—བཛྲ་ཚུལ་ཁྲིམས་རྒྱ་མཚོས།
བཀྲ་ཤིས་རྣམ་དཀར་དགེ་ཚོགས་ཀུན་འདུས་པས།།
བདེ་ལེགས་འབྲས་བུ་གཡུར་དུ་ཟ་བའི་མཐུ།།
བཀྲ་ཤིས་ལུས་ལ་རྫོགས་པའི་མེ་སྤྲེལ་ལོ།།
དགེ་ལེགས་འཛུམ་གྱིས་ཚེས་འདི་ཨེ་མ་བསྔགས།།
བཀྲ་ཤིས་ཀུན་གྱི་ནང་ནས་བཀྲ་ཤིས་པ།།
བཀྲ་ཤིས་ཀུན་རྫོགས་བླ་མའི་སྐུ་བདེ་ཞིང་།།
བཀྲ་ཤིས་གསུང་སྙན་གཡས་འཁྱིལ་དུང་གི་སྒྲས།།
བཀྲ་ཤིས་ཐུགས་བརྩེ་ཟབ་མོ་མཚོན་འདི་སྐྱིད།།
བཀྲ་ཤིས་བདེ་ལེགས་ཁ་ལ་གོམས་པའི་བོད།།
བཀྲ་ཤིས་བདེ་ལེགས་སེམས་ལ་གྲུབ་འདོད་ན།།
བཀྲ་ཤིས་ཆོས་ལ་བརྩོན་དང་བདེ་འབྱུང་ཞེས།།
བཀྲ་ཤིས་གསུང་གིས་སྐྱོང་འདི་དྲིན་དུ་ཚོར།།
བཀྲ་ཤིས་དད་གསུམ་མཁའ་དབྱིངས་གསལ་བའི་རྒྱུ།།
བཀྲ་ཤིས་མཐུན་སྒྲིལ་ལྗོན་བཟང་བརྟན་པའི་རྨང་།།
བཀྲ་ཤིས་དཔལ་འབྱོར་ལོ་འདབ་རྒྱས་པའི་གཞི།།
བཀྲ་ཤིས་རྣམ་དག་ཐོས་བསམ་ཉིད་དུའང་གོ།།
བཀྲ་ཤིས་རྒྱུ་ལས་བཀྲ་ཤིས་འབྲས་འབྱུང་བ།།
བཀྲ་ཤིས་ཚུལ་གསུམ་ཚང་བའི་རྟགས་ཀྱིས་འགྲུབ།།
བཀྲ་ཤིས་སྣོད་བཅུད་སྣུམ་པའི་ཕྱྭ་གཡང་ཕྱིར།།
བཀྲ་ཤིས་གྲོགས་ཀྱེ་བཀྲ་ཤིས་ལས་ལ་འབུངས།།
བཀྲ་ཤིས་གདམས་པ་ཟབ་མོའི་གསུང་སྙན་དང་།།
བཀྲ་ཤིས་གནམ་ལོ་གསར་བའི་འཛུམ་ཞལ་དང་།།
བཀྲ་ཤིས་འགྱུར་མེད་དད་པའི་བཀྲགས་མདངས་གསུམ།།
བཀྲ་ཤིས་ལྷན་འཛོམས་བྱུང་འདི་བཀྲ་ཤིས་ཉིད།།
བཀྲ་ཤིས་གོང་ནས་བླ་མའི་སྐུ་ཚེ་བརྟན།།
བཀྲ་ཤིས་བར་ནས་བོད་པའི་ཆོས་སྲིད་རྒྱས།།
བཀྲ་ཤིས་མཐའ་ནས་འཛམ་གླིང་ཞི་བདེའི་དཔལ།།
བཀྲ་ཤིས་བདེ་ལེགས་འབྱུང་བར་སྙིང་ནས་སྨོན།།
བཀྲ་ཤིས་རྟེན་འབྲེལ་བཅུད་དུ་སྨིན་པའི་གླུ།།
བཀྲ་ཤིས་འཁྱིལ་ནས་བླངས་པ་སྐད་ཅིག་གིས།།
བཀྲ་ཤིས་སྐད་འཕྲིན་ཕོ་ཉས་ཤར་ནུབ་ཀྱི།།
བཀྲ་ཤིས་ཟླུམ་གཟུགས་གོ་ལར་སྐྱེས་སུ་ཁྱེར།།
བཀྲ་ཤིས་གཞིས་ལ་འཐབ་རྩོད་འཁྲུགས་ལོང་ཞི།།
བཀྲ་ཤིས་བྱེས་ལ་ནད་མེད་ཚེ་རིང་ཞིང་།།
བཀྲ་ཤིས་འགྱུར་མེད་དུང་སེམས་གསེར་ཞགསཀྱིས།།
གཞིས་བྱེས་ལྷན་དུ་སྦྲེལ་བའི་བཀྲ་ཤིས་ཤོག།
