སྙིང་ཁར་བཞད་པའི་མེ་ཏོག དུར་བྱང་།（མགོ་ལོག）

དུས་ཚོད་ཀྱི་ཐ་གུ་ཕྲ་མོའི་བདག་གི་ལང་ཚོ་སྙིང་རྗེ་མེད་པར་འཐག་གིན་པ་འདྲ།

བདག་གི་སེམས་པ་དགུན་གྱི་ནམ་ཟླ་བཞིན་ཧ་ཅང་འཁྱག

ཁྱོད་ལ་དབང་བའི་གསང་བ་ཁོ་ན།

བཤད་དབང་མེད་པར་སྙིང་ཁར་མེ་ཏོག་ལྟར་ཏུ་བཞད

ཨ་འཐས་སུ་གྱུར་པའི་སེམས་པ་འདི།

རྒྱང་རིང་གི་སྙིང་ཉེ་བའི་མི་ལ་འཁྲེང་།

སྲ་མཁྲེགས་སུ་གྱུར་པའི་ཁྱོད་ཀྱི་གཤིས་ཀ

ངའི་སྙན་ངག་དང་ཧ་ཅང་འཚམ།

ནམ་ཞིག ངས་ཁྱོད་ལ་སེམས་ཆུང་དགོས།

ཁ་ཆེམས་ལྟ་བུའི་སྙིང་གཏམ་བཤད་པ་ནི།

ང་ཁྱོད་ལ་དགའ་བའི་དན་རྟགས་ཡིན།

2018/11/6/ནུབ་མོར།

ལན་ཆགས་ཀྱི་བུ་ལོན།

ལོ་ཟླའི་ཧྲག་བར་ནས་མིག་ཆུ་རྡོག་གཅིག

འཇིག་རྟེན་གྱི་མཁའ་དབྱིངས་སུ་གཏོར།

ངའི་སེམས་ཀྱི་ཉིན་སྲིབ་གང་རུང་དུ།

རྒྱུས་མེད་ཀྱི་བུ་མོ་ཞིག

ལན་ཆགས་ཀྱི་བུ་ལོན་ནང་བཞིན།

མིག་ཟུང་ཀེམ་ཀེམ་གྱིས།

ངའི་སེམས་ཀྱི་གཙང་ངོགས་བྲུག

སྟོན་མཇུག་ཅིག་ལ་ཁྲུང་ཁྲུང་ཡུལ་ལ་ལོག་པ་ལྟར།

ཉིན་མཚན་མེད་པར་སེམས་ལ་འཁྱམ་ཉུལ་བྱེད།

དེའི་རྗེས་ནས།

ངས་སེམས་ཁྲལ་གྱི་ངང་ནས།

མི་ཚེ་གཅིག་ལ་སེམས་ཀྱིས་སྐྱོང་སྙིང་འདོད།

2018/11/12/ས་སྲོས་ཤིག་ལ་བྲིས།

ཁྱོད་རང་མཚོན་པའི་དུས་ཚོད།

མཚན་མོ་དེར་མོ་རང་བུད་སོང་རྗེས།

ང་རང་སྐྱོ་ཞིང་གདུང་ནས།

འཚོ་བ་ལ་སྙིང་བོ་བྲལ་སོང་བ་དང་མཚུངས།

མཚན་མོ་དེར་གྲང་ཤུར་ཤུར་གྱི་རླུང་བུ།

གདུག་རྩུབ་ཀྱིས་ཕྱུར།

ངའི་སྡུག་བསྔལ་དག་ལྷག་ལུས་མེད་པར།

གང་ཞིག་ཏུ་ཁུར་སོང་ན་ཅི་མ་རུང་།

སྲོད་མཐའི་མཚམས་སྤྲིན་གྱི་གསེབ་ནས།

ཡིད་དུ་འོང་བའི་ཁྱོད་ཀྱི་ངོ་གདོང་།

ངའི་སེམས་ངོགས་སུ་བཞུར་ཡོང་།

ཁྱོད་རང་མཚོན་པའི་དུས་ཚོད་ནི་།

ང་རང་མི་སྐྱིད་པའི་དུས་ཚིགས་ཡིན།

2018/11/7/ཉིན།

རྩོམ་ཡིག་འདི་ཐེངས། 6219 བཀླགས་འདུག