དུར་རྐང་། གསེར་རྟ།
ཚེ་རབས་གཅིག་གི་ཟིལ་བའི་གཡོ་གྲུ་ལ།།
བྱེ་ཐང་དག་ཏུ་ཆུ་མིག་བརྡོལ་བ་ལྟར།།
འཕྲད་ཙམ་གྱིས་ཀྱང་སྨྲེངས་སེམས་ཁུར་བའི།།
ཕྱེད་ཀ་ཆག་པའི་ཁྱོད་ཀྱི་ངོ་གདོང་ནི།།
འགྲམ་རྡོའི་ངོས་ཀྱི་ཁེར་རྐྱང་རི་མོ་སྟེ།།
ནགས་ཚལ་གསུབ་པའི་གཟིགས་ཀྱི་དབེན་སུམ་ལྟར།།
གྲུ་ཁེམ་ཐོགས་པའི་དབྱངས་ཀྱི་འགྲུལ་བ་དང་།།
རྦ་རླབས་འཇགས་པའི་སྨོན་ལམ་རྩེ་མོ་ཡང་།།
སྤྲིན་རྣམས་གཙང་བོར་ཆགས་པའི་གྲིབ་མ་ལྟར།།
རྒྱང་རིང་གྱེར་བའི་སྨུག་པ་གཡོ་ཙ་ན།།
རྗེས་ཆགས་བརྩེ་བའི་མདུད་པ་སྲ་མོ་ཡང་།།
རླུང་དང་སྡོམ་རྒྱས་བསྡམས་པའི་འཕྲིན་པ་ལྟར།།
མི་བཟད་བློ་ཡི་ཉི་མ་འཆར་བྱས་ན།།
སེམས་ཅན་ཕལ་བའི་ནང་གི་ཕལ་བ་ལ།།
མིག་ཆུ་མང་བའི་མཚོ་མོ་ཚུར་ཚུར་བཞུར།།
ཞེ་རུ་ཐོགས་པའི་མཚན་གཞས་སྐྱོ་བས་མནར།།
དེའི་ཚེ་གོམ་ཆུང་སྤོ་སའི་སྲང་ལམ་ནས།།
ངོས་ཀྱི་ཕལ་བའི་མིག་ངོར་ཁྱེད་རང་ཆགས།།
ཡིད་འོང་ལན་བུ་རླུང་གིས་བསྒུལ་ཙམ་གྱིས།།
དྲི་ཟའི་གཟུགས་ལ་སོགས་པ་གློ་བུར་འགག།
དེ་ལྟར་ཉི་ནུབ་ཀློང་གི་ལྗོན་ཤིང་ལྟར།།
མཐོང་དུ་མེད་པའི་ལས་སྐལ་རེ་རེ་ཡང་།།
གདུང་བའི་ཆུ་རྒྱུན་ཕྱོགས་ཕྱོགས་བྲུག་པ་ལྟར།།
སྣང་བ་མི་སྡུག་ཅིག་ཆར་འགག་བྱེད་ཀྱི།།
མ་བྲིས་གཟུགས་སུ་དོད་པའི་ཁྱོད་ཉིད་ནི།།
ལག་མཐིལ་རི་མོའི་ནང་གི་རྒྱ་མཚོ་ལ།།
ཡིད་འོང་ཀོ་གྲུ་གཏོང་བའི་དཀོན་མཆོག་སྟེ།།
སྙིང་ཁར་བྱ་ཁྱུ་ཕྱོགས་པའི་སྨུག་པ་ལྟར།།
ཚེ་འདིའི་སྐྱེ་བའི་དཀར་ནག་གཉིས་མཚམས་ནས།།
ཇི་ལྟར་གཞལ་ཡང་བརྗེད་དུ་མེད་པ་ཡིན།།
ཕྱི་ལོ་༢༠༡༧ཕྱི་ཟླ་༣ཚེས་༢༢ཉིན།」
