོགས་བྱུང་ཡོད་རབས་དང་། དེ་ལྟར་རྒྱ་གར་ནང་རིག་གནས་གསར་བརྗེ་ཆེན་པོའི་ལས་འགུལ་སྤེལ་བཞིན་པ་དང་ཆབས་ཅིག་ད་ལྟ་ཆོས་བརྒྱུད་ཡོངས་རྫོགས་དགེ་ལུགས་ལ་སྒྱུར་བཞིན་ཡོད་སྐོར་དང་། དེར་བརྟེན་ཞིང་སྐྱོང་ཁོ་རང་གིས་སྔ་འགྱུར་རྙིང་མའི་བསྟན་པ་བློས་གཏང་མ་ཐུབ་པར་བརྟེན། ཕྱིར་ཕ་ཡུལ་བོད་དུ་ཡོང་བ་ཡིན་རབས་སོགས་རྒྱ་དམར་སྲིད་གཞུང་ལ་དགོས་པའི་དགྲ་དགའ་གཉེན་སྡུག་གི་སྐྱག་རྫུན་ལོག་བཤད་གང་མང་སྤེལ་བར་བརྟེན། རྒྱ་དམར་སྲིད་གཞུང་གིས་ཀྱང་ཞིང་སྐྱོང་སི་ཁྲོན་ཞིང་ཆེན་གྱི་ཆོས་ལུགས་ཀྱི་མགོ་གཙོར་བསྐོ་བཞག་བྱས་ཀྱང་། བོད་ནང་གི་རྩ་ཆེའི་རྟེན་རྙིང་རིགས་གང་མང་ཞིང་སྐྱོང་གིས་གཞན་ལ་ལྐོག་ཚོང་བྱེད་བཞིན་ཡོད་པ་དང་། རྒྱ་དམར་སྲིད་གཞུང་གིས་ཀྱང་གནས་ཚུལ་དེའི་རིགས་ཤེས་བཞིན་དུ་མ་ཤེས་མ་གོ་ཁུལ་བྱས་ནས་བསྡད་པ་རེད།
སྐབས་འདིར་ཞོར་འཕྲོས་ཀྱི་ཚུལ་དུ་དེ་སྔོན་ཀཿཐོག་ཞིང་སྐྱོང་གིས་བོད་ཕྱི་ནང་བར་དཀྲུག་ཤིང་བརྒྱབ་ཏེ། དགྲ་དགའ་གཉེན་སྡུག་གི་ལས་ཀ་མ་རུང་བ་བྱས་རབས་ཀྱི་སྐོར་འདིར་མཚོན་ཙམ་བཤད་པ་ཡིན་ཡང་། གལ་ཏེ་བཤད་དགོས་བྱུང་ན་ཞིང་སྐྱོང་གིས་རང་གི་ཡོངས་འཛིན་ནམ། རྩ་བའི་བླ་མ་སྨྱོ་ཤུལ་མཁན་རིན་པོ་ཆེ་རྒྱ་གར་ཀ་ལི་ཀ་ཏའི་མགྲོན་ཁང་ཆེན་པོའི་ནང་གཏའ་མ་ལ་བཞག་སྟེ། དངུལ་ཡོད་ཚད་ཞིང་སྐྱོང་རང་ཉིད་ཀྱིས་ཁྱེར་ནས་བྲོས་སོང་རབས་དང་། ༸གོང་ས་༸སྐྱབས་མགོན་ཆེན་པོའི་༸སྐུ་མདུན་དུ་ཞིང་སྐྱོང་བཅར་ཏེ། ཁོས་ད་བར་ལས་ཀ་མང་པོ་ཞིག་ནོར་སོང་འདུག། དགོངས་དག་ཞུ། ད་ནས་བཟུང་བཙན་བྱོལ་ནང་གི་ཤར་རྒྱལ་བ་ཀཿཐོག་གི་གདན་ས་འདི་རེད། ཅེས་མཛུབ་མོ་འཛུགས་ས་ཡོད་པ་སློབ་གཉེར་ཕུན་སུམ་ཚོགས་པའི་ལྟེ་གནས་ཤིག་གསར་བཞེང་བྱ་འཆར་ཡོད་རབས་དང་། འོན་ཀྱང་ཁོ་ལ་དཔལ་འབྱོར་གྱི་མཐུན་རྐྱེན་མེད་པར་བརྟེན། དགོན་པ་གསར་བཞེང་དེའི་ཆེད་༸གོང་ས་མཆོག་ནས་དཔལ་འབྱོར་གྱི་རྒྱབ་སྐྱོར་དགོས་པར་གསོལ་འདེབས་ཞུས་པར། ༸གོང་ས་མཆོག་གིས་ཧ་ཅང་ཐུགས་དགྱེས་ཚོར་ཆེན་པོ་དང་བཅས་ཏེ། བཙན་བྱོལ་ནང་ཀཿཐོག་དགོན་པ་གསར་བཞེང་ཆེད་ཧིན་སྒོར་འབུམ་ཕྲག་མང་པོ་གནང་སྟེ། ༸གོང་ས་མཆོག་གི་ཞལ་ནས། “ཞིང་སྐྱོང་ཁྱོད་རང་གཅིག་པུ་མ་རེད། སྐྱོན་ཟེར་བ་དེ་ཀུན་ལ་ཡོད་རེད། འོན་ཀྱང་གཞན་དག་གིས་རང་སྐྱོན་ངོས་ལེན་བྱེད་ཐུབ་ཀྱིན་མེད་པ་དེ་སྐྱོན་ཆེ་ཤོས་རེད། ཞིང་སྐྱོང་ཁྱོད་རང་གིས་རང་སྐྱོན་དེ་སྐྱོན་ཡིན་པར་ངོས་ལེན་བྱེད་ཐུབ་པ་འདི་ཧ་ཅང་གཟི་བརྗིད་ཆེན་པོ་རེད། ད་སྔོན་ནོར་བ་དེ་ཚོ་ནོར་ཚར་བ་རེད། ད་ནས་ཧུར་ཐག་གནང་དགོས། དེ་བཞིན་ཁྱོད་ཀྱིས་བཙན་བྱོལ་ནང་ཤར་རྒྱལ་བ་ཀཿ་ཐོག་དགོན་པ་གསར་བཞེང་བྱ་འཆར་དེ་ཧ་ཅང་ཡག་པོ་རེད། བོད་ནང་ལ་རྒྱ་དམར་སྲིད་གཞུང་གིས་དགོན་པ་གཏོར་བཤིགས་སོགས་ཛ་དྲག་གི་གནས་ཚུལ་ཐབས་རྡུགས་པོ་གང་འདྲ་བྱེད་བཞིན་པ་ང་ཚོ་ཚང་མས་ཤེས་གསལ་ལྟར་རེད། ད་བཙན་བྱོལ་རང་དབང་ལུང་པ་འདིའི་ནང་ང་ཚོས་ཤུགས་མ་བརྒྱབ་ན་སུས་ཤུགས་རྒྱག་གི་རེད་དམ། ཁྱོད་ཀྱིས་ངེས་པར་དུ་ཤུགས་རྒྱོབ་དང་། ད་དུང་དགོན་པ་གསར་བཞེང་གི་འགྲོ་སོང་སོགས་ལ་མུ་མཐུད་ནས་ང་ཚོས་འགྲིག་འགྲོ་གི་རེད།” ཅེས་སོགས་བཀའ་སློབ་ལམ་སྟོན་རིན་ཐང་ཅན་གང་མང་གནང་བར་མ་ཟད། དེའི་ཕྱིས་མང་ཚོགས་ཁྲི་སྟོང་མང་པོའི་ནང་དུའང་༸གོང་ས་མཆོག་གིས། ཞིང་སྐྱོང་གིས་ནོར་འཁྲུལ་ངོས་ལེན་གནང་གིན་འདུག དེ་ཧ་ཅང་ཡག་པོ་རེད། ཅེས་སོགས་བསྔགས་བརྗོད་རྒྱ་ཆེན་པོ་གནང་ཡོད་ཀྱང་། མཐར་རྒྱ་དམར་གྱིས་བོད་ནང་ཕར་ཚུར་འགྲོ་འོང་གི་སྒོ་མོ་ཕྱེས་ཙམ་ནས་ཞིང་སྐྱོང་གིས་ཀཿ་ཐོག་དགོན་པ་གསར་བཞེང་གི་འགྲོ་སོང་ཆེད་༸གོང་ས་མཆོག་ནས་གནང་བའི་དངུལ་ཡོངས་རྫོགས་ཞིང་སྐྱོང་རང་ཉིད་ཀྱིས་ཁྱེར་ནས་བོད་དུ་ཕྱིན་ཏེ། རྒྱ་དམར་སྲིད་གཞུང་ལ་མགོ་བཏགས་ལུས་འབུལ་ཞུས་པར་མ་ཟད། གོང་དུ་རྒྱ་གར་ནང་རིག་གནས་གསར་བརྗེ་ཆེན་པོའི་ལས་འགུལ་སྤེལ་བཞིན་ཡོད་རབས་སོགས་སྐྱག་རྫུན་ཁུངས་མེད་འུད་སྒྲོག་བྱས་རབས་མདོར་ཙམ་བཤད་པ་ལྟར། ད་དུང་དེ་ལས་ཀྱང་ཁ་གསལ་ཙམ་དང་། དེ་ལས་ཅུང་རྒྱས་ཙམ་ཤོད་དགོས་བྱུང་ན་བཤད་ངེས་ཡིན་པ་ཀུན་གྱིས་ཤེས་པར་གྱིས་ཤིག
དེ་བཞིན་དེང་སྐབས་དོལ་རྒྱལ་རྗེས་འབྲང་ཨ་ར་དཀར་པོ་ཅན་བོད་ནང་དུ་ཕྱིན་ནས། རྒྱ་གར་ནང་དགེ་ལུགས་པའི་བསྟན་པ་གནས་ཐུབ་ཀྱིན་མེད་རབས་སོགས་ལོག་བཤད་སྐྱག་རྫུན་ས་ཐོག་ཏུ་མི་ཤོང་བ་གང་མང་ཤོད་བཞིན་པ་འདི་ཡིན་པས། ཚང་མས་རྒྱལ་ཚོང་པའི་སྐྱག་རྫུན་ལ་ཞིབ་ཏུ་གསན་རོགས་ཞུ།
༡༠༽ བསྟན་དགྲ་རྒྱ་དམར་སྲིད་གཞུང་གི་གསང་བའི་ལས་འགུལ་འདྲ་མིན།
བོད་བསྟན་སྲིད་མི་རིགས་བཅས་སྲུང་སྐྱོབས་ཆེད་༸གོང་ས་༸སྐྱབས་མགོན་༸རྒྱལ་དབང་ཡིད་བཞིན་ནོར་བུ་མཆོག་བཙན་བྱོལ་དུ་ཕེབས་པ་ནས་བཟུང་། བསྟན་དགྲ་རྒྱ་དམར་སྒེར་གཅོད་སྲིད་གཞུང་གིས་འདས་པའི་ལོ་ངོ་༧༠་ལྷག་རིང་༸གོང་ས་མཆོག་ལ་ཚད་ལས་བརྒལ་བའི་སྒྲོ་འདོགས་དང་སྐུར་འདེབས་ཚབས་ཆེན་ཞུས་པར་མ་ཟད། ཐ་ན་དོལ་རྒྱལ་རྗེས་འབྲང་པ་རྣམས་བེད་སྤྱོད་བཏང་ནས་༸གོང་ས་མཆོག་ལ་མཚན་སྨད་ཞུ་བཅུག་སྟེ། ༸གོང་ས་མཆོག་དང་མི་མང་བར་དཀྲུགས་ཤིང་རྒྱག་ཐབས་བྱེད་བཞིན་པ་སོགས་འདི་ཐམས་ཅད་ཀྱི་དམིགས་ཡུལ་གཙོ་བོ་ནི་བོད་དང་བོད་མིའི་རྩ་དོན་ནུས་མེད་གཏོང་ཐབས་ཁོ་ན་རེད། དེའི་ཚུལ་ཡང་ལྷག་བསམ་རྒྱལ་ཞེན་ཅན་གྱི་ལི་ཐང་བླ་མ་ཚེ་བཀྲ་རིན་པོ་ཆེའི་གསུང་བཤད་ཀྱི་དྲ་བྱང་འདི་ ( https://www.facebook.com/share/v/15U8wJHsuh/?mibextid=wwXIfr ) བརྒྱུད་ནས་ཞིབ་ཏུ་ལྟོས་དང་། ཤེས་རྟོགས་གསལ་བོ་འབྱུང་བར་འགྱུར་རོ། །
༡༡༽ དོལ་རྒྱལ་རྗེས་འབྲང་པས་ཁོང་ཁྲོས་སྒྲོ་སྐུར་ཞུ་བཞིན་པ།
ཡང་རྒྱ་ཁྱི་དཀོན་མཆོག་རྒྱལ་མཚན་ཟེར་བའི་ཨ་ར་དཀར་པོ་ཅན་དེས་གཙོས་དོལ་རྒྱལ་རྗེས་འབྲང་པ་འགའ་རེས། ཁོང་ཁྲོའི་རྣམ་འགྱུར་ཤུགས་ཆེན་པོ་དང་བཅས་ཏེ། འཕགས་པ་སྤྱན་རས་གཟིགས་སྐུ་ཤ་རློན་པ་༸གོང་ས་༸སྐྱབས་མགོན་༸རྒྱལ་བའི་དབང་པོ་ལ་སྒྲོ་འདོགས་དང་། སྐུར་འདེབས་ཚབས་ཆེན་ཞུ་ཁུལ་བྱེད་བཞིན་འདུག་ཀྱང་། དོན་དངོས་ལ་དེས་ཁོ་ཚོ་རང་ཉིད་ཀྱི་རྒྱུད་ལ་དགེ་རྩ་ཆུང་ཙག་རེ་ཡོད་ན་དགེ་རྩ་དེ་དག་ཡོངས་རྫོགས་ལྷག་མེད་དུ་འཇོམས་འགྲོ་བྱེད་ཙམ་ལས། ༸གོང་ས་༸རྒྱལ་བའི་དབང་པོ་ལ་ཕན་པ་ལས་གནོད་པ་སྤུ་ཙམ་འབྱུང་མི་སྲིད་དོ། །
དེའི་ཚུལ་ཡང་རྒྱལ་སྲས་ཆེན་པོ་ཞི་བ་ལྷས།
གང་ལ་སེམས་ཀྱི་དམ་པ་རིན་ཆེན་དེ། །
སྐྱེས་པ་དེ་ཡི་སྐུ་ལ་ཕྱག་འཚལ་ཞིང་། །
གང་ལ་གནོད་པ་བྱས་ཀྱང་བདེར་འབྲེལ་བ། །
བདེ་བའི་འབྱུང་གནས་དེ་ལ་སྐྱབས་སུ་མཆི། །ཞེས་གསུངས་པ་ལྟ་བུ་འདི་རིགས་ལ་མིག་ཕྱེས་ནས། ཡང་དང་ཡང་དུ་ལྟ་དགོས་པ་དང་། ཞིབ་ཏུ་བསམ་དགོས་པ་ནི་ཤིན་ཏུ་གལ་ཆེའོ། །
འོན་ཀྱང་བྱང་ཆུབ་སེམས་དཔའ་ཆེན་པོ་ལ་ཁོང་ཁྲོ་བ་པོ་རང་རྒྱུད་ཀྱི་དགེ་རྩ་མཐའ་དག་ཤུལ་མེད་དུ་འགྲོ་བའི་ཚུལ་ནི། དཔལ་ལྡན་ཟླ་བ་གྲགས་པས་དབུ་མ་འཇུག་པ་རུ།
གང་ཕྱིར་རྒྱལ་སྲས་རྣམས་ལ་ཁྲོས་པ་ཡིས། །
སྦྱིན་དང་ཁྲིམས་བྱུང་དགེ་བ་བསྐལ་པ་བརྒྱར། །
བསགས་པ་སྐད་ཅིག་གིས་འཇོམས་དེ་ཡི་ཕྱིར། །
མི་བཟོད་ལས་གཞན་སྡིག་པ་ཡོད་མ་ཡིན། །ཞེས་གསུངས་པ་དང་།
དེ་བཞིན་རྒྱལ་སྲས་ཆེན་པོ་ཞི་བ་ལྷས་སྤྱོད་འཇུག་ཏུ།
བསྐལ་པ་སྟོང་དུ་བསགས་པ་ཡི། །
སྦྱིན་དང་བདེ་གཤེགས་མཆོད་ལ་སོགས། །
ལེགས་བཤད་གང་ཡིན་དེ་ཀུན་ཀྱང་། །
ཁོང་ཁྲོ་གཅིག་གིས་འཇོམས་པར་བྱེད། །ཅེས་གསུངས་པ་དང་།
ཡང་སྤྱོད་འཇུག་ཏུ།
གང་ཞིག་དེ་འདྲའི་རྒྱལ་སྲས་སྦྱིན་བདག་ལ། །
གལ་ཏེ་ངན་སེམས་སྐྱེད་པར་བྱེད་པ་དེ། །
ངན་སེམས་བསྐྱེད་པའི་གྲངས་བཞིན་བསྐལ་བར་ནི། །
དམྱལ་བར་གནས་པར་འགྱུར་ཞེས་ཐུབ་པས་གསུངས།
ཞེས་གསུངས་པ་ལྟར་འདིའི་སྐོར་ཧ་ཅང་གལ་ཆེན་པོར་བརྩིས་ཏེ། སྔོན་བྱོན་འཕགས་བོད་ཀྱི་སྐྱེས་ཆེན་དམ་པ་རྣམས་ཀྱིས་བརྩེ་བ་ཆེན་པོས་ཡང་ནས་ཡང་དུ་གསུངས་འདུག་པ་ཐམས་ཅད་འདིར་དྲངས་ན་མང་བར་འགྱུར་ཞིང་། འདིར་མཚོན་ཙམ་དྲངས་པ་འདི་དག་ལ་བསམ་ནས། ཅིས་ཀྱང་རང་ཉིད་ལེགས་པར་འདོད་པ་རྣམས་ཀྱིས་ནི་རང་གིས་རང་སེམས་ལ་བརྟག་དཔྱད་དང་། རང་གིས་རང་ལ་སྟངས་འཛིན་བྱས་ཏེ། དོན་མེད་སྡིག་པ་ཚབས་པོ་ཆེ་བསགས་མི་དགོས་པར་འབད་བརྩོན་བྱ་གལ་ཤིན་ཏུ་ཆེའོ། །
༡༢༽ སྒྲོ་སྐུར་ཞུས་ཚད་༸གོང་ས་ཆེན་པོས་ཉམས་རྟོགས་བོགས་འདོན་ཁོ་ནར་ལམ་འཁྱེར་གནང་བཞིན་པ།
ཡང་རྒྱ་ཁྱི་དཀོན་རྒྱམ་ཨ་དཀར་ཅན་གྱིས་གཙོས་དོལ་རྒྱལ་རྗེས་འབྲང་པ་ཚོས། རྒྱ་དམར་སྲིད་གཞུང་གི་འདོད་པ་ལྟར་༸གོང་ས་མཆོག་ལ་མཚན་སྨད་ཞུས་ན་༸གོང་ས་མཆོག་ལ་གནོད་པར་བསམ་བཞིན་ཡོད་འདུག་ཀྱང་། དེ་ནི་ཆེས་གླེན་ལྐུགས་ཀྱི་བསམ་ཚུལ་ཞིག་སྟེ། ༸གོང་ས་༸སྐྱབས་མགོན་༸རྒྱལ་བའི་དབང་པོ་ནི་རྒྱལ་བ་ཐམས་ཅད་ཀྱི་སྙིང་རྗེའི་རང་གཟུགས་འཕགས་པ་སྤྱན་རས་གཟིགས་དངོས་ཡིན་པས། ཁོང་ནི་བསྐལ་བ་དཔག་ཏུ་མེད་པའི་སྔ་རོལ་ནས་སྤངས་རྟོགས་མཐར་ཕྱིན་ཟིན་པའི་སངས་རྒྱས་དངོས་ཡིན་ཡང་། གདུལ་བྱ་ལམ་ལ་ཁ་དྲངས་པའི་ཆེད་དུ། གདུལ་བྱའི་ངོར་རྒྱལ་སྲས་བྱང་ཆུབ་སེམས་དཔའི་ཚུལ་བཟུང་ནས། བསྡུ་བའི་དངོས་པོ་བཞི་དང་། སྦྱིན་སོགས་ཕར་ཕྱིན་དྲུག་ཉམས་ལེན་གྱི་གཙོ་བོར་གནང་བཞིན་པའི་ཚུལ་དང་། ཁོང་གིས་རྒྱུན་དུ་གཏོང་ལེན་ཁོ་ན་གནང་བཞིན་པའི་རྒྱལ་སྲས་བྱང་ཆུབ་སེམས་དཔའ་ཆེན་པོའི་རྣམ་ཐར་གྱིས་ཟུར་ཙམ་རེ་འདིར་ཇི་བཞིན་ཞུས་ན། དེ་ཡང་ཕྱི་ལོ་༡༩༩༩་ལོའི་ཟླ་༢་ཚེས་༢༨་ཉིན་མགོན་པོ་མཆོག་གིས་ལྗགས་རྩོམ་གནང་བའི་<<རིས་མེད་ཐུབ་བསྟན་རྒྱས་པའི་སྨོན་ལམ།>> གྱི་མཇུག་ཏུ།
བདག་གི་ལུས་དང་ལོངས་སྤྱོད་དགེ་བ་རྣམས། །
མ་རྣམས་བདེ་བའི་རྒྱུ་རུ་འགྱུར་བ་དང་། །
དེ་དག་ཀུན་གྱི་སྡུག་ཀུན་གང་མཆིས་པ། །
དེ་ཀུན་བདག་ལ་ཡོངས་སུ་སྨིན་པར་ཤོག །
བདག་ནི་མཐོང་ཐོས་དྲན་དང་མོས་བྱེད་པ། །
ཀུན་ཀྱང་བདེ་དགའི་དཔལ་ལ་སྤྱོད་པ་དང་། །
སྨོད་དང་རྡེག་འཚོག་མི་སྙན་སྒྲོག་བྱེད་པའང་། །
ཐམས་ཅད་བྱང་ཆུབ་ལམ་གྱི་སྐལ་ལྡན་ཤོག །ཅེས་གསུངས་འདུག་པ་འདི་ཡིན་པས། ལྷག་ཏུ་ཤོ་ལོ་ཀ་གཉིས་པའི་མཐའི་ཚིགས་རྐང་གཉིས་སུ།
སྨོད་དང་རྡེག་འཚོག་མི་སྙན་སྒྲོག་བྱེད་པའང་། །
ཐམས་ཅད་བྱང་ཆུབ་ལམ་གྱི་སྐལ་ལྡན་ཤོག །ཅེས་རྒྱལ་སྲས་བྱང་ཆུབ་སེམས་དཔའ་ཆེན་པོ་འདིས། བསྟན་དགྲ་རྒྱ་དམར་སྲིད་གཞུང་དང་། དེའི་རྒྱུག་ཁྱི་དོལ་རྒྱལ་རྗེས་འབྲང་པ་བཅས་ཀྱི་ཆེད་བརྩེ་བ་ཆེན་པོས་ཐུགས་སྨོན་གནང་བཞིན་འདུག་ཀྱང་། ཁོང་གིས་རླབས་ཆེན་ཐུགས་སྨོན་གནང་བཞིན་པ་ལྟར། ཁྱེད་ཅག་སྦྱིན་བདག་རྒྱུག་ཁྱི་དང་བཅས་པ་བྱང་ཆུབ་ལམ་གྱི་སྐལ་བ་དང་ལྡན་པ་གྱུར་ན་ནི། ཤིན་ཏུ་ལེགས་ཀྱང་། སྐྱེས་ཆེན་དམ་པར་ཁྲོ་སེམས་ཀྱིས་ཁྲོ་ཚིག་གང་མང་སྨྲས་པ་དེས་རང་ཉིད་ཀྱི་དགེ་རྩ་ཡོངས་རྫོགས་ཟད་དེ། ནམ་ཞིག་ན་མི་འདོད་པ་ཐོག་ཏུ་བབས་ནས། རྣམ་སྨིན་ཡིད་དུ་མི་འོངས་པ་རེ་མྱང་དགོས་དགོས་བྱུང་ན། སྐབས་དེར་རང་གིས་རང་ཉིད་སྙིང་མི་རྗེའམ། ཞིབ་ཏུ་སོམ་ཤིག །
༡༣༽ ༸ཀུན་གཟིགས་༸པཎ་ཆེན་བཅུ་པ་ཆེན་པོས་༸གོང་ས་༸སྐྱབས་མགོན་༸རྒྱལ་དབང་བཅུ་བཞི་པ་ཆེན་པོར་བསྐུར་བའི་གལ་ཆེའི་གསུང་འཕྲིན།
དེང་སང་དོལ་རྒྱལ་རྗེས་འབྲང་པ་རྒྱ་ཁྱི་དཀོན་རྒྱམ་ཨ་དཀར་ཅན་སོགས་ཀྱིས། ༸ཀུན་གཟིགས་༸པན་ཆེན་བཅུ་པ་ཆེན་པོ་མཆོག་དོལ་རྒྱལ་བསྟེན་མཁན་ཡིན་མདོག་སྟོན་བཞིན་འདུག་མོད། དོན་དངོས་ལ་མི་ངན་འདི་རིགས་ཀྱིས་རང་ཉིད་བསྟན་དགྲ་རྒྱ་དམར་གྱི་ལག་ཆ་བྱ་རྒྱུ་དང་། བོད་ཀྱི་རྩ་དོན་ནག་བསུབ་གཏང་རྒྱུ། དེ་བཞིན་བསྟན་དགྲ་རྒྱ་དམར་སྒེར་གཅོད་སྲིད་གཞུང་གི་ལག་ནས་དངུལ་ལེན་རྒྱུ་ཙམ་ལས། བསྟན་འགྲོའི་མགོན་སྐྱབས་༸རྒྱལ་༸པཎ་རྣམ་གཉིས་བར་གྱི་མཛའ་བརྩེའི་གསང་བའི་གནས་ཚུལ་གྱི་ཟུར་ཙམ་ཡང་ཤེས་རྟོགས་མེད་པ་འདི་ཡང་ཆེས་སྙིང་རྗེ་དགོས་པའི་གནས་ཚུལ་ཞིག་རེད།
རྒྱལ་ཚོང་པ་མི་ངན་འདི་རིགས་ཀྱིས་༸ཀུན་གཟིགས་༸པཎ་ཆེན་སྐུ་འཕྲེང་བཅུ་པ་ཆེན་པོ་མཆོག་དོལ་རྒྱལ་བསྟེན་མཁན་ཡིན་ཚུལ་དང་། ༸རྒྱལ་༸པཎ་རྣམ་གཉིས་ཐུགས་ནང་མི་གཤིན་ཞེས་ཟེར་བཞིན་ཡོད་ཀྱང་། དེ་ཡང་རྫུན་མ་རྫུན་ནག་ཡིན་པ་ལས། དོན་དངོས་ལ་༸རྒྱལ་༸པཎ་རྣམ་གཉིས་ཐུགས་སྣང་འོ་ཆུ་གཅིག་འདྲེས་ཡིན་ཚུལ་ཧ་ཅང་མང་ཡང་། འདིར་དཔེ་མཚོན་གཅིག་ངོས་སྤྲོད་བྱས་ན། དེ་ཡང་ད་ལྟ་ཡུ་རོབ་སུད་སི་རྒྱལ་ཁབ་ཏུ་བཞུགས་པའི་འབའ་བ་ཚུལ་ཁྲིམས་རྟ་སྲས་ཁོང་ཕྱི་ལོ་བརྒྱད་ཅུ་གྱ་གྲངས་ནང་བོད་དུ་གཉེན་འཕྲད་དུ་འགྲོ་སྐབས་༸ཀུན་གཟིགས་༸པཎ་ཆེན་རིན་པོ་ཆེའི་མཇལ་ཁར་བཅར་བའི་སྐབས་ཤིག་ལ་༸ཀུན་གཟིགས་༸པཎ་ཆེན་པོ་ཆེས་བཀའ་གནང་དོན་ལ། “༸རྒྱལ་བ་ཐམས་ཅད་མཁྱེན་པས་རྒྱལ་ཆེན་ཤུགས་ལྡན་གྱི་བྱུང་རིམ་སྐོར་ཐོག་མཐའ་བར་གསུམ་གྱི་གནས་ཚུལ་ལ་ཐུགས་སྣང་ཆེན་པོ་གནང་འདུག བཀའ་སློབ་ཀྱི་ཡིག་ཆ་ཁག་ངས་མཇལ་བྱུང་། དཔྱད་པ་ཧ་ཅང་ནན་པོ་མཛད་གནང་འདུག བོད་མི་ཚང་མས་ཁོང་གི་མ་ནོར་ལམ་སྟོན་གནང་བ་ལ་ཡིད་ཆེས་ཀྱིས་ཅི་གསུང་བཀའ་བཞིན་བསྒྲུབས་ན་འབྲས་བུ་ཧ་ཅང་ཡག་པོ་ཡོང་གི་རེད། འོན་ཀྱང་དེང་སང་དུས་ཚོད་སྡུག་པོ་ཡིན་སྟབས་མི་ལ་ལས་རྒྱུ་མཚན་ལ་བསམ་བློ་མ་བཏང་བར་མགོ་མཁྲེགས་པོ་བྱས་ནས་དོན་མེད་རྙོག་གླེང་གི་མཛད་དཀའ་བཟོ་སྲིད་པས་འདི་སྐོར་ཐུགས་གཟབ་གནང་རྒྱུ་གལ་ཆེན་པོ་ཡིན། ཞེས་ངས་ཞུ་གི་འདུག ཅེས་ཁྱེད་ནས་སྙན་སེང་ཞུ་རོགས། ང་ཚོ་བཀྲ་ཤིས་ལྷུན་པོའི་དགོན་པ་སྤྱིས་ཤུགས་ལྡན་བསྟེན་གསོལ་བྱེད་པའི་སྲོལ་རྩ་བ་ནས་མེད། བདེ་ཆེན་ཕོ་བྲང་ནང་བསྟེན་མཁན་དང་མི་བསྟེན་མཁན་གཉིས་ཀ་བྱུང་འདུག” ཅེས་གསུང་འཕྲིན་བསྐུར་གནང་འདུག་པ་༸གོང་ས་༸རྒྱལ་མཆོག་བཅུ་བཞི་པ་ཆེན་པོའི་སྙན་ལམ་དུ་རྟ་སྲས་ཚུལ་ཁྲིམས་ཀྱིས་ཞུས་འདུག་པ་ཐོས་མྱོང་ངམ། དེའི་སྐོར་རྩོམ་པ་པོ་ཕུན་ཚོགས་བཀྲ་ཤིས་ཀྱིས་ཕྱི་ལོ་༢༠༡༣་ལོའི་ཟླ་༩་ཚེས་༢་ཉིན་བརྩམས་གནང་བའི་<<ང་དགེ་ལྡན་པའི་དམ་སྲི་ཁོ་ཡིན།>> ཞེས་པའི་དེབ་ཀྱི་ཤོག་ངོས་༣༤་ཐིག་འཕྲེང་༢༠་ན་ཇི་བཞིན་བྲིས་ཏེ། ས་ཁྱབ་རྡོ་ཁྱབ་ཏུ་གྱུར་འདུག་པ་འདི་ཡིན་ནོ། །
༡༤༽ སླད་མའི་ཆར་བསམ་གཞིག་འོས་པའི་རེ་བསྐུལ།
ཇི་སྐད་དུ་ཆོས་རྗེ་ས་པཎ་གྱིས།
མཁས་པ་ཇི་ལྟར་ཐབས་རྡུགས་ཀྱང་། །
བླུན་པོ་འཇུག་པའི་ལམ་མི་འགྲོ། །ཞེས་གསུངས་པ་ལྟར། རང་ཅག་ཤ་ཁྲག་གཅིག་པའི་བོད་རིགས་སྤུན་ཟླ་ཡོངས་ལ་སྙིང་གཏམ་འདི་ལྟར་གདམས་པར་བྱ་སྟེ། འདི་ལྟར།
རྒྱ་དངུལ་ཟ་རྒྱུ་བྱུང་བའི་བདེ་སྐྱིད་དང་། །
རྒྱལ་ཚོང་མིང་ཆད་ལོ་རྒྱུས་ནག་པོ་གཉིས། །
ཁེ་གྱོང་གང་ཆེ་སྔོན་ལ་མ་དཔྱད་ན། །
ཁྱིམ་རྒྱུད་ལོ་རྒྱུས་ནག་པོ་ཆགས་ཉེན་ཡོད། །
ཕ་ཡིས་རྒྱལ་ཚོང་ཞབས་འདྲེན་མང་ཞུས་ཀྱང་། །
ཁྱིམ་རྒྱུད་ལོ་རྒྱུས་ནག་པོ་མི་འདོད་པའི། །
རྒྱལ་གཅེས་བུ་ཚས་ཕ་ཡི་ནག་ཉེས་ལ། །
དགག་རྒྱག་ངོ་རྒོལ་ཐེར་འདོན་བྱས་རབས་མང་། །
རྒྱལ་ཚོང་ལས་ཀའི་ཕྱོགས་ལ་མགོ་འཁོར་ནས། །
བསྟན་དགྲའི་ལག་གཡོག་བྱ་རྒྱུ་མང་དྲགས་པས། །
གཏན་ངན་མི་ཁས་ས་སྟེང་ཁྱབ་པ་དེ། །
རང་སྡུག་རང་གིས་ཉོས་པའི་གནས་ཚུལ་ཡིན། །
རང་སྐྱོན་རི་བོ་ཙམ་དེ་སྦེད་འདོད་ཀྱིས། །
སྐྱག་རྫུན་ཧམ་བཤད་འབུམ་ཕྲག་བཤད་ཀྱང་རུང་། །
སྤྱི་ཚོགས་མགོ་སྐོར་ཐུབ་པའི་རེ་བ་མེད། །
མི་ངན་ཤི་ཡང་གཏམ་ངན་གནས་ངེས་ཡིན།
ཞེས་ཆབ་སྲིད་བཙོན་ཟུར་མགོ་ལོག་འཇིགས་མེད་ཀྱིས་ལྷག་བསམ་རྣམ་དག་གིས་ཕྱི་ལོ་༢༠༢༥་ཟླ་༨་ཚེས་༤་ཉིན་ཡོངས་ཁྱབ་གསལ་བསྒྲགས་བྱས་པ་དགེའོ།། །།
