ཁ་བ། གསེར་རྟ།
སྔ་རུ་གསེར་གྱི་ནམ་མཁའ།།
ཕྱི་རུ་དངུལ་གྱི་ས་གཞི།།
ཡོབ་ཆེན་ཉི་ཟླ་ཁ་སྤྲོད་།།
ཡོབ་ཐག་ཉི་ཟེར་རྒྱས་འདྲ།།
གློ་ལེན་དགུ་ཚིགས་རང་ཤར།།
རྨེད་སྐོར་སྨེ་བདུན་རང་ཚེས།།
སྒ་སྟན་སྨིན་དྲུག་ཁྲ་མོ།།
སྲབ་མཐུར་འཇའ་ཚོན་རང་བཀྲག།
སྲབ་སྐྱོགས་ནོར་བུ་རང་འགུག།
སྲབ་མདའ་ལྷ་ཞགས་ཀླུ་ཞགས།།
ཁ་རུ་རྡོ་རྗེ་ཕ་ལམ།།
ལྕེ་མདུད་ཆུ་རིས་ཤིག་སེ།།
ཕ་རྟ་གནམ་ནས་ཆད་ཅིང་།།
མ་རྟ་ས་གཞིའི་སྲིང་མོ།།
གནམ་ས་ཁ་སྤྲོད་བྱས་པའི།།
རྟ་ཕོ་གྱི་ལིང་གནམ་མཆོང་།།
མགོ་རྣ་དགེ་མཚན་དགུ་གྲུབ།།
རྔ་རྔོག་ཆར་སྤྲིན་ལང་ལོང་།།
སྤུ་ཁ་མར་ཁུའི་མཚོ་མོ།།
གཟུགས་ཕུང་གསེར་ནག་ལུམ་བརྡུང་།།
རྐང་ལག་རྒྱལ་ཆེན་སྡེ་བཞི།།
རྨིག་བཞི་རླུང་གི་འཁོར་ལོ།།
བརྒྱུག་ན་བསེར་བུ་རྗེས་མེད།།
བསྡད་ན་མཎྜལ་བཤམས་ཡག།།
སྡེ་ཆེན་གཡས་ནས་སྐོར་དུས།།
ལ་ཆེན་ཆེན་གྲུ་གུ་སྒྲིལ་སྒྲིལ།།
ལ་ཆུང་ཆུང་རྒུ་འབུ་འཐུ་འཐུ།།
སྡེ་ཆུང་གཡོན་ནས་སྐོར་དུས།།
ཐང་ཆེན་ཤོག་སྐྱ་ལྟེབ་ལྟེབ།།
ཆུ་ཆེན་ཕྱེ་མར་གཏུབ་གཏུབ།།
བཀྲ་ཤིས་རྒྱ་གྲོང་གཤགས་དུས།།
ལྟད་མོ་གྲོག་ཚང་བརྡོལ་བརྡོལ།།
བསྟོད་པ་ཁ་བ་འབབ་འབབ།།
རྟ་འཛོམས་སྒ་འཛོམས་ཡིན་ན།།
མི་ཕོའི་སྣང་བ་གནམ་ཡིན།།
རྟ་དེ་ལྷ་ཡི་རྟ་རེད།།
ལྷ་རྟ་རྐྱང་རྒོད་འཕེར་བ།།
སྒ་དེ་གསེར་གྱི་ཁྲི་རེད།།
གསེར་ཁྲི་ཁམས་གསུམ་ཟིལ་གནོན།།
མི་ཡང་གེ་སར་ལྟ་བུའི།།
དཔའ་སྙིང་དགུ་འགྱུར་ལྡན་ཞིང་།།
ཐེབས་ཤེས་ཁོག་ཏུ་འཛོམས་པའི།།
གནམ་འདེགས་ཀ་བ་ཡིན་དགོས།།
ས་གནོན་ཁྲོ་ཕུར་ཡིན་དགོས།།
ཕ་ས་མཆིན་པ་འདྲ་བོ།།
སྙིམས་པད་བར་ནས་སྐྱོར་དགོས།།
ཕུ་ནུ་སྐར་ཚོམ་འདྲ་བོ།།
བྱང་ཁོག་སྟོད་ན་རུམ་རིམ་དགོས།།
འགྲོ་བ་རྒྱ་མཚོ་ཆེན་མོ།།
དུས་གསུམ་སེམས་ཀྱིས་བསྲོ་དགོས།།
“མགོ་རྣ་དགེ་མཚན་དགུ་གྲུབ།།”ཟེར་བ་ནི། དམངས་ཁྲོད་ཀྱི་རྟ་བཤད་ལས། “རྟ་འདོ་བ་ཞིག་གི་མགོ་བོ་ལ།། སྲོག་ཆགས་དགུ་ཡི་རྣམ་པ་ཚང་།། ”ཞེས་པ་དེའོ།།
གསལ་བཤད་ཐུང་ངུ་།
༡རྩོམ་འདིར་མར་དྲི་དང་རྩམ་འདི་འཐུལ་བའི་བོད་དམངས་ཁྲོད་ཀྱི་སྐད་ཆ་བཀོལ་ཅི་ཐུབ་བྱས་ཡོད་པ་ལས།དམངས་ཁྲོད་ཀྱི<<བཤད་པ་རྣམ་གསུམ>>ལྟ་བུའི་བརྩམས་ཆོས་དག་ལས་དཔེ་ཚིག་ཅིའང་བཀོལ་མེད།
༢རྩོམ་འདི་བྲིས་ནས་ལོ་གཉིས་ཙམ་འགོར་ཡང་དུས་དེབ་གཞན་པ་དང་དྲ་ཐོག་ཏུ་བཀོད་མེད་ལ། ཡང་བསྐྱར་བཅོས་འཕྲི་དང་ཁ་སྣོན་གང་ལེགས་བྱས་པ་ཡིན།།
