《རང་རློམ་བྱེད་མཁན་དེ》

བག་ཡོད་པར་གྱིས།

ལྐོག་ལྐོག་སུད་སུད་ཀྱི་གྲིབ་གཟུགས།

ཟླ་འོད་ལ་རང་རློམ་ཆེར་མ་བྱེད།

ཟླ་འོད་ནི་མུན་ནག་གི་གཞིས་ཀ་རེད།

ཁྱོད་ཀྱིས་ཟླ་འོད་ལ་རྒྱབ་སྙེས་ནའང་།

གྲིབ་གཟུགས་དེ་གང་ལའང་འགྲོ་མི་སྲིད།

ཟླ་འོད་འོག་གི་སྒྲོན་མེ་དེ་ཡང་།

མཚན་མོ་ལ་གྲིབ་གཟུགས་སྐྲུན་མཁན་རེད།

ཁྱོད་རང་ཟླ་བ་དང་སྙིང་ཉེ་བར་སྡོད་པ་ནི།

མུན་ནག་ལ་སྙིང་ཉེ་བར་སྡོད་པ་དང་འདྲ།

མུན་ནག་གིས་ཁྱོད་ལ་གསང་བའི་རལ་གྲི་ཞིག་སྤྲད་ཡོང་།

དེ་ནི་ཁྱོད་རང་དམེ་བྱེད་སྤྱད་ཀྱི་རལ་གྲི་ངོས་གཉིས་མ་དེ་ཡིན།

ཟླ་འོད་འོག་རལ་གྲི་དེ་ནི་ཇི་འདྲའི་དཀར་པ་ལ།

ཁྱོད་ཀྱིས་རལ་གྲི་དེ་ལ་བྱིལ་བྱིལ་ཞིག་ཐོངས་དང་།

ཟླ་འོད་འོག་མུན་ནག་ལ་བྱིལ་བྱིལ་གཏོང་བ་དང་འདྲ་ཡོང་།

མུན་ནག་ཁྲོད་དུ་རང་ཉིད་ལ་བྱིལ་བྱིལ་བྱེད་པ་དང་འདྲ་ཡོང་།

རང་ཉིད་ལ་བྱིལ་བྱིལ་ཐེངས་ག་འདྲ་ཞིག་བྱས་ཀྱང་།

ལྐོག་ལྐོག་སུད་སུད་ཀྱི་གྲིབ་གཟུགས་དེས།

གཉོམ་དུང་གི་གཞས་ཆུང་ཞིག་ནམ་ཡང་ལེན་མི་སྲིད།

ཟླ་འོད་དང་ཞོགས་པའི་དཀྱིལ་དུ།

མུན་ནག་དེ་སླེབས་ཡོང་དུས།

རལ་གྲི་དེའི་ངོས་གཅིག་ལས།

སྡར་མ་ཞིག་གི་འོ་དོད་འཛར་ཡོང་།

རལ་གྲི་དེའི་ངོས་གཞན་ཞིག་ལས།

སྙིང་སྡུག་ཅིག་གི་ཕུགས་བསམ་འཛར་ཡོང་།

ཟླ་འོད་འོག་ཁྱོད་གཞི་ནས་ཡལ་སོང་ནའང་།

ཟླ་འོད་འོག་གི་མཚན་མོ་ཡལ་མི་སྲིད།

ཁྱོད་ཀྱི་རྒྱབ་སྙེས་སའི་རྡོ་ཕུང་དེ་ཡལ་མི་སྲིད།

ཁྱོད་ཁ་ཕྱོགས་གང་ལ་སོང་ཡང་།

ཁྱོད་རང་གི་ངོ་གདོང་དེ་རྡོ་ཡི་བང་སོ་ཞིག་ཡིན། 

གྲུབ་གཟུགས་དེ་ཟླ་འོད་འོག་ངུ་དུས།

ཁྱོད་རང་སྔ་མོ་ནས་ཆས་མེད་ལ།

ཁྱོད་རང་སྔ་མོ་ནས་སླེབས་ཀྱང་མི་འདུག

བག་ཡོད་པར་གྱིས།

ལྐོག་ལྐོག་སུད་སུད་ཀྱི་རང་རློམ་པ་ལགས།

རྩོམ་མཁན། ཞི་བདེ་ཉི་མ། 2018/12/6

དཔྱད་མཆན་སྤེལ།

ཁྱེད་ཀྱི་གློག་ཡིག་གི་ས་གནས་དེ་ཁྱབ་སྤེལ་བྱེད་ཀི་མིན།